LUKA 22

1Nyenaga kolo druma na nyeini mugati naga ’ba kape naga na luŋu a Rosetona ayeŋundra nyogoŋa. 2Ka’i’ila drumala kilo ku katogolo ti kukuzuna kilo druga ga’yu kiko lo tatuwini Yesu‚ ’bo ko akuze ŋutulu kilo. 3Satani druga lubo ku Yuda lo luŋu a ŋutu lo Kariotalo i teili yu, lepe ilo i dridriŋi na ŋutulu laga mere gele konye mure kilo. 4Lepe druga tu i tomodya na kutuzi ku ka’i’ila drumala kilo ku drumala ti katiyu kilo itro, ku kiko laga ma lepe ku tikindri Yesu kasiko yu. 5Koŋa druga gbo ku nyola, druga ŋerakindra lepe tiki na lepe riye. 6Lepe druga rugo, druga ga’yu baŋe na’bu na tikini Yesu kasiko yu, ti mongoyo na ŋutulu kilona ’bayi. 7Nyenaga kugbo luŋa lo nyeini mugati naga ’ba kapenalo laga ayeŋundra, laga a luŋa laga bita ma ko ’dungini torila ti kebilizi laga a ti Rosetona kilolo, 8Yesu druga sonyodru Petero seku Yoane adi, “Utita ku kukunakita yi nyosu na Rosetona, ma yi ku nyosu.” 9Ko druga piza adi, “Do nyadru ku yi kukune yeda ya?” 10Lepe druga teyitokindro karaŋa adi, “Boŋeta, kugbo ta laga alubo kezi yu, ta imomora ku le’de ŋutu laga lo ’dokodru soŋgbo lo pio. Keporota bo na lepena i kadi naga ma lepe lubi kata yuna. 11Ta itakindra monye’balo adi, ‘Katogolonilo adi, Kadi na komona nye naga ya ya, piri naga ma na ku nyosuni Rosetona ku lotodiniki kuwe kilona ya?’ 12Lepe ikpekindra ta kadi druma naga ki yu naga akukuna ku kapazi girina. Kukuneta kapazi kilo yu de.” 13Koŋa druga utu, druga rumbi kulia kine beti naga ma lepe takindri kona. Ko druga kukundra Rosetona. 14Luŋalo ku ayeŋundra‚ Yesu druga gbi’diki ku lososonyo kanye kilo i mesa kutu. 15Lepe druga takindra ko adi, “Na gbo ku puso koru i teilini i nyosu na ina Rosetona de kasi ta kugele, ti inga na aku sasanya. 16’Bo na takindra ta, na inga aka nyosu ’doni ti inga kulia kine aku kondra ’beri i tumata na Ŋun ina kata yu.” 17Lepe druga ’dumundra drikerina, druga tikindra iyetelo, druga kulia adi, “ ’Dumarata ina de, koreta kine de kasu dridriŋini. 18Na takindra ta adi na aka mozu suwe ti konye ti zabibu kine ’doni, ti inga tumata na Ŋun ina aku yeŋundra.” 19Druga lepe ’dumundra mugatina, kugbo atikindra iyetelo, lepe druga gbegbenyeza katana, druga tikindra koŋa, kulia adi, “Ina de a mugu nio [naga ma na tikindri ku tana. Koneta kine kulia de ma ta rambini kulia kuwe kine.” 20’Bo ’do i bo na nyosuna lepe druga ’dumundra drikerina, druga kulia adi, “Ina drikeri de a tomore naludu naga kuwe rima naga na wonu ku ta kine katanina]. 21’Bo boŋeta, keni lo ŋutu lo nyokindro na mundraralo ilo seku na i mesa ku tuni. 22Ŋiro lo ŋutulo ilo tu i kiko laga ma nyumokinilo, ’bo dreliana ina i ŋutu laga lo nyokindro lepe mundralo!” 23Koŋa druga poki i pipiza na ’beri adi ŋutu laga ŋa lo ikondra kine kulia de ya. 24Nyenaga kulia kine alupundro a rerenyeta kasiko i dridriŋini adi ŋutu laga ŋa kase dridriŋini lo iyolo a druma koru. 25Yesu druga takindra ko adi, “Mataki ti Monyazi kilo bita ’deba tumatana kasiko i koŋoni ku teriŋi, ’bo ka’dola kasiko ti kuweto kilo luŋu a ŋutulu lo kondra ko a lo’bu. 26’Bo ani gbo’da de kasuni. ’Bo kugbo le’de ŋutu laga a druma kasu dridriŋini, ti lepe gbo’dini beti ŋiro lo bo. Kugbo ŋutu laga a ka’dolani lo kuwe, nyadru ti lepe gbo’dini beti kalokoni. 27Ŋa laga a druma, ŋutu laga lo gbi’diki i mesa kutulo, kuwa kalokonilo ya? Ani gbo’da ŋutu lo gbi’diki i mesa kutulo ya? ’Bo na ilo kasu dridriŋini beti kalokoni. 28“ ’Bo ta gbo a ŋutulu laga lo saka seku na i modruzi kuwe kine katani kilo. 29’Bo na agelakindra ta tumatana be naga ma Monye lio gelakindri na ina, 30ma ta ku nyosuni, ku mozu i mesa niona i tumata niona kata yu, ma ta ku gbi’diki i si’deta i ŋedya na kulia ti ketimito ti Isiraeli naga mere gele konye mure kine. 31“Simona, Simona, boŋe! Satani amakundra ta i sedra na ta beti kinyo, 32’bo na laga amulukindro do adi rugo nonuna ka’bi ku ’du’duki tro. Ku do laga alopugo teili, toliraki luŋaseri kolu kilo.” 33Petero druga kulia adi, “Mata, na akukundra mugu i utu seku do kugele i drodrora yu kuwa i tuwa.” 34Yesu druga teyitokindro kpe adi, “Na takindra do Petero, solona ti inga sukuri ilo aku sira, do irerenya luŋa musala adi do aku deni na.” 35Yesu druga piza ko adi, “Kazu ma na sondri ta ’ba uŋgboloko, ’ba zuru, ’ba kamuka, ta ayaŋa ku le’de ŋo?” Karaŋa adi, “ ’Bayi.” 36Lepe druga kulia adi‚ “Ŋutu laga ku uŋgboloko lonyelo‚ ti ’dumara‚ ku zuru itro‚ ŋutu laga ’ba wale lo moro ilo ti togbore bongo nanyena, ti gborundri wale. 37’Bo na takindra ta‚ kine kulia naga awuro de kine ikokondra beri kuwe muguni adi‚ ‘Lepe akena i dridriŋi na katoronya kilo,’ igbonaga kulia na wuwuro ku na kine ikokondra ’beri kase piritoni ina.” 38Ko druga kulia adi, “Mata, mete‚ walia mure ma kilo de.” Lepe adi, “Gbode, aromoki!” 39Kuwade Yesu druga lupodru, druga tu i mere laga Oliva yu beti naga bita ma lepe kondri ina. ’Bo lotodiniki kilo akepodru lepeŋa itro. 40Kugbo lepe laga ayeŋundra i piri ŋanina, lepe druga takindra ko adi, “Magita magu‚ ka’bi ta ku lubo i luluka kata.” 41Druga lepe ’dotodru mugu ku ko ŋeroŋa ŋoru dridriŋi na biriŋozini ŋurupi‚ druga lepe ruguŋo ka‚ i magu adi, 42“Monye lio, ku do anyadru, ’dotoro ina drikeri na kulia na potroru ina de kuweni kaŋo. ’Bo ku kokonu kulia naga ma na lepe nyadrini kine, ti gbo’dini be naga mo do lepe nyadrinina.” [ 43Druga malaikata le’de ŋiŋiyu i ’diko yu, druga puku ku lepeni i tikindra na lepe teriŋi. 44Ku kulia ti luŋuli laga koru kine lepe druga magu ku teriŋi arodru.] ’Bo ŋiŋiresi alupundro ku lepe i muguni beti rima na nunudru ’beri i ’do’do kani. 45Kugbo lepe laga aŋiyu i magu yu, lepe druga pondra ku lotodiniki kiloni, arumbi ko i toto ku kulia ti drelia kine. 46Lepe druga takindra ko adi, “Ta kilo tototo gbandra ya? Ŋineta ku magita ka’bi ta ku lubo i luluka kata.” 47Kugbo Yesu inga ilo kukulia, mongoyona druga yeŋundra, ti Yuda, laga i dridriŋi na ŋutulu mere gele konye mure kilolo, a’dolakindra karaŋa kuwe. Lepe druga yeŋundra nyoga ku Yesu, i nyu’ya na lepe i gbangiri. 48Kuwade Yesu druga piza lepe adi, “Yuda‚ do lo nyokindro Ŋiro lo ŋutulo mundrara ku nyu’ya na gbangiri ya?” 49Nyenaga kugbo ŋutulu laga ku Yesu i lagani kilo laga amedra kulia naga na ikondra ’beri kine, ko druga kulia adi, “Mata, ku yi moroni ku walia ti moro kilo ya?” 50Le’de ŋutu gele kasiko i dridriŋini druga dedepu suweta lo lutate lo upiye lo ka’i’ilani laga a leŋgberelo ka. 51’Bo Yesu druga kulia adi, “Kolokita inga.” Druga lepe ’bo’yu suwetalo druga kukunakindra lepe i piri. 52I bo ŋanina Yesu druga piza ka’i’ila drumala kilo, ku drumala ti katiyu ti kadi na Ŋun kilo, ku temezi lo pondra ku lepeni kilo adi, “Ta pondra ku walia ti moro, ku turia beti ŋona ku moga kolani ya? 53I naga ma na sakani kasi ta mu luŋa i kadi na Ŋun ina kata yu, ta aku sukindro kenisi i moga na na uye, ’bo tinade a kolo nasu, na teriŋi na mudena.” 54Kugbo ko laga amoga Yesu, druga zonga lepe i tolubo na lepe ku ka’i’ilani laga leŋgberelo kadi yu. Ti Petero lu ikekepodru bo na lepena pazo yu. 55Kugbo ko laga alambu kimana i kide na rii, ko druga gbigbi’diki ka kugele. Petero druga gbi’diki kasiko i dridriŋini. 56Druga ŋiro ne’de medra lepe ti agbi ’diki i parara na kima i lagani‚ druga gbuluzu lepe, druga kulia adi, “Ilo ŋutu de a lo saka seku Yesulo itro.” 57’Bo Petero arenya, adi, “Nokana, na aku deni lepe uye.” 58I bo na baŋe naŋutru ŋutu le’de druga medra lepe, druga kulia adi, “Do itro a ŋutu lasiko le’de.” ’Bo Petero druga teyitokindro lepe adi, “Maratelo, ’bayi po!” 59’Do i bo na beti sawa gele, ŋutu le’de druga kulia ’do ’do adi, “A ’diri, ilo ŋutu de a ŋutu laga seku lepe kugelelo, igbonaga lepe a ŋutu lo Galili ina.” 60’Bo Petero druga teyitokindro lepe adi, “Maratelo, na aku deni kulia naga mo do tazi kine.” Druga wuleŋa gele sukurilo sisira. 61Mata Yesu druga lopugo mugu i medra na Petero. Petero druga yo’yu kulia naga ma Matalo takindri nye kine adi, “Solona inga ti sukurilo aku sira, do irerenya na luŋa musala.” 62Lepe druga lulupodru, druga gbi koru. 63Nyenaga ŋutulu lo moga Yesu kilo druga zonya lepe, druga ’bidro lepe. 64Kugbo ko laga atodya konye ti lepe kilo‚ ko druga piza lepe adi‚ “Kewu kulia! Ŋa lo ’bidro do ya?” 65Ko druga takindra lepe kutuzi naro rodri, i momorozu na lepe. 66Ku kana naga awara, momore na temezi ti ŋutulu kilo, ku ka’i’ila drumala kilo, ku katogolo ti kukuzuna kilo, druga tunundra ’beri kugele, druga ko zonga Yesu i piri na tayini kuliatana kata yu, ko druga takindra lepe adi, 67“Ku do laga a Kristo‚ trukoki yi.” ’Bo lepe druga teyitokindro ko adi‚ “Ku na laga atrukokindro ta kpe‚ ta aka rugoni. 68Ku na piza ta, ta aka teyitokindro nani. 69’Bo ŋiyoro tinade Ŋiro lo ŋutulo ilo igbigbi’diki i keni lo lutate lo Ŋun Monyeteriŋi ilo.” 70Ko giri druga piza adi, “Kugbo gbo de, do kuru a Ŋiro lo Ŋun ya?” Lepe druga teyitokindro ko adi‚ “Ta akulia na a lepe.” 71Kuwade ko druga piza adi, “Yi nyadru kuru ’dodru ne’de na bo na kulia kine a ti nyo ya? Yi lepe ku ’beri ayi kulia kine ku lepe i kutuni.”

will be added

X\