LUKA 19

1Ku Yesu laga alubo Yeriko yu, lepe druga rosodru purie‚ 2ti le’de ŋutu lu yu de nye laga Zakayo laga a druma lo kawuro ti mosoro kilo‚ ’bo lepe a korine. 3Lepe ga’yu medra na Yesu adi lepe a ŋa ya‚ ’bo lepe aku romoki bonga lepe ku kulia ti mongoyona kine, igbonaga lepe a loŋutrusa ina. 4Kuwade lepe druga wo ŋero yu ku kiza i koligi ki i medra na Yesu‚ igbonaga lepe lo irosodru i lu kiko de ina. 5Ku Yesu laga ayenga i nu piri de, lepe druga boŋadru ki yu, druga takindra lepe adi, “Zakayo‚ kiyundri ka wule‚ igbonaga solona na lu ku saka konu kadi yu ina.” 6Lepe druga kiyundra kani wule‚ druga rukundro Yesu ku nyola koru. 7Ku ko laga abonga lepe de‚ ko giri druga ngunguruto ngunguruto adi‚ “Lepe a ku lubo a komoni lo ŋutu laga a katoronyani a raba.” 8Zakayo druga lira‚ druga takindra Matalo adi‚ “Mete‚ Mata, dridriŋi nio na kapana na i’dogini lemerika, ’bo ku na laga amuundra kapatio lo le’de ŋutu ku toŋulupa, na iteyitokindro lepeŋa luŋa iŋmani.” 9Yesu druga teyitokindro lepe adi, “Solona, ritena ayeŋundra i ina kadi de katani azo, igbonaga lepe a ŋiro lo Abarahama itrona. 10’Bo Ŋiro lo ŋutulo pondra i ga’yu na ŋo laga aliki kilo ku i ritundro na ko itro.” 11Ku ko laga ayinga kine kuliata de, Yesu druga poki i tazu na kulia ku’de na guguma, ti lepe lu gbo’di nyoga ku Yerusalema yu, igbonaga ko arambu adi tumata na Ŋun ina gbo’di ina nyoga ku puru ina. 12Nyena kuliani lepe adi, “Druma le’de kazu autu i ne’de ka naga pazo yu i ’depundra na tumata nanye ma nye bulo ku yite. 13Lepe druga luŋundra upi kanye kilo mere gele kanyeni‚ druga tikindra ko riye mere gele‚ druga takindra ko adi‚ ‘Towuseta kine de yeŋadru i luŋa laga ma na yiteni lu.’ 14’Bo ŋutulu laga ku lepe i ka yu kilo aŋmoza lepe a loro‚ ko druga sonyodru lo’dia ku lepe i bo yu adi‚ ‘Yi a’biye ilo ŋutu de ka’bi ku gbogbo’da a mata lika.’ 15Ku lepe laga ayite, ti a’deba tumata nanyena azo, lepe druga tazu kukuzu adi, ti upi kanye laga ma nye tikindri riye kazu kilo ti luŋeni. 16Ŋutu laga a kayolo druga pondra ku lepeni, druga takindra lepe adi‚ ‘Mata‚ riyeta nonuna azondra ku’de riye mere gele kini.’ 17Matalo druga teyitokindro lepe adi‚ ‘Do akondra a lo’bu, do a upiye lo’bu! Do agbo’da ku teili lo to’diri ku ŋo laga a lotrilo‚ do igbo’da ku teriŋi i tizu na kezino mere gele.’ 18Druga ŋutu laga lo togi murelo lo pondra‚ druga kulia adi‚ ‘Mata‚ riyeta nonuna azondra ku’de riye mukana kini.’ 19Matalo druga teyitokindro lepe adi‚ ‘Do itizu kezino mukana.’ 20Kuru nyena pondri le’delo, druga kulia adi‚ ‘Mata‚ mete‚ riyeta nonu ina ma na ka‚ naga ma na ’dandri i kitambala katanina. 21Na akuze do, igbonaga do a riŋina. Do roromoki ’dumundra ŋo laga do aku ’delaki, do ’didra ŋo laga do aku kuru.’ 22Matalo druga teyitokindro lepe adi‚ ‘Na i’dungo kulia konu kine ku kulia na lupundro konu kutuni kine, do laga a upiye lorolo de! Do adeni adi na a ŋutu laga a riŋi, lo ’dumundra ŋo laga na aku ’delaki, lo ’didra ŋo laga na aku kuru ya? 23Do kazu ani ’de’ya riyeta niona i zoko yu, ku na laga ayite, ma na bulo ku ’dumundra ŋo kuwe ku rezemani gbandra ya?’ 24Lepe druga takindra ŋutulu lo lira kanye laga yu kilo adi, ‘ ’Dumarata riyetana ku lepeni kaŋo‚ tikita ŋutu laga ku riye mere gele ilo.’ 25’Bo ko atakindra lepe adi, ‘Mata‚ lepe gbo ku riye mere gele!’ 26‘Matalo druga takindra ko adi‚ ‘Na takindra ta a ’diri, ŋutulu giri laga ku kapa kilo ititiki ku’de kini, ’bo ŋutu laga ’ba kapalo, ŋo laga ma lepe gbo’dinilo ilo i’du’dumazi kaŋo ku lepeni. 27’Bo laga mero kuwe lo redra na adi ka’bi na ku ’de’de ko kilo de, zowuta ko kuweni, remeta ko kuwe koŋoni kaŋo.’ ” 28Ku Yesu laga akulia kine kulia de, lepe druga pilara ŋero i utu naga Yerusalema yuna. 29Ku lepe laga ayenga Betefage ku Betania yu nyoga, i mere lo luŋu a Olivalo i muko yu, lepe druga sonyodru lotodiniki kanye kilo mure, 30adi, “Utita i ’ba laga kasu koŋo lu de, ku ta alubo yu de ta irurumbi tore na drongi nu amunuki yu de‚ naga inga le’de ŋutu aku kiza kini. Yukuwuta lepe‚ zikuta lepe weni. 31Ku le’de ŋutu lo piza ta adi, ‘Ta yokoodru lepe gbandra ya?’ ta ikulia adi, ‘Matalo lo nyadru lepe.’ ” 32Kuwade ŋutulu lo sunyuzi kilo ku ko laga autu‚ ko druga rumbi kulia kine be naga ma lepe takindri kona. 33Ku ko laga kilo i yukuundro tore na drongina, kumose kilo druga piza ko adi‚ “Ta yokoodru tore na drongina gbandra ya?” 34Ko druga kulia adi, “Matalo lo nyadru lepe.” 35Ko druga zikundro lepe ku Yesuni, druga gumba bongola kase kine i tore na drongina kini, druga togbi’dikindra Yesu ku lepe kini. 36Ku lepe ituni, ko druga pedra bongola kase kine i kiko kata yu. 37Ku lepe laga gbo’di nyoga, i dudule na mere laga Oliva ilo, mongoyo na lotodiniki kilo druga poki i nyola ku i pudya na Ŋun ku roroto laga gboŋa ku konesi naga ku teriŋi naga ma ko bongi kine, 38adi, “Ti Mata lo pondra ku kari ti Mata Ŋun ilo purani pura! Teili lo trotro lu i ’diko yu ku todruma i piri naga ki yu!” 39Farisayo ku’de laga i dridriŋi na mongoyona kata yu kilo druga takindra lepe adi, “Katogoloni‚ riŋe lotodiniki kolu kilo.” 40Lepe druga teyitokindro ko adi‚ “Na takindra ta‚ kilo ŋutulu de ku yiŋa tali‚ kine ŋoropo de se na iresa.” 41Ku Yesu laga gbodi ayeŋundra nyoga‚ ku aboŋu kezina‚ lepe druga gbigbiye ku kezi ŋanina‚ 42adi‚ “Kedri kodro solona ku do adeni kulia ti teili lo trotro kine po! ’Bo tinade koŋa a’dana kaŋo konu konyeni. 43Luŋa ku’de ma lu iyeyeŋundra konu kini‚ laga ma mero kolu kilo ku gu’i ’dule konu lagani‚ ’bo ko itrumba do gbiri‚ i gokindra na do kikoli mu mara kolu kilo. 44Ko idudukaki do ka‚ do lepe ku mugu‚ ku ŋazi kolu laga konu katani kilo. Ko aka kolokindro kasu katani ’dibani ŋurupi le’de laga i le’de kini‚ igbonaga do aku deni luŋa lo riteni dolo ina.” 45Yesu druga lubo i kadi na Ŋun ina kata yu‚ druga poki i rikodru na ŋutulu lo togbodyu kapa kase kilo kata yu kaŋo. 46Lepe druga takindra ko adi, “Awuro adi, ‘Kadi niona igbo’da a kadi naga a maketa,’ ’bo ta alopugo lepe a kugi na kariaka.” 47Lepe druga gbo i togo’yu mu luŋa i kadi na Ŋun ina kata yu. Drumala ti ka’i’ila kilo ku katogolo ti kukuzuna kilo druga ga’yu kiko lo tukarakini lepe kaŋo. 48’Bo ko aku riondru kulia ku’de naga ma ko kokonu kine, igbonaga ŋutulu kilo giri a’depakindra ’beri i yinga na kulia ti lepe kine ina.

will be added

X\