MARAKO 13

1I naga ma Yesu lupundri kaŋo i kadi na Ŋun ina kata yuna le’de ŋutu i dridriŋi na lotodiniki ti lepe kilo druga takindra lepe adi‚ “Katogoloni mete‚ kilo ŋoropo de‚ ku kine kadizi de ’bu’busi ŋanina!” 2Yesu druga teyitokindro lepe adi‚ “Do abo kine kadizi naga drudrumala kine de ya? Ŋurupi gele aka koloki i le’de kini tro‚ ko giri itrutruro ka.” 3I naga ma lepe gbi’dikini i mere laga Oliva ki yu i kadi na Ŋun ina i koŋo yuna‚ Petero kasi Yakobo ku Yoane ku Anderia druga pipiza lepe tali adi‚ 4“Trukoki ŋutu‚ kine kulia de igbo’da nanu ya? Kpiye laga a inyo lo ikpeza adi kine kulia de giri ikokondra ’beri ya?” 5Yesu druga poki i takindra na ko adi‚ “Gbo’dita ku konye ka’bi le’de ŋutu ku ’do’dolara kuweto kasu kine a bada. 6Ŋutulu rodri ipopondra ku kari kuwe kine‚ lo ikulia adi‚ ‘Na a lepe.’ Ko i’do’dolara kuweto ti ŋutulu rodri kine a bada. 7Ku ta laga ayinga kulia ti moro ku ti nyaŋiliza na ’beri‚ teiliko kasu kilo ka’bi ku ’do’do ’do’do‚ igbonaga kine kuliata de kine ipupuru ina‚ ’bo luŋa lo ’dute na kanalo inga aku yeŋundra. 8’Bo zuro kilo iŋiŋiye i moro ku zuro ku’de kilo‚ tumatana ku tumata ne’de. Dodonga na kana igbo’da i pirito ka’de ka’de‚ magona igbo’da itro. ’Bo kine kulia de a suluwe na dreliesina. 9“ ’Bo tineta ti ’beri‚ igbonaga ko ititikindra ta ku kayolo ti kuliata kilo‚ i kiro i kadizi naga a momoreta kine kata yu ina. Ta ililira ku lo’bizoki ku mataki kilo i koŋo yu‚ ku kulia kuwe kine‚ i ’dutukindro na ko bo na kuliana. 10Kuu na’buna itrutrukozi ku zuro kilo yu giri a nze. 11Ku ko laga amoga ta i tikindra na ta i ŋera na kulia nu‚ teiliko kasu kilo ka’bi ku ’do’do ’do’do a nze ku kulia naga ma ta ku tazini kine. Taneta kulia na ititiki ta i tayi i lu luŋa de kine‚ igbonaga ŋutu laga lo tazulo agbo’da a tani‚ ’bo a Yuka Nakiyena ina. 12Luŋase ititiki luŋase i tuwa‚ monyelo ititiki ŋiro lonye‚ ŋazi iŋiŋiye i kayuŋo kase kilo kini i tikindra na ko i tatuwa. 13Ta imamana a loro ku ŋutulu giri ku kulia ti kari kuwe kine. ’Bo ŋutu laga ku teili lo rile yeŋadru tozo i ’dute yu ilo, nyelo irite. 14“ ’Bo ku ta medra ŋo laga lo ŋmwa a loro lo tukarakindra kapazi girilo ti alira i piri naga aku rukona kata yu, (ti kakenanilo dene kulia), ŋutulu laga i Yudaya katani kilo ti woki i meria yu. 15Ŋutu lo gbo’da i kadi ki ilo ka’bi ku kikiyundra ka i lubo kanye kadi yu i ’dumadru na kapa. 16Ŋutu lo gbo’da i melesi kata yulo ka’bi ku yiyite bo i ’dumadru na bongo nanyena. 17Dreliana ina ku wate naga ku pelela kine‚ ku wate naga na tunagu ŋazi kine i kulu luŋa de. 18Maketa Ŋun adi kulia ŋani kunu ka’bi ku kokondra ’beri i luŋa lo katiro. 19I kulu luŋa de sasanyana iyeyeŋundra, sasanya ne’de naga be ina de ’bayi ŋiyu i luŋa lo sulukindri Ŋun gbeza na kana lu yeŋundra tozo tinade‚ ’bo ne’de aka yeŋundra deni. 20Kedri kodro ku Matalo laga aku ŋedya luŋazi kilo ’baziŋa, le’de ŋutu ’bayi lo ririte. ’Bo ku kulia ti ŋutulu laga anyume ma lepe nyumbi kilo‚ lepe aŋedya luŋazi ŋani kilo. 21I lu luŋa de‚ ku le’de ŋutu kulia ku ta adi‚ ‘Meteta‚ Kristo ma lo‚’ kugbo‚ ‘Meteta‚ lepe ma lu‚’ ku ruruta. 22’Bo Kristo laga a ’bureniko kilo ku kakeyo ti to’bure kilo iŋiŋiye i kpeza na kpiyeta kilo ku wonyesi kilo i ’bo’boliza na ŋutulu laga anyume kilo kuwa roromoki. 23’Bo tineta ti ’beri. Na atakindra ta kuliata kine giri a nze. 24“ ’Bo i kulu luŋa de‚ i bo na sasanyana, kolona isosomuko, yapalo aka kpekpezani, 25kasiri kilo i’do’do ’do’do i ’diko yu ka‚ teriŋito ti ’diko kine idodoŋa dodoŋa. 26I bo ŋanina ko imemedra Ŋiro lo ŋutulo i pondra i ’dikolo yu ku teriŋi koru ku mo’yu koru. 27’Bo lepe isonyodru malaika kilo i goto ti ka kilo giri kata yu‚ i tunundra na ŋutu kanye laga anyume kilo‚ ŋiyu i dute na kana yu yeŋadru tozo i’dute na kana yu. 28“Deneta togole lo koligilo. Keniya kine kuwa agara‚ koropo kine kuwa awila‚ ta roromoki dendra adi za’belo gbo’di nyoga. 29Kuwade kugbo ta laga amedra kine kulia de i kondra na ’beri‚ ta roromoki dendra adi lepe gbo’di ilo nyogoŋa i ketimi kutuni. 30Na takindra ta a ’diri‚ ina yuŋe na tinadena aka lengani, ti inga kine kuliata de giri aku kondra ’beri. 31Dikona ku kana ilelenga, ’bo kulia kuwe kine aka lengani. 32“ ’Bo lu luŋa de ku nu baŋe de le’de ŋutu aku deni tro‚ kugbo malaika ti ’diko kilo‚ kugbo Ŋirolo‚ gele’du Monye laga adeni. 33Gbo’dita go ku konye‚ igbonaga ta aku deni adi luŋa ŋanilo igbo’da nanu ina. 34Be naga ma le’de ŋutu ituni i worozi‚ ku lepe laga akolokindro ’ba lonyelo‚ lepe takindra upi kanye kilo kukuzu i korakindra na ko kitazi gele gele. Lepe druga takindra katiyuni lo ketimilo kukuzu adi ti gbo’dini ku konye. 35Kuwade gbo’dita ku konye‚ igbonaga ta aku de adi monye’balo ipondra nanu‚ ŋona kotria‚ kugbo i tukaze kide‚ kugbo i sira na sokoro‚ kugbo kutamalu, 36lepe ka’bi ku pondra wuleŋa gele ku rumbi ta i toto. 37Kulia naga ma na takindri ta kine‚ na takindra ŋutulu giri adi‚ Gbo’dita ku konye.”

will be added

X\