LUKA 20

1I luŋa gele kugbo Yesu lu i togo’yu na ŋutulu kilo i kadi na Ŋun ina kata yu, ku i trukodru na kuu na’buna itro, ka’i’ila drumala kilo ku katogolo ti kukuzuna kilo ku temezi kilo druga pondra ku lepeni. 2Ko druga piza lepe adi, “Trukoki ŋutu‚ do kondra kine kulia de ku teriŋi naga ya? Ŋona ŋa lo tikindra do ina teriŋi de ya?” 3Lepe druga teyitokindro ko adi, “Na ipiza ta ku piye. Teyitokita na tinade. 4Baputizi lo tiyi Yoanelo lu ŋiyu i ’diko yu ya‚ kugbo ilo ŋiyu ku ŋutulu kiloni ya?” 5Ko druga yoyolozu kase dridriŋini kugele‚ adi‚ “Ku yi kulia adi, ‘Ŋiyu i ’diko yu’ lepe lepe ikulia adi, ‘Kuwade ta aku rugo lepe gbandra ya?’ 6’Bo ku yi kulia adi, ‘Ŋiyu i dridriŋi na ŋutulu,’ ŋutulu kilo giri ibibiringo yi ku ŋoropo, igbonaga ko arugo Yoane a kakeyonina.” 7Kuwade ko druga teyitokindro lepe adi se aku deni piri naga ma ŋiyuni ina. 8Yesu druga teyitokindro ko adi, “Na ’do aka trukokindro ta teriŋi naga ma na kondri kine kulia de inani.” 9Yesu druga poki i trukokindro na ŋutulu kilo kine kulia na guguma de adi, “Le’de ŋutu kazu a’udru zabibu kanye melesi kata yu, druga kolokindro melesi ŋanina ku katiyu kiloni, ti lepe lu utu i ne’de ka ku baŋe a nazo. 10Ku luŋalo ayeŋundra lepe druga sonyodru upiye lonyelo ku katiyu kilo yu, adi ti ko tiki nye konye ti zabibu lo rada melesi yu kilo. ’Bo katiyu kilo druga kidro upiyelo, druga sonyodru lepe bo yu ku kenisi kilo kana. 11Monye melesilo druga sonyodru upiye le’de. Ko druga kidro lepe ’do, druga tikindra lepe yukuwe koru, druga sonyodru lepe bo yu ku kenisi kilo kana. 12Monye melesilo druga sonyodru laga a togi musala ilo. Ilo de ko akiri a ’dikasi, ko druga droŋodru lepe kaŋo. 13Kuwade monye melesilo druga kulia adi, ‘Ma na kondra inyo kuru? Na kuru isonyodru ŋiro lio lo nyari na ilo. Ŋo laga de ko isosobu lepe kuru.’ 14’Bo kugbo katiyu kilo laga abonga lepe, ko druga kulia kase dridriŋini adi, ‘Ilo de a kalumelo, ti yi reme lepe kaŋo, ma luma kilo gbo’da a kaya.’ 15Ko druga droŋodru lepe i melesi katani kaŋo druga reremi lepe. Monye melesilo ikondra kulia naga inyo kasikoni ya? 16Lepe ipopondra i tukarakindra na katiyu kilo kaŋo, ’bo i tikindra na melesina ku ku’de ŋutulu.” Ku ko laga ayinga de ko druga kulia adi, “Ka’bi ku gbogbo’da de po!” 17Yesu druga medra ko, druga takindra ko adi, “Kulia na wuwuro kine awuro adinyo? adi ‘Ŋurupi laga ma ka’duko kilo redrilo ayeŋundra a ŋurupi laga a druma lo goŋe lo kadi.’ 18Ŋutu lo ’duki i ilo ŋurupi de kinilo i’be’beleŋo toŋ toŋ, ’bo ku ŋurupi ŋanilo lo ’duki i le’de ŋutu ki, lepe iŋiŋinyi lepe munyumunyu.” 19Katogolo ti kukuzuna kilo ku ka’i’ila drumala kilo kodro ga’yu kiko lo mokani Yesu i lu luŋa de, ’bo ko akuze ŋutulu kilo. ’Bo kpe, ko adeni adi kine kulia de gupa kase ’beri. 20Kuwade ko druga medra lepe go go, ko druga sondru kadoma ti kulia laga lo kpeza ’beri ku toŋulupa kilo adi se laga a ŋutulu laga a lo’bu, ma se mogi kulia ku lepe i kutu yu ’busa, ma ko ku zongini lepe i kukuzu na teriŋi na lo’bizona kata yu. 21Ko druga piza lepe adi, “Katogoloni, yi adeni adi kulia konu kine ku togo’yu nonuna a ŋo laga mŋgba, do ani ge’ya ŋutulu, ’bo do togo’yu kiko lo Ŋun ilo a ’diri. 22Ku yi tiyi Kaisari mosorolo kuwa ’bayi?” 23Yesu druga yoyo toŋulupa nasikoŋana, druga piza ko adi, 24“Kpekita na silingita ki’do. Ina kodudo de ku wure laga kinilo a ti ŋa ya?” Ko adi, “A ti Kaisari.” 25Lepe druga takindra ko adi, “Kuwade tikita Kaisari kapazi ti Kaisari kilo, ’bo tikita Ŋun kapazi ti Ŋun kilo.” 26Ko aku romoki moga lepe ku kulia naga ma lepe tazini kine de ku ŋutulu kilo i koŋoni. Ko druga rambu ’beri ku teyitundro na lepe na kuliana, druga ko yiŋazi tali. 27Ku’de Sadukayo lo kulia adi ŋiye na ŋutulu laga atatuwa ina ’bayi kilo druga pondra ku Yesuni. 28Ko druga piza lepe adi, “Katogoloni, Mose awurokindro ŋutu adi, ku luŋase lo ŋutulo laga atuwa, ti lepe gbo ku noka, ’bo ’ba ŋazi, ti ŋutu ŋani lupe nokana ma yuŋundri ŋazi ku luŋase i pirini. 29Kazu luŋaseri ku’de burio. Kayolo azondra noka druga atuwara a kuwe. 30Togi murelo druga lubo lepe. 31Togi musala ilo druga nyelo lubo, ’bo ko giri laga burio kilo de atatuwara, aku kolokindro ŋazi. 32I bo ŋanina nokana atuwa itro. 33Kuwade i luŋa lo ŋiye lu, lepe igbo’da a noka niŋa? Igbonaga ko burio a’deba lepe a noka nase ina.” 34Yesu druga teyitokindro ko adi, “Ŋazi ti ilo luŋa de kilo ko lulundra ku titiki i lunya. 35’Bo ko laga akenaki adi se lo irumbi piri i nu baŋe de ku ŋiye naga i dridriŋi na ŋutulu laga atatuwa kilona aka lundrani, aka tiki i lunya ’doni. 36Ko aka romoki tatuwa ’doni, ko igbo’da beti malaika, ko igbo’da a ŋazi ti Ŋun, igbonaga ko a ŋazi lo ŋiŋiye ina. 37’Bo Mose ku mugu akpekindra kulia adi ŋutulu laga atatuwa kilo, kilo iŋiŋiye, i piri na wuroni kulia ti buruzuti ma lepe lungi Mata adi Ŋun lo Abarahama, Ŋun lo Isaka, Ŋun lo Yakobo ina. 38’Bo lepe ani gbo’da a Ŋun lo ŋutulu laga atatuwa kilo, ’bo a lo ŋutulu laga zoru kilo, igbonaga ŋutulu kilo giri gbo zoru ku lepe ina.” 39Katogolo ku’de ti kukuzuna kilo druga teyitokindro lepe adi, “Katogoloni, do akulia a lo’bu.” 40Ko druga aku togo’yu teiliko i piza na lepe piyesi ku’de ’do. 41Yesu druga piza ko adi, “Ŋutu kilo kulia adi Kristo a ŋiro lo Dawidi adidinyo ya? 42’Bo Dawidi ku mugu akulia i Buku na Saumana katani adi, ‘Matalo akulia ku Mata liolo adi, Gbi’dikini i keni lio lo lutate ilo, 43yeŋadru tozu i ’delakindra na na mero kolu kilo a si’de na ’de’i do mukuzi kolu kilo.’ 44Ku Dawidi lo lungu lepe a Mata, lepe ku gbo’da a ŋiro lo lepe adidinyo ya?” 45Ku ŋutu kilo giri laga kilo i yinga na kulia ti lepe kine de‚ lepe druga takindra lotodiniki kanye kilo adi, 46“Gbo’dita ku konye ku katogolo ti kukuzuna‚ lo nyadru woro ku bongola naga nazo‚ lo nyadru roromi i pirito na togboroni kapazi, lo nyadru gbi’diki i si’deta naga a na’bu i kadizi naga a momoreta kine kata yu lo nyadru gbi’diki i si’deta naga na kukuka i gbadru yu, 47lo dudumuza awuzio ku kadizi kasiko kine, ku lo magu Ŋun a nazo ma se meta ’busa kilo. Ko iŋeŋeraki kulia a naro arodru.”

will be added

X\