MARAKO 14

1I lu luŋa de‚ ti akoloki luŋazi mure yeŋadru tozo i kolo druma na soponi Rosetona ku na nyeini mugati naga ’ba kape kine‚ ka’i’ila drumala kilo ku katogolo ti kukuzuna kilo druga ga’yu kiko lo mokani Yesu ku toŋulupa, lo tatuwini lepe kaŋo. 2’Bo ko akulia adi‚ “Ka’bi ku gbogbo’da i luŋa lo kolo drumanalo, ŋutulu kilo ka’bi ku reresatu.” 3Kugbo Yesu laga asaka Betania yu‚ ku Simona laga ku rimalo kadi yu‚ ti lepe agbi’diki i mesa kutu yu‚ noka ne’de druga pondra ku wele na ŋmwa sisisi naga na luŋu a narido‚ naga ku gbore naga ki koruna i ŋese nakpe. Lepe druga trurodru kutu na ŋese ŋanina‚ druga ’bugo wele ŋanina ku Yesu i kuweni. 4’Bo ŋutulu ku’de kilo druga piza kase dridriŋini ku ŋoma adi‚ “Wele na ŋmwa sisisi ina de kokoroyi de gbandra ya? 5Ina wele de roromoki togboro alangu silingi kamazi musala ma tiki lemerika kilo. Ko druga riringa lepe. 6’Bo Yesu druga takindra ko adi‚ “Kolokita lepe. Ta sasandru lepe gbandra? Lepe akondra na ku ’bu’busi. 7Lemerika kilo gbo kasi ta mu luŋa‚ luŋa giri laga ma ta nyadrinilo, ta roromoki kondra ko a na’bu. ’Bo laga na‚ na ani gbo’da kasi ta mu luŋa. 8Lepe akondra beti naga ma lepe romokini ina. Lepe aŋindra mugu niona ti inga aku nuka. 9Na takindra ta a ’diri‚ mu pirito na trukozini kuu na’buna i kanina kine‚ ŋo laga ma nokana kondrilo itrutrukozi itro‚ ma ramani kulia ti lepe kine.” 10I bo ŋanina‚ Yuda laga lo Kariota, laga i ŋutulu mere gele ku konye mure kilo i dridriŋinilo, druga utu ku ka’i’ila drumala kilo yu i nyokindro na Yesu mundrara kasiko yu. 11Kugbo ko laga ayinga kulia ŋani kine‚ ko druga gbo ku nyola‚ druga sara i tikindra na lepe riye. Kuwade lepe druga ga’yu kiko lo nyokini lepe mundrara. 12I luŋa laga a kayo lo nyeini mugati naga ’ba kape kine‚ i luŋa laga bita ma ko ’dungini torela ti kebilizi laga a ti Roseto kilolo‚ lotodiniki ti Yesu kilo druga piza lepe adi‚ “Do nyadru ku yi kukune Rosetona mo do ku nyosuni yeda ya?” 13Lepe druga sonyodru lotodiniki kanye ku’de kilo mure‚ ti atakindra ko adi‚ “Lubita kezi yu‚ ta imomora ku le’de ŋutu laga lo ’dokodru soŋgbo lo pio. Keporota bo na lepena‚ 14i piri naga ma lepe lubi kata yu nu‚ kulianita ku monye’balo adi‚ ‘Katogoloni akulia adi‚ Kadi nio na komona nye naga ya‚ piri naga ma na ku nyosuni Rosetona kasi lotodiniki kuwe kilo ina? 15Nyenaga lepe ikpekindra ta kadi naga ki yu naga a druma‚ ti akukuna ku kapazi girina. Kukuneta kapazi kaya kilo yu de.” 16Lotodiniki kilo druga pilara‚ druga utu kezi yu druga rumbi kulia kine beti naga ma lepe takindri kona. Ko druga kukundra Rosetona. 17Ku gbo’dini kotriana Yesu druga yeŋundra kasi ŋutulu laga mere gele ku konye mure kilo. 18Ku ko laga agbi’diki i nyosu i mesa kutuni‚ Yesu druga kulia adi. “Na takindra ta a ’diri le’de ŋutu kasu dridriŋini, laga lo nyosu seku nalo‚ inyokindro na mundrara.” 19Ko druga poki i gbo’da ku luŋuli‚ druga pipiza lepe gele gele adi‚ “Ilo na ya?” 20Lepe druga teyitokindro ko adi‚ “Lepe a ŋutu gele i ŋutulu laga mere gele ku konye mure kilo i dridriŋini, laga lo nyelakindra ’dilo i ta’buna kugele seku nalo. 21Kuwade Ŋiro lo ŋutulo ilo tu i kiko beti naga ma wurokini lepena‚ ’bo dreliana ina a na ŋutu laga lo nyokindro Ŋiro lo ŋutulu mundrara ilo. Kazu kodro kugbo ŋutu ŋanilo aku yuŋe‚ a na’bu.” 22Ku ko laga kilo inyosuni, Yesu druga dumundra mugati. Ku lepe laga a’boriza, lepe druga gbegbenyeza katana‚ druga tikindra ko‚ druga kulia adi, “ ’Dumarata, ina de a mugu nio.” 23Lepe druga ’dumundra drikerina. Ku lepe laga atikindra iyetelo, lepe druga tikindra ko, ko giri amozu. 24Lepe druga takindra ko adi, “Kine de a rima kuwe ti tomorena, na wonu ku ŋutulu rodri kine. 25Na takindra ta a ’diri na aka mozu suwe ti konye ti zabibu ’doni yeŋadru tozo i naga ma na ku mozini a naluduko i tumata na Ŋun ina kata yu nu.” 26Ku ko laga awe’yu wirilo‚ ko druga lulupodru, druga utu i mere laga Oliva yu. 27Yesu druga takindra ko adi‚ “Ta giri ibabayi‚ igbonaga awuro adi‚ ‘Na igbugburu kayukunilo, kebilizi kine irereki ina.’ 28’Bo i bo na ŋiye niona na itutu kasu ŋero Galili yu.” 29Petero druga teyitokindro lepe adi‚ “Kugbo ko giri laga ibabayi, laga na ani bayi.” 30Yesu druga takindra lepe adi‚ “Na takindra do a ’diri‚ i ilo tukaze de‚ ti inga sukurilo aku sira luŋa mure‚ do irerenya na luŋa musala.” 31Petero druga kulia ku teriŋi adi‚ “ ’Dia kodro ku yi tatuwa seku do kugele kpe‚ na aka renya doni.” ’Bo ko giri akulia de. 32Ko druga tu i piri na luŋu a Getesemane nu. Yesu druga takindra lotodiniki kanye kilo adi‚ “Gbi’dikinita inide ti inga ki na magu Ŋun.” 33Lepe druga zonga ku Petero ku Yakobo ku Yoane‚ druga poki i gbo’da ku luŋuli koru ku teili laga tomoni. 34Lepe druga takindra ko adi‚ “Teili liolo ilo gbo ku luŋuli koru‚ be naga na itutuwana. Sakanita inide‚ gbo’dita ku konye.” 35Lepe druga tu ŋero yu‚ druga mereke ka‚ druga magu adi ku roromoki luŋa ŋani lu ti rosodri kanye koŋo yu kaŋo. 36Lepe druga kulia adi, “Aba‚ Amonye‚ kuliata giri roromoki do. ’Dotoro ina drikeri na kulia na potroru ina de kuweni kaŋo. ’Bo ku kokonu kulia naga ma na lepe nyadrini kine‚ ti gbo’dini be naga mo do lepe nyadrinina.” 37Ku lepe laga apondra, lepe druga ku rumbi ko i toto, druga piza Petero adi, “Simona, do tototo ya? Do ani romoki gbo’da ku konye gboŋa sawa gele’du ya? 38Gbo’dita ku konye, magita magu ka’bi ta ku lubo i luluka kata. Teililo gbo ku puso, ’bo muguna gbo ’ba teriŋi.” 39Lepe druga tu ’do‚ druga magu ku kulia nagele kine. 40Ku lepe laga apondra ’do, lepe druga ku rumbi ko i toto‚ igbonaga konye kasiko kilo gbo’di tomonina. Ko aku de kulia naga ma ko ku teyitokindri lepe kine. 41Lepe druga pondra i luŋa laga a togi musalalo‚ druga piza ko adi‚ “Ta inga kilo i toto‚ ta inga kilo i yuka i piri ya? Aromoki. Luŋalo ayeŋundra azo. Meteta‚ Ŋiro lo ŋutulo inyoki mundrara i kenisi ti katoronya kilo. 42Ŋineta, kita utu. Meteta‚ ŋutu lo nyokindro na mundraralo gbo’di nyogoŋa.” 43Wuleŋa gele kugbo lepe inga ilo kukulia, Yuda laga i dridriŋi na ŋutulu laga mere gele ku konye mure kilolo druga pondra kasi mongoyo na ŋutulu lo pondra ku walia ti moro‚ ku turia itro‚ ti ko kulu ŋiyu ku ka’i’ila drumala kilo ku katogolo ti kukuzuna kilo ku temezi kilo. 44Ti kanyoni lo mundraralo akpekindra ko kpiye adi‚ “Ŋutu laga ma na ku nyu’i gbangiri lo lepelolo, ilo lepe. Moketa nye‚ zoŋeta lepe ka’bi ku lalabara.” 45Ku lepe laga ayeŋundra, lepe druga pondra wuleŋa gele ku Yesuni‚ druga kulia adi‚ “Katogoloni.” Lepe druga nyu’ya gbangiri lo lepelo. 46Ko druga sukindro kenisi kase kilo ku Yesu kini‚ i moga na lepe. 47’Bo ŋutu gele i dridriŋi na ŋutulu laga lo lira i nyogani kilo druga ’dutundro wale lonye lo morolo‚ druga deba upiye lo ka’i’ilani laga a leŋgberelo, adepu suweta lo lepelo ka. 48’Bo Yesu druga takindra ko adi, “Ta lupundro beti ŋona ku moga kolani ku walia ti moro‚ ku turia itro i moga na na ya? 49Mu kolozi na asaka kasi ta i kadi na Ŋun ina kata yu i togo’yu‚ ’bo ta aku moga na. ’Bo kulia na wuwuro kine ma torumokindri ’beri.” 50Lotodiniki kilo giri druga kolokindro lepe‚ druga wowoke. 51’Bo ’bulani le’de akepodru bo na Yesuna ti lepe gbo ku suka na kakama i muguni. Ko druga moga lepe‚ 52’bo lepe akoloki sukana druga wo kana. 53Ko druga zonga Yesu ku ka’i’ilani laga a leŋgberelo yu. Ti ka’i’ila drumala kilo ku temezi kilo ku katogolo ti kukuzuna kilo atunundra ’beri kugele. 54’Bo Petero akepodru bo na lepena pazo pazo yeŋadru tozo i rii na ka’i’ilani laga a leŋgberelona yu‚ lepe druga gbi’diki kasi katiyu kilo i laŋa i kima kutu. 55Kuwade ka’i’ila drumala kilo ku kayolo ti kuliata kilo giri druga ga’yu bo na kulia naga ma ŋutulu ’dodri ku Yesu i muguni kine ma ko ku tatuzi lepe‚ ’bo ko aku rio. 56’Bo ŋutulu rodri a’dodru bo na kulia ti lepe kine ku to’bure, ’bo kulia naga ma ko ’dodrini kine aku mora kugele. 57Ŋutulu ku’de kilo druga ŋi ki‚ i ’dodru na bo na kulia ti lepe kine ku to’bure, akulia adi‚ 58“Yi ayinga lepe i kulia adi‚ ‘Na irandru ina kadi na Ŋun na kukuna ku kenisi ina de kaŋo‚ ’bo i bo na luŋazi musala na i’du’du ne’de naga ani kukuna ku kenisina.’ ” 59’Bo ’dia kodro kugbo gbo de kpe‚ bo na kulia naga ma ko ’dodri kine aku mora kugele tro. 60Ka’i’ilani laga a leŋgberelo druga ŋi ki kasiko i dridriŋini, druga piza Yesu adi‚ “Do ani teyitokindro kulia ya? Kulia naga ma kilo ŋutulu de ’dodri konu muguni kine a ti to’diri ya?” 61’Bo Yesu ayiŋa tali‚ aku teyitundro kulia. Ka’i’ilani laga a leŋgberelo druga piza lepe ’do adi‚ “Do a Kristo, Ŋiro lo Ŋun laga lo Pupuralo ya?” 62Yesu druga kulia adi, “Na a lepe. Ta imemedra Ŋiro lo ŋutulo ti agbi’diki i keni lo lutate lo Monye Teriŋilo i pondra kasi ’dikolo ti ’diko kine.” 63Ka’i’ilani laga a leŋgberelo druga kendra bongola kanye kine, druga kulia adi, “Yi nyadru ku’de ka’doto ti bo na kulia kine a ti nyo? 64Ta ayinga momorozu na lepena azo. Ta rambu adinyo?” Ko giri druga ŋedya kulia ti lepe kine adi ti tuwani kaŋo. 65Ku’de kilo ŋutulu druga poki i yagu na kamula ku Yesu i muguni‚ druga mugo koŋo na lepena druga gbudro lepe‚ druga takindra lepe adi‚ “Kewu kulia.” Katiyu kilo druga nanaŋazu lepe. 66Kugbo Petero laga lu yeka i rii yu‚ ne’de ŋiro naga na konakindra ka’i’ilani laga a leŋgberelo kitana druga pondra. 67Ku lepe naga amedra Petero i laŋa i kima kutu yu‚ lepe druga gbuluzu lio‚ druga kulia adi‚ “Do itro asaka seku Yesu lo Nazaretalo kugele.” 68’Bo lepe druga rerenya adi‚ “Na aku de kulia naga mo do tazini kine‚ na aku rami itro.” Lepe druga lupodru i bu kata‚ ’bo sukurilo druga sisira. 69’Bo ŋirona druga medra lepe‚ druga poki i takindra na ŋutulu laga yu de kilo adi‚ “Ilo ŋutu de a ŋutu lasiko.” 70’Bo lepe arenya ’do. I bo na baŋe a naŋutru ŋutulu lo lira yu de kilo druga takindra Petero adi‚ “A ’diri do itro a ŋutu lasiko‚ igbonaga do a ŋutu lo Galili ina.” 71Lepe druga poki i kongu na mugu i nyosu na milio itro adi‚ “Na aku de ilo ŋutu laga ma ta tazini kulia ŋani kinelo de.” 72Wuleŋa gele sukurilo druga sisira ’do i luŋa laga a togi murelo. Petero druga rambu kulia naga ma Yesu tazini kine‚ adi‚ “Ti inga sukurilo aku sira luŋa mure‚ do irerenya na luŋa musala.” Lepe druga poki i gbiye koru.

will be added

X\