LUKA 2

1I nu baŋe de‚ Kaisari Augusito atazu kukuzu adi ti kari ti ŋutulu kilo giri wuroni wuro. 2Ina wuro na kari ti ŋutuluna de a naga a kayona ti Kurinio lo gbo a lo’bizo lo Suria. 3Kuwade ŋutulu kilo giri autu i wuro na kari yu‚ ŋutu gele gele kanye kezi yu. 4Yosefa itro druga ŋiyoro Galili yu i kezi naga Nazareta kata yu‚ i utu Yudaya yu‚ i kezi na Dawidi na luŋu a Betelehema ina‚ igbonaga lepe a ŋiro lo ŋiyu i kadi na Dawidina kata yu ina‚ 5i wudyo na kari kase kine seku Maria‚ na nye na ’dolana, ’bo ti gbo’di a golo. 6Nyenaga i naga ma ko sakani yuna‚ luŋa lo lepe lo ta’dulo druga roromoki. 7Lepe druga ta’duundro ŋiro lonye laga lo kazanilo. Lepe druga todya ŋirolo ku bongola naga na torani ŋiro kine‚ druga topirikindra lepe i piri na nyosuni suna kata yu‚ igbonaga piri ’bayi i kadi na komona kata yu ina. 8Nyenaga i nu ka de ti kayuku kulu i nyomu yu‚ i yugu na kebilizi kase kine kuwaze. 9’Bo malaikata lo Matalo druga puku kasi koni‚ ’bo mo’yu na Matalona druga kobu kobu kasiko i laga yu‚ ko druga kukuze koru. 10Malaikatalo druga takindra ko adi‚ “Ku kukuzeta‚ ’bo meteta‚ na lo trukokindro ta kulia naga a ti nyola‚ na igbo’da a ti ŋutulu giri kine. 11’Bo indikinina i kezi na Dawidina kata yu Kariteni ata’duweki ta‚ laga a Kristo Mata ilo. 12’Bo ilo ŋo delo igbo’da a kpiye lasu. Ta irumbi ’u’uŋwelo ti atora ku bongola naga na torani ŋiro bitana kine‚ ti lu atopiriki i piri na nyosuni suna kata yu.” 13Wuleŋa gele druga mongoyo na malaika ti ’diko kilo muluzu ilo malaikata de‚ druga ko pudya Ŋun adi‚ 14“Ti Ŋun ilo purani pura i ’diko yu‚ ti teili lo trotro gbo’dini i kani‚ i ŋutulu laga ma Ŋun gbo’dini ku nyola kilo.” 15Kugbo malaika kilo laga aŋiyoro kasikoni bo i ’diko yu‚ kayuku kilo druga dendra kase dridriŋini adi‚ “Kita utu Betelehema yu‚ ma yi ku bongi kuliata na yeŋundra naga ma Matalo kpekindri ŋutu kine de.” 16Ko druga ’damaadru ’beri wule wule‚ ko druga ku rumbi ku Maria seku Yosefa ku ’u’uŋwelo ti lu atopiriki i piri na nyosuni suna kata yu. 17Ku ko laga abonga lepe‚ ko druga kekendra kulia na trukoki se ti ilo ŋiro de kine. 18Ŋutulu giri lo yinga kulia na kekeni kayuku kilo kine druga rambu ’beri koru ku kulia na kekeni ko kine. 19’Bo Maria druga ’de’ya kine kulia de tri kanye teilini i yoyolozu na ko. 20Kayuku kilo druga yitozi bo yu ku nyola i puradru na Ŋun ku kulia naga ma se yingi ku naga ma se medri be naga akekenaki se kinena. 21I bo na luŋa budro kilo‚ kugbo ŋirolo laga ataaro‚ lepe druga gbio a Yesu‚ ku kari naga ma malaikata gbizi ti lepe inga aku rie ku ŋote i pele yu kine. 22Kugbo luŋa lo tokelani kolo laga aromoki, be naga ma kukuzu na Mosena ma nyadrinina, Yesu druga zoŋa Yerusalema yu i kpeki ku tiki Matalo‚ 23be naga ma wuroni ku Matalo i kukuzuni adi‚ “Torila giri lo yuŋele a kayizi kilo iluŋu a ti Matalo” ina. 24Ko druga tikindra kapa laga a ’i’ileta be naga ma wuroni ku Matalo i kukuzu katani ina‚ kugbo saŋgbaraka mure kuwa torila ti a’bugo mure. 25Nyenaga le’de ŋutu lu Yerusalema yu‚ kari ti lepe kine se naga Simeona, ŋutu ŋanilo a lo’bu koru‚ lo ’delakindra mugu i teminizo na Ŋun‚ ti lu momondru suka na teiliko ti Isiraeli kilo‚ ti Yuka Nakiyena a’deba lepe. 26Ti Yuka Nakiyena atrukokindro lepe adi lepe aka tuwani ti inga lepe aku bo Kristo lo Matalo. 27Lepe druga lubo i kadi na Ŋun ina kata yu‚ ti lepe ilo ku Yuka Nakiyena. ’Bo kugbo kayuŋo kilo laga azondra ŋiro lase laga Yesu i kondra be naga ma kukuzuna nyadrinina. 28Simeona druga wuundra ŋirolo ku kenisi kanye kilo‚ druga pudya Ŋun adi‚ 29“Mata‚ tinade do lo tikindra na laga a upiye lolu ilo i yitozi ku teili lo trotrolo, be naga mo do kulianina, 30igbonaga konye kuwe kilo amedra ritundro nonu‚ 31naga mo do kukundri i konye ti ŋutulu girina‚ 32a parara na kobu ku Monyazi kiloni‚ ku a pura na nutulu kolu ti Isiraeli kiloni ina.” 33Ku monye seku ŋote druga rambu ’beri koru ku kulia na tayi ku ilo ŋiro de kine. 34Simeona druga tikindra ko koŋo na’bu‚ druga takindra Maria‚ ŋote na lepena adi‚ “Mete‚ ilo ŋiro de ititikindra ŋutulu ti Isiraeli ku’de rodri i titika‚ ’bo ku’de kilo i ririte. ’Bo lepe igbo’da a kpiye lo itikindra ŋutulu i rerenyalo, 35adi ma rameta laga i teiliko ti ŋutulu rodri kilo ku kpekpeza ’beri. A ’diri teili lolulo i’be’beleŋo ku luŋuli be na tyekoni ku walena.” 36Nyenaga ne’de noka‚ nye naga Ana‚ lepe a ŋiro na Fanuele i kadi na Aserina, lepe a kakeyoni. Lepe a ŋutu naga a temezika koru‚ ti inga lepe a ’diye ina‚ lepe asaka ku lalelo kiŋazi burio‚ 37’bo ti lepe a awuzina, asaka kiŋazi meria budro konye iŋmani. Lepe aku ko’yu kadi na Ŋun ina tro. Lepe nanye konakindra Ŋun kitana ku kuka na nyosuna ku maka na Ŋun ina mu luŋa‚ tupara ku tukaze. 38Ma lepe yeŋundri i nu baŋe nagele dena‚ lepe druga tikindra Ŋun iyete‚ druga kipikindro ŋutulu giri laga lo mondru dake na Yerusalema ina kilo kulia ti ŋirolo kine. 39Ku ko laga alenga kuliata giri naga na mora ku kukuzu na Matalona kine, ko druga yitozi bo Galili yu‚ kase kezi naga Nazareta ina. 40’Bo ŋirolo druga ’durundro‚ druga yeŋundra ku teriŋi‚ azore ku tobodo‚ ’bo ’busa na’bu na Ŋun ina agbo’da ku lepe kini. 41Nyenaga kayuŋo ti Yesu kilo bita woro Yerusalema yu mu kiŋazi ku kulia ti kolo druma naga a Rosetona. 42Ku kiŋazi ti lepe kilo laga gbo’di mere gele konye mure‚ ko druga utu kata yu be naga bita ma ko kondrina. 43’Bo kugbo kolo drumana naga alenga‚ kasiko i yiteni‚ ŋiro laga Yesu a’dutoro bo Yerusalema yu‚ ti kayuŋo ti lepe kilo aku deni‚ 44’bo ko rambu adi ŋo laga de ilo i mongoyona katani. Ko druga tu a luŋa le’de gele‚ druga ko yiki i ga’yu na lepe i dridriŋi na maratezi kase kilo katani ku i worisi kase kilo katani. 45Kugbo ko aku rio lepe‚ ko druga yitozi bo Yerusalema yu‚ i galadru na lepe. 46’Bo i bo na luŋa musala ko ku rumbi lepe ti lu i kadi na Ŋun ina kata yu‚ ti lu agbi’diki i dridriŋi na katogolo kilo, i yinga na ko‚ ku i pipiza na ko itro. 47’Bo ŋutulu giri lo yinga lepe kilo arambu ’beri koru ku totore na lepena ku teyitundro na lepe na kuliana itro. 48Ku kayuŋo ti lepe kilo laga amedra lepe‚ ko druga rambu ’beri koru. Ŋote na lepena druga piza lepe adi‚ “Ŋirolo‚ do kondra ŋutu de gbandra ya? Mete‚ yi seku munyi aga’yu do ku ’do’do na teiliko koru.” 49Yesu druga teyitokindro ko adi‚ “Ta ga’yu na gbandra ya? Ta aku deni adi ti na gbo’dini i kulia ti Monye liolo kine katani ya?” 50’Bo koŋa aku yo kulia naga ma lepe takindri se kine. 51Lepe druga pilara kasi ko kugele Nazareta yu‚ druga sobu kulia kasiko kine. Ŋote na lepena druga ’de’ya kine kuliata de giri tri kanye teilini. 52Yesu druga ’durundro ku tobodo, ku mugu itro‚ ku ’busa na’bu ku Ŋun yu‚ ku ŋutulu kilo yu itro.

will be added

X\