LUKA 8

1Nyenaga i bo na ilu luŋa de‚ Yesu autu i kezino kata yu ku i ’beŋito yu i trukodru ku i kekenadru na kuu na’bu na tumata na Ŋun ina. Lotodiniki ti lepe laga mere gele konye mure kilo ti autu kasi lepe‚ 2ku wate ku’de naga atoruwe ku yukala naro ku tatuwa naga ka’de ka’de kine‚ ku Maria na luŋu a na Magadala naga ma dreria loro lupundri ku lepe i mugu buriona‚ 3ku Yoana‚ naga a noka na Kuza laga a katiyuni lo kapazi ti Herode kasi Susana‚ ku wate ku’de rodri‚ na logu Yesu ku lotodiniki ti lepe kilo ku kapa kase kilo kine. 4Kugbo mongoyo na ŋutulu rodri kilo laga atunundra ’beri kugele ku ŋutulu lo ŋiyu i kezino lo popondra ku lepeni kilo de‚ Yesu druga takindra ko kulia na guguma adi‚ 5“Kawiani lo nyomolo kazu alupodru kanye weza na nyomo. Ku lepe i wezani ku’de kilo agbadru ’beri i kiko kata‚ druga roroka ku mukuzi‚ druga kpenya kine nyonyo ko. 6’Bo ku’de kilo agbadru ’beri i lele kutu. Kugbo ko laga apu‚ ko druga riŋe kaŋo‚ igbonaga ko aku riondru li’bina. 7’Bo ku’de kilo agbadru ’beri i kakuwa kata druga ’dudyo kasi ko kugele‚ druga tikindra ko gbo a wilio wilio. 8’Bo ku’de kilo a’do’do i kuzo naga a na’bu kata druga pupu wule‚ druga troru konye kase kama gele.” Ku lepe laga akulia kine kulia de de lepe druga kulia ku roro gboŋa adi‚ “Ŋutu laga ku suwolo‚ ti lepe yingi.” 9Kugbo lotodiniki ti Yesu kilo laga apiza lepe adi bo na kine kulia de kpeza inyo ya, 10lepe druga teyitokindro ko adi, “Kasunina atiki ta adi deneta kulia naga na mumuyi mumuyi ti tumata na Ŋun kine. ’Bo ku ku’de kilonina ko kine tayi ku kulia na guguma, kasiko i medrani ka’bi ko ku memeri, kasiko i yingani, ka’bi ko ku yoyo’yu bo ŋanina. 11“Kulia na guguma kine de gbo de: Nyomo kilo a kulia ti Ŋun. 12Laga i kiko kata kilo de a ŋutulu lo yinga kulia kine kilo, i bo ŋanina kasosoyini lo kulialo druga pondra ku ninadru kulia ŋani kine kasiko i teilikoni, ka’bi ko ku rugo, ka’bi ko ku rite. 13Laga i lele kutu kilo a ŋutulu lo yinga kulia kine, lo rugo ko ku nyola kilo. ’Bo ko gbo ’ba kukuri, ko rugo ku luŋa laga ’baziŋa, ku luŋa lo lulukalo lo yeŋundra ina, ko druga koko. 14Nyomo lo gbadru ’beri i kakuwa kata kilo, ko a ŋutulu lo yinga kulia kine kilo, ’bo ku ko laga apilara kase kikoli yu, ’do’do na teilikona ku tokorine ku nyola na ina ru dena druga muluzu ko, kuwade konye kasiko kilo ani rumbo. 15Nyomo lo ’do’do i kuzo naga a na’bu kata kilo‚ koŋa a ŋutulu laga lo yinga kulia kine‚ druga ’deba ko tritri ku teiliko laga ’ba toŋulupa laga a lo’bu koru kilo‚ ko troru konye kilo ku teiliko laga a logo. 16“Le’de ŋutu ’bayi laga kugbo amokakindra kima, druga ku mugo lepe ku turu’be, kuwagi lepe ku ’delakindra i gbolo muko, ’bo lepe i’delakindra lepe i lororo ki i piri naga na pupuru, adi ŋutulu lo lupundro kilo ma medrini parara na lepena ’busa. 17’Bo le’de ŋo ’bayi laga ilo a’dana ’bo aka puruni, ’bo ŋo laga lo kona tali ’bayi laga aka denani, aka puruni. 18Kuwade gbo’dita go kasu yingani. Ŋutu laga ku kapalo ititiki ku’de kini, ’bo ŋutu laga ’ba kapalo, kapa laga ma lepe yo’i adi nye gbo ku koŋa kilo iriariakazi kaŋo.” 19I bo ŋanina ŋote Yesu kasi luŋaseri ti lepe kilo autu ku lepe yu, ’bo ko aku romoki yenga nyoga ku lepe yu ku kulia ti mongoyona kine. 20Druga trukoki lepe adi, “Ku ŋuti kasi luŋosuro kulu alira kaŋo yu de. Ko nyadru bonga do.” 21Lepe druga teyitokindro ko adi, “Ŋote niona ku luŋaseri kuwe kilo ko a ŋutulu laga lo yinga kulia ti Ŋun kine ku lo kondra kulia ŋani kine kilo.” 22I luŋa le’delo Yesu alubo i ki’bo kata yu kasi lotodiniki kanye kilo, lepe druga takindra ko adi, “Kita laŋadru we lu lozo lo suburi.” Ko druga pipilaki. 23Kasiko i laŋadru suburi katani ku ki’bona lepe apoki i toto. Druga kobuŋe drumana burundra suburi kini, pio kine druga zore i ki’bo katani, ko kodro gbo’di kilo kakaraki. 24Ko druga tu ku topurundro Yesu adi, “Katogoloni, yi kilo mamanakindra po!” Lepe druga pupure druga ringa kobuŋe ina ku pio na ŋizu ’beri kine. Ko druga gbigbi’diki, kana druga yiŋazi lilili. 25Lepe druga piza ko adi, “Rugo nasuna nia?” Ko druga kuze koru‚ druga rambu ’beri koru, druga kulia kase dridriŋini adi, “Ilo ŋutu de a ŋa‚ laga lo takindra kobuŋe seku pio kukuzu, ko bulo sobu kulia ti lepe kine de ya?” 26Ko druga yeŋadru i ka na Geregesene‚ naga na bonga ’beri seku Galili nu. 27I naga ma Yesu lupodri kaŋo i ki’bo kata yu i kuti yu nu‚ ŋutu le’de lo kezi naga ku dreria lorolo druga momora seku lepe. Luŋa rodri lepe aku sozu bongo, lepe agbo’da saka kadini, ’bo saka i dridriŋi na gulomo. 28Nyenaga ku lepe laga abonga Yesu‚ lepe druga resa ku teriŋi‚ ku roro laga gboŋa adi‚ “Yesu, do laga a Ŋiro lo Ŋun laga Ki koru ilo, kulia kaya seku do kine a ti nyo ya? Na ma’yu mugu ku do, ku sasanyi na po!” 29Ti Yesu atakindra yuka naro ina kukuzu adi ti lupodri kaŋo ku ŋutu ŋaniloni. Luŋazi rodri yuka narona kuwa amoga ŋutu ŋani, lepe bita totokuwa ku riye na tiyuni lepe‚ ’bo lepeŋa ’de’deŋozu riye kine kaŋo‚ dreri ŋanilo druga zulodru lepe i diŋo kata yu. 30Yesu druga piza lepe adi, “Kari konu kine se naga ŋa ya?” Lepe adi, “Mongoyo” igbonaga dreria rodri ti alubo ku lepeni ina. 31Kuwade dreria kilo druga ma’yu ’beri koru adi ka’bi Yesu ku sosonyoro se i drili naguluna kata yu. 32Ti mongoyo na wuriyo rodri kulu rata i mere muko yu, dreria kilo druga ma’yu ’beri adi ti Yesu tiki se i lubo i wuriyo kilo kata yu. Kuwade lepe druga rukokindro ko. 33Dreria kilo drugalupodru ku ŋutu ŋaniloni ku lubo i wuriyo kata yu, ’bo mongoyo na wuriyo kilo druga pu’dozi i goloto kata yu ku ’do’dooro suburi kata yu, ko druga ruruto. 34Kugbo kayuku ti wuriyo kilo laga abonga kine kulia de, ko druga wowoke ku kuzena i kekenadru na kulia kine i nu kezi de kata yu ku i nu ka naga i laga yuna kata yu itro. 35Ŋutulu kilo druga lupodru ku bonga kulia na kondra ’beri kine, ko druga yeŋundra ku Yesuni, druga ku rumbi ŋutu laga ma dreria lupundri ku lepe i mugu ilo, ti lu agbi’diki ku Yesu i mukuzini‚ ti asozu mugu ku bongola, ti kpinyi kine gbo’di ayeŋundra a na’bu. Kuwade ko druga kukuze. 36Ŋutulu laga aboŋu lepe kilo druga trukokindro ko kulia ti toruwe na ŋutu laga ku dreria loro i mugulo. 37Ŋutulu giri laga i nu ka na Geregesene i laga yu kilo druga takindra Yesu adi ti lepe pilarani kaŋo kase kani, igbonaga ko gbo ku kuze koruna. Lepe druga lubo i ki’bo kata yu druga yitozi bo. 38’Bo ŋutu laga ma dreria lupodri ku lepeni ilo druga sonyodru lepe druga kulia adi, 39“Yitozini konu ’ba yu, ’bo kekenadri kulia naga a drumala ma Ŋun kondri konuni kine.” Lepe druga pilara we yu i trukodru i kezi kata yu giri kulia drumala naga ma Yesu konakindri nye kine. 40Nyenaga ku Yesu laga ayite, mongoyo na ŋutuluna amomorani lepe ku nyola koru, igbonaga ko giri kulu momondru lepeŋa ina. 41Nyenaga le’de ŋutu druga yeŋundra ku lepeni, kari ti lepe kine se naga Yairo, lepe a druma lo kadi naga a momore nu, druga mereke ka ku Yesu i mukuzini i ma’yu na lepe adi ti utuni kanye ’ba yu, 42igbonaga lepe lu ku pilili nanye na ŋiro ’diye, naga a na kiŋazi mere gele konye mure, ma nu ’do’doro. ’Bo ku Yesu laga ilo i utu, ŋutulu kilo ariri’diza lepe. 43Nyenaga ne’de noka nu yu de, naga rima kine awonu ku lepe i mugu yu kiŋazi mere gele konye mure ina. Lepeŋa aleŋi kapazi kanye kilo giri i ’bunikoni, ’bo le’de ŋutu ’bayi laga lo romoki toruzo lepeŋa. 44Lepe druga pondra ku Yesu i ki’di, druga ’bo’yu merete lo lepe lo bongolo, kuwade wuleŋa gele wonu na rima ti lepe kinena druga gbigbisa. 45Yesu druga piza adi, “Ŋa lo ’bo’yu na ya?” Ŋutulu kilo kuwa laga arenya giri, Petero druga kulia adi, “Katogoloni, mongoyo ti ŋutulu kilo kilo riri’diza do, riorioga do itro.” 46Yesu druga kulia adi‚ “Ŋutu le’de a’bo’yu na, igbonaga na adeni adi teriŋi alupodru kuwe muguni ina.” 47Kuwade kugbo noka ŋanina naga amedra adi nye ani romoki mumuza mugu tro, lepe druga pondra ku zangu na mugu itro, druga mereke ka ku Yesu i koŋoni i trukokindro ku ŋutulu giri i koŋoni kulia naga ma nye ’bo’i Yesu kine, ku toruwe nanye naga wuleŋana. 48Yesu druga takindra lepe adi, “Ŋirona‚ rugo nonuna atoruzo do‚ pilarani ku teili lo trotro.” 49Ku Yesu ilo inga kukulia, ŋutu le’de lo kadi na drumalo druga pondra, druga takindra Yairo adi, “Ŋiro nonuna a’doro. Ku sasanyi Katogolonilo ’do kuru.” 50Yesu ku yingi de‚ druga teyitokindro lepeŋa adi‚ “Ku kukuze‚ ’bo gbo’di ku rugo ayu‚ lepeŋa itotoruwe.” 51Kugbo lepe laga alubo kadi yu, lepe aku rukodru le’de ŋutu i lubo seku nye, ŋo kilo ku Petero, Yoane, Yakobo, ku monye lo ŋirona seku ŋotena ’du. 52Ti ŋutulu giri kulu gbigbiye, kulu luluzo luluzo lepe‚ ’bo Yesu druga takindra ko adi‚ “Ku gbigbiyeta, lepe aku ’doro‚ lepe ina tototo.” 53Ko druga zonya lepe‚ igbonaga ko adeni adi ŋirona a’doro ina. 54’Bo Yesu druga ’deba ŋirona ku keni‚ druga lungu lepe adi‚ “Ŋirona‚ ŋine.” 55Yuka na lepena druga yite i piri‚ lepe druga ŋiŋiye wuleŋa gele‚ Yesu druga takindra ko adi‚ ti ko tiki lepe nyosu. 56’Bo kayuŋo ti lepe kilo arambu ’beri koru‚ Yesu druga takindra ko kukuzu adi ka’bi ko ku kekenaki kekenaki le’de ŋutu kulia na kondra ’beri kine de.

will be added

X\