MARAKO 11

1Ku ko laga ayenga Yerusalema yu nyoga‚ Betefage yu ku Betania itro i mere laga Oliva i muko yu‚ Yesu druga sonyodru lotodiniki kanye ku’de kilo mure‚ 2druga takindra ko adi‚ “Utita i ’beŋi laga kasu koŋo kulu de. Kasu lubo yu‚ ta irumbi tore na drongi nu amunuki yu de‚ naga inga le’de ŋutu aku kiza kini. Yukuwuta lepe‚ zikuta lepe. 3Ku le’de ŋutu lo piza ta adi‚ ‘Ta kondra de gbandra ya?’ kulianita adi‚ ‘Matalo lo nyadru‚ ’bo lepe isunyundro lepe agbole weni.’ ” 4Ku ko laga autu‚ ko druga rumbi tore na drongina amunuki i kaakutu yu a lo kaŋo i kiko kutu yu. Ko druga yukundro lepe. 5Ŋutulu laga lo lira yu de kilo druga piza ko adi‚ “Ta kondra inyo‚ ta yokowodru tore na drongina gbandra?” 6Ko druga takindra ko kulia naga ma Yesu tazini kine‚ ko druga rukokindro koŋa. 7Ko druga zikundro tore na drongina ku Yesuni‚ ko druga gumba bongola kase kine kini. Yesu druga kiza kini. 8Ŋutulu rodri druga pedra bongola kase kine i kiko katani‚ ku’de kilo apedra keniya naga ku koropo naga ma ko ’dengi i droru yu kine. 9Ŋutulu laga lo tu ŋero kilo ku laga lo kepodru boni kilo ti kulu laiza adi‚ “Hosana‚ ŋutu lo pondra ku kari ti Mata kine ilo ti purani pura! 10Tumata na monye lika laga Dawidi naga ipopondrana ti purani pura! Hosana i piri naga ki yuna.” 11Kuwade kugbo Yesu laga alubo Yerusalema kata yu‚ druga lubo i kadi na Ŋun ina kata yu. Ku lepe laga awodyu kapazi kilo giri‚ lepe druga lulupodru i utu Betania yu ku ŋutulu laga mere gele ku konye mure kilo‚ igbonaga kolona ina ’do’dorona. 12Ku gbo’dini imalu de kugbo ko laga aŋiyoro Betania yu‚ Yesu druga tika ku mago. 13Ku lepe laga amedra koligi pazo yu‚ lepe druga tu i muko yu adi ŋona nye irurumbi le’de ŋo i muguni. Ku lepe laga ayeŋadru nyoga‚ aku rumbi le’de ŋo‚ ŋo kine a koropo ka’delo, igbonaga aku gbo’da a luŋa lo trorani ’biyo kilona. 14Lepe druga takindra koligilo adi‚ “Le’de ŋutu ka’bi ku nyonyo konye kolu kilo ’do tro.” ’Bo lotodiniki ti lepe kilo ayinga kulia ŋani kine. 15Ku ko laga ayenga Yerusalema yu‚ Yesu druga lubo i kadi na Ŋun ina kata yu‚ i rikodru na ŋutulu laga lo totogbodru kapazi ku laga lo gbogbodru i kadi na Ŋun ina kata yu kilo. Lepe druga dudukuza mesala ti ŋutulu laga lo togboza sente kilo kine‚ ku si’deta ti ŋutulu laga lo togbodru a’bugo kine ka. 16Lepe aku rugo adi le’de ŋutu ka’bi ku ŋeradru i zonga na le’de ŋo i kadi na Ŋun ina kata yu. 17’Bo lepe druga togo’yu ko adi‚ “Aku wuro adi‚ ‘Kadi niona iluŋu a kadi naga a maketa ku zuro kilo giri‚’ ya? ’Bo ta alopugo lepe a kugi na kariaka.” 18Kugbo ka’i’ila drumala kilo ku katogolo ti kukuzuna kilo laga ayinga kulia ŋani kine‚ ko druga ga’yu kiko lo tukarakini lepe‚ ’bo ko akuze lepe igbonaga mongoyo na ŋutulu giri arambu ’beri ku togo’yu na lepena ina. 19Ku gbo’dini kotriana Yesu druga lupodru kezini kaŋo yu kasi lotodiniki kanye kilo. 20Ku gbo’dini kutumaluni ku ko i rosodruni, ko druga medra koligilo atetio ku kukuri kine itro. 21Petero druga rambu kulia‚ druga takindra Yesu adi‚ “Katogoloni mete! Koligi lo lomu do kaazelo atetio kaŋo.” 22Yesu druga teyitokindro ko adi‚ “Rugita Ŋun. 23Na takindra ta a ’diri‚ ku le’de ŋutu takindra ilo mere de adi‚ ‘Ŋine‚ biriŋoro mugu suburi kata yu‚’ ku teili lo lepelo ani yoyongu, ’bo ku lepe rugo adi kulia naga ma lepe tazini kine ikokondra ’beri‚ kulia ŋani kine igbogbo’da de ku lepeni. 24Kuwade, na takindra ta‚ kulia giri naga ma ta magini‚ ma ta pizini kine‚ rugita adi ta a’deba kulia ŋani kine azo‚ ’bo ko igbogbo’da a kasuŋa. 25Ku ta lo lira i magu na Ŋun‚ ti ta gbo ku kulia ku le’de ŋutu‚ ’dineta kulia ŋani kine. Kuwade Monye lasu lo gbo’da i ’diko yu ilo i’di’diza torozi kasu kine. 26’Bo kugbo ta ani ’diza torozi ti ŋutulu kine‚ Monye lasu lo gbo’da i ’diko yu ilo aka ’diza torozi kasu kineni.]” 27I bo ŋanina ko ayenga ’do Yerusalema yu. I naga ma Yesu woroni i kadi na Ŋun ina katanina, ka’i’ila drumala kilo ku katogolo ti kukuzuna kilo ku temezi kilo apondra ku lepeni. 28Ko druga piza lepe adi‚ “Do kondra kine kulia de ku teriŋi naga ya‚ ŋona ŋa lo tikindra do ina teriŋi de naga mo do kondri kine kulia dena ya?” 29Yesu druga teyitokindro ko adi‚ “Na ilo ’do ipiza ta ku piye. Teyitokita na‚ ’bo na itatakindra ta adi na lo kondra kine kulia de ku teriŋi ni ŋa ina. 30Baputizi laga ma Yoane tikindrilo lu ŋiyu i’diko yu kugbo ku ŋutulu kiloni ya? Teyitokita na.” 31Ko druga pipiza ’beri kase dridriŋini adi‚ “Kugbo yi kulia adi ‘Ŋiyu i ’diko yu‚’ lepe ikulia adi‚ ‘Kuwade ta aku rugo lepe gbandra ya?’ 32’Bo ku yi kulia adi‚ ‘Ŋiyu ku ŋutulu?’ ” ’Bo ko akuze ŋutulu kilo igbonaga ŋutulu giri arugo adi Yoane a kakeyoni laga mŋgbana. 33Kuwade ko druga teyitokindro Yesu adi‚ “Yi aku deni.” Yesu druga teyitokindro ko adi‚ “Kuwade na aka trukokindro ta teriŋi naga ma na kondri kine kulia de inani.”

will be added

X\