LUKA 5

1Kugbo mongoyo na ŋutulu kilona amuluzu Yesu i yinga na kulia ti Ŋun kine‚ ti lepe lu alira i kuti lo suburi laga Geneserete ilo yu. 2Lepe druga medra ki’bolo mure ti kunu suburi i kutu yu. Ti derengi kareka ti somo kilo alupodru kaŋo i lalazu na birazi kase kine. 3Druga lepe kiyadru i ki’bo gele naga a na Simona ina kata yu‚ druga takindra lepe adi ti lepe temizoro ki’bona ’baziŋadroo kide yu. Lepe druga gbi’diki ka i togo’yu na ŋutulu kilo i ki’bo kata yu. 4Nyenaga kugbo lepe laga ako’yu trugona, lepe druga takindra Simona adi‚ “ ’Dotoro mugu i piri naga a naguluna kata yu‚ ’bo sooro birazi konu kine regi somo.” 5Simona druga teyitokindro lepe adi‚ “Katogoloni‚ yi atrereka wari kpe‚ yi aku ’dumundra le’de ŋo! ’Bo kuru ku kutu nonuna na isosoodoru birazi kine.” 6Ku ko laga akondra de‚ ko druga tunundra somo kilo rodri koru‚ atikindra kodro birazi kasiko kine agiginyiza. 7’Bo druga ko kotundra worisi kase laga i ki’bo ne’dena kata yu kilo‚ i pondra i logu na se. Ku ko laga apondra ko druga tozodru ki’bolo kine mure katru‚ druga ko poki i ’diroro i pio kata. 8Kugbo Simona Petero laga abonga de‚ lepe druga mereke ka ku Yesu i mukuzini‚ druga kulia adi‚ “Mata‚ ŋiyoro kuwe lagani kaŋo po‚ igbonaga na a ŋutu loro ina.” 9Lepe druga rambu ’beri koru ku ŋutulu giri laga lo saka kasi ko kilo‚ ku kulia ti somo laga ma ko rekundri kilo. 10Ku Yakobo seku Yoane laga a ŋazi ti Zebedayo, lo mora seku Simona i kita kilo‚ druga rambu ’beri itro. Yesu druga takindra Simona adi‚ “Ku kukuze. Ŋiyoro tinade do igbo’da a katunani lo ŋutulu.” 11Kugbo ko laga azondra ki’bolo kase kine i kuti kaŋoni‚ ko druga ko’yu kapa kilo giri druga kepodru Yesu. 12Ku Yesu laga lu i ne’de kezi kata‚ ŋutu laga anyei ku rima apondra ku lepeni. Ku lepe laga abonga Yesu‚ lepe druga mereke rupu ku lepe i koŋoni‚ druga ma’yu mugu ku lepe adi‚ “Mata‚ ku do anyari‚ do roromoki toke’ya na.” 13Yesu druga riodru keni lonyelo, druga ’bo’yu lepe adi‚ “Na anyari‚ gbo’di a lokiye.” Wuleŋa gele rima kine druga koko lepe. 14Yesu druga takindra lepe kukuzu adi‚ “Ku trutrukoki le’de ŋutu‚ ’bo uti ku kpene mugu ku ka’i’ilanilo i koŋo yu‚ ’bo tiki ’doke lo tokelani dolo‚ beti naga ma Mose tazi kukuzuna ina‚ a kpiye ku ŋutulu kilo yu.” 15’Bo kpe‚ kulia ti lepe kine druga kuworo woo mu kana. Mongoyo kilo druga more kugele i yinga na lepe ku toruwe na se ku tatuwa kase kinena itro. 16Lepe druga ŋiŋiyoro kasiko i lagani i utu i diŋo kata yu i magu na Ŋun. 17I luŋa le’de ti Yesu lu i togo’yu, ti Farisayo kilo ku katogolo ti kukuzuna lo ŋiyu i ’beŋito giri laga Galili ku Yu­daya yu kilo‚ ku lo ŋiyu Yerusalema yu kilo agbi’diki yu de. Ti teriŋi na Matalona ina ku Yesuni i toruzo na ko. 18’Bo ku’de ŋutulu a’dukundro ŋutu le’de laga a liwalo ku pari. Ko druga ga’yu kiko lo tolupozini ŋutu ŋanilo ku topirikini lepe ku Yesu i koŋo yu. 19Ku ko laga aku rio kiko lo tolupozini lepe ku Yesu yu ku kulia ti mongoyona kine‚ ko druga kiyadru i kadi ki yu‚ druga ŋandru lo’delo, druga ko soodru lepe ku parina itro i dridriŋi na tegulana ku Yesu i koŋo yu. 20Kugbo Yesu laga amedra rugo nasikona, lepe druga kulia adi‚ “Maratelo, torozi konu kine a’diya.” 21Druga katogolo ti kukuzuna kilo ku Farisayo kilo poki i pipiza na ’beri adi, “Ilo a ŋa lo tazu kulia na momoreyini Ŋun de? Ŋa lo romoki i ’diza na torozi, ani gbo’da a Ŋun ka’delo ya?” 22Ku Yesu laga adeni pipiza nasiko na ’berina, lepe druga teyitokindro ko adi, “Ta pipiza ’beri de kasu teilikoni gbandra ya?” 23Kulia naga ya naga gbo pa’de’de‚ ŋona i tayi adi‚ ‘Torozi konu kine a’diya‚’ kugbo ŋona i tayi adi, ‘Ŋine‚ woroni’ ya? 24’Bo deneta adi Ŋiro lo ŋutulo gbo ku teriŋi i kani i ’diza na torozi.” Lepe druga takindra ŋutu laga ku mugu a liwalo adi‚ “Na takindra do‚ ŋine‚ ’dokoro pari nonuna‚ utini i ’ba.” 25Wuleŋa gele ŋutulo druga ŋiŋiye kasiko i koŋoni‚ lepe druga ’dokodru pari naga kedri ma lepe pirikini kinina‚ druga pilarani i ’ba yu i pudya na Ŋun. 26Ko giri druga rambu ’beri‚ druga pudya Ŋun‚ druga kukuze koru‚ ko druga kulia adi‚ “Indikinina yi amedra kulia naga ka’de.” 27I bo ŋanina Yesu druga lupodru kaŋo yu‚ druga ku bonga kawuroni lo mosoro‚ kari ti lepe kine se naga Levi‚ ti lu agbi’diki i piri naga a wure na mosorona i kutu yu. Lepe druga takindra lepe adi‚ “Keporo na.” 28Levi druga kolokindro kapa kilo giri druga ŋiyoro i kepodru na Yesu. 29Levi druga ’delakindra Yesu tokomona a druma kanye ’ba yu. ’Bo mongoyo na kawuro ti mosoro kilo rodri ku ku’de kilo ŋutulu druga gbi’diki i nyosu kutu yu kasi ko. 30Druga Farisayo kilo ku katogolo kasiko ti kukuzuna kilo ngunguruto ngunguruto ku lotodiniki ti Yesu kilo adi‚ “Ta nyosu‚ ta mozu ku kawuro ti mosoro ku katoronya kilo kugele gbandra ya?” 31Yesu druga teyitokindro ko adi‚ “Ŋutulu laga ku ’beri a lo’bu kilo ani miyundro ’buni tro‚ ’bo ŋutulu laga ku ’beri na mimiye kilo se lo miyundro. 32Na agbo’da pondra ku lungu ŋutulu laga mŋgba kiloni‚ ’bo ŋutulu loro kilo ti lopuke ’beri.” 33Ko druga piza lepe adi‚ “Lotodiniki ti Yoane kilo kukuka mu luŋazi‚ ko magini Ŋun‚ ’bo lotodiniki ti Farisayo kilo kondra de itro‚ ’bo kolu kilo nyonyosu‚ momozu gbandra ya. 34Yesu druga teyitokindro ko adi, “Ta roromoki kolokindro otalaki laga i tokomona na ’depani noka i kuka ti ka’depanilo ilo kasi ko kugele ya? 35Luŋa ku’de laga ma ka’depanilo ku ’dumazini kasiko i dridriŋini kilo iyeyeŋundra, ko bulo kukuka i kulu luŋa de.” 36Lepe druga trukokindro ko kulia na guguma itro‚ adi‚ “Le’de ŋutu ’bayi lo kenyundra ’diye na bongo naludu druga ku ’dizi naŋoru. Ku lepe kondra de‚ lepe ikekenyi naluduna‚ ’bo ’diye na bongo naluduna ’baka kpele i naga a naŋorunani. 37Le’de ŋutu ’bayi lo ’bugo suwe ti konye ti zabibu naga a pupu kine i ’dereŋa loŋoru kata. Ku lepe kondra de‚ suwe ti konye ti zabibu naga a pupu kine itotopu’du ’dereŋa ŋani kilo kaŋo ’bo iwowonu ka. Kuwade ’dereŋa kilo ikokorozu kokorozu itro. 38’Bo suwe ti konye ti zabibu naga a pupu kine nyadru ti ’bukoni i ’dereŋa laga a loluduko kilo kata. 39Le’de ŋutu laga kuwa amozu suwe ti konye ti zabibu naga a ko’do kine aka nyadru naga a pupu kineni, igbonaga lepe adi‚ ‘Ko’do kine naga a na’bu!’ ”

will be added

X\