LUKA 17

1Nyenaga Yesu atakindra lotodiniki kanye kilo adi‚ “Ŋo lo tikindra ŋutulu kilo i bayi kilo ’baka zara yeŋundrani. Dreliana ina ku ŋutu laga lo zondra ŋo ŋani kilolo. 2Kedri kodro igbo’da a na’bu kugbo kizo naga a ziyena na munuki ku lepe i muruni ma biriŋozini lepe suburi kata, ka’bi lepe ku tikindra ŋiro gele i ŋazi lo’di’diki kilo de i bayi. 3Gbo’dita go. Ku luŋosu laga akondra toro‚ riŋe lepe‚ ku lepe laga alopugo teili, ’dine toro na lepena. 4Ku lepe laga akondra do a loro luŋa burio i kolo gele katani‚ druga pondra konuni luŋa burio i kulia adi‚ ‘Na alopugo teili‚’ ’dine toro na lepena.” 5Lososonyo kilo druga takindra Matalo adi‚ “Tiki rugo nikana ti ’dudyi ’dudyo.” 6Druga Matalo kulia adi‚ “Ku ta lo gbo ku rugo beti nyumuti lo mutadilo‚ ta kedri kodro roromoki takindra ilo koligi de adi‚ ‘’Dotoro mugu ku ’ute mugu suburi kata yu‚’ kedri kodro isosobu kulia kasu kine. 7“Ŋona ŋa laga kasu dridriŋini laga ku upiye lonye lo kudyu kugbo lo yugu kebilizi‚ lo takindra lepe ku lepe apondra i diŋo yu adi‚ ‘Pondri wule ku gbi’dikini ka i nyosu’ ya? 8Lepe aka takindra lepe deni ya? adi‚ ‘Petaki na nyosu‚ sone mugu‚ tiki na nyosu. Ku na nyosuni, ku na mozuni‚ mo do bulo nyosu‚ mo do bulo mozu.’ 9Lepe tikindra upiyelo iyete ku kuliata na saraki lepeŋa ma kondri kine ya? 10Ta ’do gbo de‚ kugbo ta laga akondra kuliata na saraki ta kine giri‚ kulianita adi‚ ‘Yi gbo a upi laga ’ba rezema‚ yi kondra ŋo laga atiki yi adi ti yi konelo ’du.’ ” 11Kuwade i naga ma ko gbo’dini i kiko yu i utu nasiko Yerusalema yuna‚ Yesu druga ŋeradru i dridriŋi nasi Samaria seku Galili yuna. 12Ku lepe i lubo i ’ba le’de kata yu‚ ŋutulu ku’de mere gele laga amoka ku rima druga momora kasi lepe‚ ti ko kulu alira pazo yu de. 13Ko druga laiza ku teriŋi adi‚ “Katogoloni laga Yesu‚ gbo’di ku ediyo ku yi.” 14Ku lepe laga abonga ko‚ lepe druga takindra ko adi‚ “Utita ku kpekita ’beri ku ka’i’ila kilo yu.” Kasiko i utu yu‚ ko druga tokela a lokiye. 15Le’delo kasiko i dridriŋini kuwa abonga adi nye atoruwe azo‚ druga lepe yitozi bo i pudya na Ŋun ku roro laga gboŋa. 16Lepe druga mereke rupu ka ku Yesu i mukuzi yu i tikindra na lepe iyete. ’Bo ŋutu ŋanilo a Samariatio. 17Yesu druga teyitokindro lepe adi, “Ŋutulu lo toruwe kilo kedri agbo’da mere geleni ya? Laga buŋa kilo kilo yeda ya? 18Le’de ŋutu laga lo yite i pudya na Ŋun ’bani kuru gele’du laga a monyatiolo de ya?” 19Lepe druga takindra ŋutulo adi, “Ŋine, pilarani konu kiko yu, rugo nonu ina atikindra do i yeŋundra a lo’bu.” 20Farisayo kilo druga piza Yesu adi, “Tumata na Ŋun ina iyeŋundra nanu ya?” Lepe druga teyitokindro koŋa adi, “Tumata na Ŋun ina ani pondra ku kpiyesi naga na iboboŋa, 21kugbo ŋona ko aka kulia adi, ‘Mete, ma lo!’ kuwagi ‘Ma lu!’ ni. Mete, tumata na Ŋun ina ina kasu katani.” 22Lepe druga takindra lotodiniki kilo adi, “Luŋa kilo kilo ipondra laga ma lu ma ta ku nyadri medri luŋa gele lo Ŋiro lo ŋutulo lu, ’bo ta aka medrani. 23’Bo ko itatakindra ta adi, ‘Mete ma lu!’ kuwagi, ‘Mete, ma lo!’ Ku utututa kata yu, ku kekeporota ko. 24Beti naga ma piyalo mo'ini i ’diko yu ŋiyoro i lo go yeŋadru i lu go ina, Ŋiro lo ŋutulo igbo’da de i luŋa lo lepe lu kata yu. 25’Bo a kayona lepe isasanya sasanya koru, ’bo ina yuŋe na tinadena ipapazu lepe itro. 26Be naga ma gbo’dini i baŋe na Noa kazu nu, igbogbo’da i luŋa lo Ŋiro lo ŋutulo lu de ’do. 27Ko kazu nyonyosu, ko momozu, ko lundra ’beri, ko tiyi i ’depa, yeŋadru i luŋa lo lubi Noa i ki’bo kata yu lu, druga kana zore ku pio, i tukarakindra na ko giri kaŋo. 28Kazu kulia kine akondra ’beri de i luŋa ti Loto kulu. Ko kazu nyonyosu, ko kazu gbodyu kapa, ko togbodyu kapa, ko ’udyu kapazi, ko kazu ’dugo kadizi itro. 29’Bo i luŋa laga ma Loto lupundri Sodoma yu lu, kimana a’du i ’diko ki yu beti kudu ku baruti i tukarakindra na ko giri kaŋo. 30Ma lu igbo’da de ’do i luŋa lo kpezi Ŋiro lo ŋutulo mugu lu. 31I lu luŋa de, ŋutu laga ma lu i kadi ki laga ku kapa kanye kadi yu ilo, ka’bi ku kikiyundra kani i ’dumadru na ko. ’Bo ŋutu laga ma lu melesi yu ilo, ka’bi ku yiyite boni. 32Rameta kulia ti noka na Loto kine. 33Ŋutu lo ga’yu ’de’ya ru nanyena ilo izuzuki ŋo nanye, ’bo ŋutu lo izukindra ru nanyena ilo, ilo ipupu ru nanyena. 34Na takindra ta, i lu mude de, ŋutulu mure irie i gbolo ki yu, gelelo i’du’dumazi, ’bo le’delo ikokoloki. 35Wate mure igbo’da i zizo yu, gelena i’du’dumazi, ’bo ne’dena ikokoloki. [ 36Lalia mure igbo’da melesi yu, gelelo i’du’dumazi, ’bo le’delo ikokoloki.]” 37Ko druga piza lepe adi, “Yeda ya po, Mata?” Lepe druga teyitokindro ko adi, “I piri na ’burala nu yu, logunusi kilo itundra ’beri kugele yu de.”

will be added

X\