LUKA 23

1Momore na ŋutulu na tunundra ’berina druga ŋiŋiye giri, i zonga na Yesu ku Pilato i koŋo yu. 2Ko druga poki i sosozu na kulia ku lepe i muguni adi, “Yi arumbi ilo ŋutu de i kokorozu na zuru likalo, ku i gokindra na ŋutu kilo adi ka’bi ko ku titiki Kaisari mosorolo‚ ’bo lepe adi nye lepe laga Kristo laga a matalo.” 3Pilato druga piza lepe adi‚ “Do lepe laga a mata lo Yahudilo ya?” Yesu druga teyitokindro lepe adi‚ “Do akulia ’do.” 4Pilato druga takindra ka’i’ila drumala kilo ku mongoyo ti ŋutulu kilo adi‚ “Na aku rio toro ku ilo ŋutu deni.” 5Ko druga ’damaazu kulia ku teriŋi adi‚ “Lepe akokoro ŋutulu kilo ku togo’yu nanyena Yudaya katani giri‚ ŋiyu Galili yu yeŋundra tozo i ina piri de katani itro.” 6Ku Pilato laga ayinga de, lepe druga piza ŋona kugbo ŋutu ŋanilo a lo Galili. 7Kugbo Pilato laga adeni adi Yesu lu ŋiyu i ka na Herodena, lepe druga sonyodru lepe ku Herode yu‚ ti Herode lepe lu Yerusalema yu i lu luŋa de. 8Ku Herode laga abonga Yesu, lepe druga nyonyola koru‚ igbonaga luŋa rodri lepe aga’yu medra na Yesuna igbonaga lepe ayi kuwe na lepeŋana‚ lepe yendru bonga na kpiye lo konu lepelo. 9Kuwade lepe apipiza Yesu ku kuliata rodri‚ ’bo Yesu nanye aku teyitokindro lepe kulia tro. 10’Bo ka’i’ila drumala kilo ku katogolo ti kukuzuna kilo alira i sosozu na lepe ku teriŋi. 11Herode ku katiyu kanye kilo druga ’da’dari lepe druga zonya lepe‚ druga sozu lepe ku bongo naga a namunya, bulo sonyodru lepe bo ku Pilato yu. 12Ku Herode seku Pilato druga yeŋundra a worisi i lu luŋa de‚ ti kazu ko a mero. 13Pilato druga lungu ka’i’ila drumala kilo ku drumala ti ka kilo ku ŋutulu kilo kugele‚ 14druga takindra ko adi‚ “Ta azondra ilo ŋutu de kuweni beti ŋutu laga akokorozu ŋutulu‚ ’bo ma na lilizi kulia ti lepe kine kasu koŋonina, na aku rio toro na lepe geleŋa tro be naga ma ta sosozi lepena. 15’Dibani Herode lepe aku rio kulia‚ nyena sunyundri lepe bo kayani. Meteta‚ kulia naga na ŋerakini lepe tuwa de ’bayi. 16Na kuru ikpikpinyi lepe‚ na bulo lakadru lepe.” [ 17’Bo i lu kolo druma de kata yu‚ nyadru ti lepe lakaki ko le’de ŋutu. 18’Bo ko giri druga reresa kugele adi‚ “Telikioro ilo ŋutu de kaŋo‚ lakaki yi Baraba ayu.” 19’Bo Baraba ŋanilo a ŋutu lo tora i drodrore ku kulia ti wakundra na moro i kezi katani‚ ku kulia ti rembuna itro. 20Pilato druga takindra ko kulia ’do igbonaga kodro nyadru lakadru Yesu kaŋo ina. 21’Bo ko druga resa ku teriŋi adi‚ “ ’Beke lepe i kedini mugu‚ ’beke lepe i kedini mugu.” 22Gbo’di i togi musalani Pilato druga piza ko adi‚ “Gbandra, lepe akondra toro naga a inyo ya? Na aku rio toro geleŋa na ŋerakini lepe tuwa. Na ikpikpinyi lepe ma na bulo lakadru lepe.” 23’Bo ko druga resa ku roroto laga ku teriŋi adi ti ’bekoni ’beko i kedini mugu. Roroto kasiko kilo druga se lo rodru. 24Pilato druga ŋerakindra adi ti gbo’dini be naga ma ko magini. 25Lepe druga lakadru ŋutu lo drodrora ku kulia ti wakundra na moro ku ti rembuna itro, laga ma ko magilo‚ ’bo lepe atikindra Yesu kasiko i nyadruni. 26I naga ma ko zongini Yesuna‚ ko druga moga Simona laga lo Kurenelo ti lu pondra i diŋo. Ko druga tekindro kedini lo ’bekoni Yesu ilo ku lepe i kidini‚ adi ti lepe ’doke lepe ku Yesu i boni. 27Mongoyo na ŋutulu rodri ti kulu i kepodru lepe, ku wate na zozoga gedyoki kase ku na luluwodru ku lepe i boni kine. 28Yesu druga lopukozi kasiko yu, druga takindra ko adi, “Ke’diti ti Yerusalema kine, ku gbigbiyeta na, gbineta ’beri ku ŋazi kasu kilo ayu. 29Meteta, luŋa kilo kilo ipondra lo ku kuliani ko adi‚ ‘Koŋo na’buna ina i wate naga a undoa‚ ku pelela naga aku yuŋundro‚ ku kinatazi laga aku naka!’ 30I lu luŋa de‚ ko ipoki i takindra na meria kilo adi, ‘ ’Duuta kaya kini‚’ ku tupula kilo adi, ‘Muketa yi.’ 31’Bo kugbo ko lo kondra kulia naga be kine de kine ti kedinilo a lodo, kugbo atetio‚ ko ikondra kulia naga a inyo ya?” 32Ŋutulu ku’de mure laga akondra toro kilo druga zoŋa kasi Yesu kugele i tatuyi yu. 33Ku ko laga ayenga i piri na luŋu a Lele na kuwena kata yu‚ ko druga ’begu Yesu yu de, kasi ŋutu laga akondra toro kilo kugele, le’delo i go lo lutatelo‚ le’delo i go lo kaduŋelo. 34Yesu druga kulia adi‚ “Monye lio‚ ’dine torozi kasiko kine‚ igbonaga ko aku deni ŋo laga ma se kondri ilona.” Ko druga kodya bongola ti lepe kine ku gumba na zege. 35Ŋutulu kilo druga lilira i bonga, ’bo drumala kilo druga ’da’dari lepe adi‚ “Lepe kazu ritundro ku’de kilo ŋutulu‚ ku lepe laga a Kristo lo Ŋun‚ laga ma lepe gelulo, ti lepe ritu mugu ku mugu ke!” 36Katiyu kilo druga pondra i zonya na lepe itro. Ko druga tikindra lepe suwe ti konye ti zabibu naga potroru kine. 37Ko druga kulia adi, “Ku do laga a mata lo Yahudilo, ritu mugu!” 38’Bo wure awuro ku lepe kine adi, “Ilo de a Mata lo Yahudi ilo.” 39Le’de ŋutu lo kondra toro lo ’beko kasi lepe kugele ilo druga motizo lepe adi, “Do ani gbo’da a Kristo ya? Ritu mugu ku yi itro.” 40Le’delo druga ringa lepe adi, “Do ani kuga Ŋun, ti do lo i ŋera ki kulia nagele kine de katani itro ya? 41Laga yi, yi aŋeraki kulia kaya kine soso, igbonaga yi rumbi rope likalo ku kulia naro naga ma yi kondri kine ina, ’bo ilo ŋutu de aku kondra toro uye.” 42Lepe druga takindra Yesu adi, “Yesu, yole na ku do ma lu ayenga konu tumata yu.” 43Yesu druga teyitokindro lepe adi, “Na takindra do a ’diri, solona do igbogbo’da seku na i piri na’bu koruna kata yu.” 44Ti gbo’di beti tupara kide kana giri druga sosomuko yeŋadru tozo i lu’balaŋa, 45ti kolona amuko, druga bongo na kadi na Ŋun ina kekenyi mugu mure. 46Yesu druga resa ku roro laga gboŋa adi, “Monye lio, na akolokindro yuka niona gbo’di konu keni!” Kugbo lepeŋa laga akulia de, druga ’do’doro. 47Kugbo druma lo katiyu kama gelelo laga abonga kine kulia de, lepe druga pudya Ŋun, adi, “A ’diri ilo ŋutu de a ŋutu laga mŋgba!” 48Mougoyona giri na pondra i medra na kine kulia de kilo ku ko laga abonga kulia na kondra ’beri kine de, ko druga yitozi i ’beŋi yu ku zoga na gedyoki kase kine. 49Ŋutulu lo dendra lepe kilo giri ku wate na kipundro lepe, Galili yu kine, ko alira pazo yu i medra na kine kulia de. 50Ti le’de ŋutu lu yu de nye laga Yosefa lo kezi na Yahudi naga Arimataya, lepe a ŋutu laga a kayoloni lo kuliata, a ŋutu lo’bu, 51’bo lepe aku rugo lopete lo kayolo ti kuliata kilolo ku kone lasikolo itro, lepe lu momondru tumata na Ŋun ina. 52Ilo ŋutu de druga utu ku Pilato yu i magu na opu lo Yesulo. 53Lepe druga ’dukundro opulo kani, druga todya lepe ku bongo nakpe, druga ’delakindra lepe i kugi na mere naga aluluto a gulo ina kata yu, i piri naga inga le’de ŋutu aku nukani kata yu ina. 54Lu luŋa de a luŋa lo kukunani kapazi, ti luŋa lo sabatolo gbo’di nyoga. 55Wate na kipundro Yesu kazu Galili yu kine druga kepodru i boni, 56ko druga yitozi bo yu i kukundra na kapazi lo ŋmwa sisisi ku weleta itro. I luŋa lo sabatolo wate kine druga yuyuka be naga ma kukuzuna nyadrinina.

will be added

X\