LUKA 21

1Yesu ku boŋadri ki, druga medra korineko ti kilo i gumba na ’doketa kilo i piri na gumani riyena kata yu. 2Lepe druga medra awuzi naga a lemerina i gupakindra sente naga a na’di’diki mure. 3Lepe druga kulia adi, “Na takindra ta a’diri, ina awuzi naga a lemeri ina de agupakindra alangu ko giri. 4Kilo ŋutu de gumba kapa laga a ’doketa kilo de‚ ŋiyu i tokorine nasena katani, ’bo lepe naga a lemerina agumba kapa kanye ti telemera kilo gbu” 5Ku’de kilo ŋutulu kugbo kilo i tazu kulia ti kadi na Ŋun kine, adi akukuna a na’bu ku ŋoropo naga a na’bu na’bu kine de ku kapa laga a ’doketa kilo, Yesu druga kulia adi, 6“Kapa laga ma ta medri kilo de, luŋa kilo ipopondra, laga ta aka ku medri le’de ŋurupi lo koloki i le’de kini, laga aka truro kani.” 7Ko druga piza lepe adi, “Katogoloni, kine kulia de igbo’da nanu ya? Kpiye laga a inyo lo ikpeza adi kine kulia de gbo’di nyoga ku kondra na ’beri ya?” 8Lepe druga teyitokindro ko adi, “Gbo’dita ku konye, ka’bi kuweto kasu kine ku ’dolazi a bada. Ŋutulu rodri ipopondra ku kari kuwe‚ lo ikulia adi‚ ‘Na a lepe!’ ’bo‚ ‘Luŋalo gbo’di nyoga!’ Ku kekeporota bo nasikona. 9Ku ta yinga kulia ti moro ku ti nyaŋiliza na ’beri‚ ku kukuzeta‚ igbonaga kine kuliata de kine ipupuru a nze‚ ’bo luŋa lo ’dute na kanalo aka yeŋundra wuleni.” 10l bo ŋanina Yesu druga takindra ko adi‚ “Zuro kilo iŋiŋinye i moro ku zuro ku’de kilo‚ tumatana ku tumata ne’de. 11Dodonga na kana igbo’da a druma‚ ’bo i pirito ka’de ka’de kata magona igbo’da itro ku konyola. Kulia ti tokuzendru ku kpiyesi naga a drumala kine igbogbo’da i ’diko yu. 12’Bo inga ti kine kulia de aku kondra ’beri‚ ko imomo ta ku kenisi kase kilo i wowondru na ta‚ i zonga na ta i kadizi naga a momoreta kunu kata yu‚ ku i kadizi naga a drodroreta kunu kata yu. Ta iyeyekazi ku mataki, ku lo’bizoki i koŋo yu ku kari kuwe kine. 13’Bo kunu kulia de ilolopugo ’beri kasuni a kiko lo ’dotoni bo na kulia. 14Kuwade ’deleta kine kulia de kasu teilikoni, ku ’de’delakita teiliko a nze i kulia naga ma ta teyitundri kine tro, 15igbonaga na lo itikindra ta kutu naga a kuliena ku tobodo, naga mero kasu kilo aka roromoki lira katani i tiga na ta, kugbo i rerenya ku tanina. 16Kayuŋo kasu kilo, ku luŋaseri kasu kilo‚ ku maratezi kasu kilo‚ ku worisi kasu kilo inyokindro ta mundrara. Ko ireremi ŋutu ku’de kasu dridriŋini itro. 17Ŋutulu kilo giri iŋmoŋmo ta ku kulia ti kari kuwe kine. 18’Bo nanye kupita lasu le’de gele ’baka liki kasu kuwetonini. 19Ku ta laga alira ku teiliko ti rile‚ ta irurumbi ru nasuna. 20“Ku ta lo medra truma na Yerusalema naga ku kamoro kurumu ina‚ deneta adi karaki na lepena gbo’di ayeŋundra nyoga. 21I lu luŋa de‚ ti ŋutulu laga Yudaya kilo woki i meria ki, ’bo laga kezini kilo ti woki kaŋo, ku ŋutulu laga kaŋo yu kilo ka’bi ku lupundro katani, 22igbonaga ina de a baŋe naga a ropeta ti kulia naro naga na torumokini kulia na wuwuro kazu kine ina. 23Dreliana ina a na wate naga ku pelela kine‚ ku wate naga na tunagu ŋazi kine i kulu luŋazi de! ’Bo kulia kine iyeŋundra a riŋi i kani‚ ŋomana igbogbo’da i ilo zuru de kini. 24Ŋutulu kilo itatuwi ku walia ti moro‚ ko imomokazi i zuro giri kata yu. Monyazi kilo iroro Yerusalema ku mukuzi‚ ti inga luŋa ti Monyazi kilo aku torumoki ina. 25“Kpiyesi ipupuru i kolo mugu ku i yapa mugu ku kasiri‚ ’bo i kani zuro kilo igbo’da ku drelia na teiliko. Ko ibabayi ku kulia ti walala na suburina‚ ku woŋo ŋanina‚ ku turoturo ŋanina. 26Ŋutulu kilo isusuro ku kuzena‚ ku ’do’do na teiliko ku kuliata naga na ikondra ’beri i kani kine. ’Bo teriŋito ti ’diko kine idodoŋa dodoŋa. 27I bo ŋanina ko bulo bonga Ŋiro lo ŋutulo i pondra i ’dikolo katani ku teriŋi ku mo’yu koru. 28Kugbo kine kuliata de naga asulukindra kondra na ’beri‚ gbo’dita go‚ ’bileta kuweto kasu kine ki‚ igbonaga rite nasuna gbo’di nyoga ina.” 29Yesu druga takindra ko kulia na guguma adi, “Meteta koligilo, ku kade kilo giri. 30Ku ko laga wiwila‚ ta medra ku ’beri i dendra adi za’belo gbo’di nyoga. 31Kuwade, kugbo ta medra kine kuliata de i kondra na ’beri, ta idedeni adi tumata na Ŋun ina gbo’di nyoga. 32Na takindra ta a ’diri, ina yuŋe na tinadena aka laŋadruni ti inga kine kuliata de giri aku kondra ’beri. 33’Dikona ku kana ilelenga, ’bo kulia kuwe kine aka lengani. 34“ ’Bo gbo’dita go teiliko kasu kilo ka’bi ku yeŋundra tomoni ku nyosu, ku memeri, ku tiyu na ina ru de kine, ka’bi lu luŋa de ku ’bunyekindro ta be na idina. 35’Bo lu luŋa de ipondra i ŋutulu giri laga lo gbo’da i kani kiloni. 36Kuwade gbo’dita ku konye luŋa kilo giri, maketa adi ti ta rione teriŋi na wokini ta ku kunu kuliata na ikondra ’beri kunu de giri‚ ma ta ku lirani ku Ŋiro lo ŋutulo i koŋo yu ’busa.” 37Mu luŋa Yesu bita lu togo’yu i kadi na Ŋun ina kata yu‚ ’bo mu tokotria lepe bita lulupodru kaŋo ku toto i mere lo luŋu a Olivalo yu. 38Druga kutumalu ’bero ’berona ŋutulu kilo giri woro i kadi na Ŋun ina kata yu i yinga na kulia naga ma lepe togo’ini kine.

will be added

X\