LUKA 3

1I kiŋa laga a togi mere gele konye mukana lo ’debini Tiberio Kaisari kanalo‚ ti Pontio Pilato laga a lo’bizo lo Yudaya‚ ti Herode lo gbo a mata lo Galili‚ ’bo luŋase lo lepe laga Filipo laga a mata lo Ituraya seku Trakoniti‚ ti Lusania a mata lo Abilene, 2ti ku Ana seku Kayafa kondra kita na ka’i’ilani laga a leŋgberelo, kulia ti Ŋun kine ayeŋundra ku Yoane laga a ŋiro lo Zakarialo ti lu i diŋo kata yu. 3Lepe druga woro i kazi naga i kare laga Yorodani i nyoga yu kine kata yu giri‚ i trukodru na kulia ti baputizi lo kpeza lopuko na teiliko ma torozi kine ’di’diya ilo. 4Be naga ma wuroni ku kakeyoni Isaya i buku katanina adi‚ “Roro lo ŋutu lo laiza i diŋo yu‚ adi‚ Kukuneta kiko lo Matalo‚ 5Golotoki kilo giri itotozore, ’bo meria kilo ku tupula kilo itetemize ka‚ ’bo pirito ŋaga a drodrolozu kine iririo gbogbo‚ druga kikoli laga a drilio drilio kilo i’buko soso‚ 6’Bo ŋutulu ti ka kilo giri imemedra ritundro na Ŋun ina.” 7Lepe druga takindra mongoyo ti ŋutulu lo pondra ku lepeni i ’deba na baputizilo kilo adi‚ “Ta a ŋazi ti ’boro’boro! Ŋa lo trukokindro ta adi wokinita ku ŋoma na ipondra ina ya? 8Kuwade radanita konye laga lo kpeza lopuko na teilikokilo‚ ’bo ku ’do’doluta tazu kasu teilikoni adi‚ ‘Abarahama a monye lika.’ Na takindra ta a ’diri‚ Ŋun roromoki toŋizu kilo ŋoropo de a ŋazi ti Abarahama. 9Tinade tululo ilo a’delaki i kade mukotoni azo. Kade giri laga ani rada konye a lo’bu kilo itrotroko ka‚ ibibiriŋo i kima.” 10Druga mongoyo kilo piza lepe adi‚ “Kuwade ma yi kondra inyo ya?” 11Lepe druga teyitokindro ko adi‚ “Ŋutu laga ku kotilo murelo ti lepe tikindri ŋutu laga ’ba kotilo ne’dena, ’bo ŋutu laga ku nyosulo, ti kone de ’do.” 12Kawuro ti mosoro kilo druga pondra ku lepeni i ’deba na baputizilo, druga piza lepe adi‚ “Katogoloni, laga yi‚ ma yi kondra inyo ya?” 13Yoane druga teyitokindro ko adi‚ “Ku tutunuta mosorolo alangu laga ma sarakini talo.” 14Katiyu kilo druga piza lepe adi‚ “Laga yi‚ ma yi kondra inyo ya?” Yoane druga teyitokindro ko adi‚ “Ku kokonuta budru ku le’de ŋutu. Ku sosota kulia ti to’bure. Ti rope lasulo romokini ta ayu.” 15Kugbo ŋutulu kilo kulu i momondru kulia kine ku puso‚ ko giri ti kulu i pipiza kase i teiliko yu kulia ti Yoane kine‚ adi ŋona lepe a Kristo. 16Yoane druga teyitokindro ko giri adi‚ “Laga na‚ na tikindra ta baputizilo ku pio‚ ’bo ŋutu laga ku teriŋi alangu na ilo‚ ilo ipondra, laga na ani romoki i lagu na pata na kamuka ti lepe kine. Lepe itikindra ta baputizilo ku Yuka Nakiyena ku kima itro. 17Sete lo lepelo ilo ku lepe i kenini. Lepe irere purugi nanyena a nakiye‚ lepe i’bu’bugo konye ti kinyo kilo i gugu lonyeloni, ’bo lepe itotonyoro puta kine ku kima naga ani tatuwina.” 18Kuwade Yoane amamalazu mugu ’do ’do koru i trukokindro na ŋutulu kilo kuu na’buna. 19’Bo Herode laga a mata‚ lo ririŋi Yoane ku kulia ti Herodia naga a noka na luŋase lonye‚ ku kuliata naro giri naga ma lepe kondri kinelo‚ 20nyelo kondra kulia naga a naro arodru kine‚ igbonaga lepe atodya Yoane i kadi naga a drodrorena kata yu ina. 21Ŋutulu kilo kuwa a’deba baputizilo giri‚ ’bo kugbo Yesu laga a’deba baputizilo itro‚ ti lu i magu na Ŋun‚ ’dikona druga ŋaŋa mugu. 22Yuka Nakiyena druga kiyundra kani ku mugu ku lepe kini‚ beti a’buguti, ’bo roro le’de druga kuu i ’diko yu adi‚ “Do a Ŋiro lio laga ma na nyadrilo, na anyola koru ku do.” 23Yesu ma sulukindri kita nanyenana‚ ti kiŋazi ti lepe kilo gbo’di beti meria musala. Kuwade ŋutulu kilo arambu adi lepe a ŋiro lo Yosefa‚ ŋiro lo Eli‚ 24ŋiro lo Matata, ŋiro lo Levi‚ ŋiro lo Meleki‚ ŋiro lo Yanai‚ ŋiro lo Yosefa‚ 25ŋiro lo Matatia‚ ŋiro lo Amosa‚ ŋiro lo Nahuma‚ ŋiro lo Eseli‚ ŋiro lo Nagai‚ 26ŋiro lo Maata‚ ŋiro lo Matatia, ŋiro lo Semeina, ŋiro lo Yoseke‚ ŋiro lo Yoda‚ 27ŋiro lo Yoanana, ŋiro lo Resa‚ ŋiro lo Zerubabeli, ŋiro lo Salatieli, ŋiro lo Neri‚ 28ŋiro lo Meleki‚ ŋiro lo Adi‚ ŋiro lo Kosama‚ ŋiro lo Elimadama, ŋiro lo Eri‚ 29ŋiro lo Yosua‚ ŋiro lo Eliezeri, ŋiro lo Yorima‚ ŋiro lo Matata‚ ŋiro lo Levi‚ 30ŋiro lo Simeona, ŋiro lo Yuda‚ ŋiro lo Yosefa‚ ŋiro lo Yonama‚ ŋiro lo Eliakima, 31ŋiro lo Melea‚ ŋiro lo Mena‚ ŋiro lo Matata‚ ŋiro lo Natana‚ ŋiro lo Dawidi‚ 32ŋiro lo Yese‚ ŋiro lo Obede‚ ŋiro lo Boaza‚ ŋiro lo Sala‚ ŋiro lo Nasona‚ 33ŋiro lo Aminadaba, ŋiro lo Adamina, ŋiro lo Arini‚ ŋiro lo Hezerona‚ ŋiro lo Perezi‚ ŋiro lo Yuda‚ 34ŋiro lo Yakobo‚ ŋiro lo Isaka‚ ŋiro lo Aburahama, ŋiro lo Tera‚ ŋiro lo Nahori‚ 35ŋiro lo Seruga‚ ŋiro lo Reu‚ ŋiro lo Pelege‚ ŋiro lo Eberi‚ ŋiro lo Sala‚ 36ŋiro lo Kainana, ŋiro lo Aripakasada, ŋiro lo Semi‚ ŋiro lo Noa‚ ŋiro lo Lameke‚ 37ŋiro lo Metusela, ŋiro lo Enoka‚ ŋiro lo Yarede‚ ŋiro lo Mahalaleeli, ŋiro lo Kainana, 38ŋiro lo Enosa‚ ŋiro lo Sete‚ ŋiro lo Adama‚ laga a ŋiro lo Ŋun.

will be added

X\