LUKA 16

1Yesu druga takindra lotodiniki kilo ’do adi‚ “Kazu le’de ŋutu a korine‚ lepe gbo ku katiyuni lo kapazi kanye. ’Bo le’de ŋutu asosozu kulia ku katiyuni ŋanilo i muguni ku mata lo lepelo i koŋo yu adi lepe lu kokorozu kapa ti mata lonyelo kilo kaŋo. 2Drumalo druga lungu lepe, druga takindra lepe adi‚ ‘Kulia na yiŋi na konu mugu de kine a ti nyo ya? Kene kapazi laga mo do tizi kilo, igbonaga do gbo’di ani romoki gbo’da a katiyuni ’do ina. 3Katiyunilo druga rambu kulia de kanye teilini adi‚ ‘Ma na kondra inyo ya? Mata liolo ilo nyadru ’dutundro na i kita na tiyuni kapazina kaŋo‚ ’bo na ani romoki kudyu‚ ’bo momo’yuna tikindra na yukuwe. 4Na adeni ŋo lo ikonu na ilo‚ ’bo ku na laga a’dute i kita na tiyuni kapazina‚ ŋutu kilo irurukoro na kase ’ba yu.’ 5Lepe druga lungu ŋutulu lo nyosu moriye ti mata lonyelo kilo giri gele gele kanyeni, druga piza ŋutu laga a kayolo adi‚ ‘Do anyosu mori na mata liolo mudaa?’ 6Lepe druga kulia adi‚ ‘Soŋgbolo ti wele kama gele.’ Katiyunilo druga takindra lepe adi‚ ‘ ’Dumu karatasi nonuna‚ wure meria mukana.’ 7Lepe druga piza le’delo adi‚ ‘Laga do anyosu mudaa?’ Lepe druga kulia adi‚ ‘Kinyo kilo nyakaleta kama gele.’ Katiyunilo druga takindra lepe adi‚ ‘ ’Dumu karatasi nonuna, wure meria budro.’ 8Drumalo druga pudya katiyuni loro lu de ku kondra na lepe naga ku totore nu de. ’Bo ŋutu ti ina ka de kilo gbo ku totore kase yuŋeni alangu ŋutu ti parara kilo. 9’Bo na takindra ta, ’depakita ’beri worisi kilo ku tokorine naga ani gbo’da mŋgba ina, kuwade ku tokorine ŋanina naga alenga ma ko ku rukundro ta i pirito naga ani lenga kine kata yu ’busa. 10“Ŋutu lo gbo’da ku teili lo to’diri ku ŋo laga a lotrilo‚ lepe igbo’da ku teili lo to’diri ku ŋo laga a drumalo itro. Kugbo ŋutulo ani gbo’da mŋgba ku ŋo lotrilo, lepe ani gbo’da mŋgba ku ŋo laga a drumalo itro. 11Kuwade ku ta laga aku gbo’da ku teiliko ti to’diri ku tokorine naga ani gbo’da mŋgba ina‚ ma ŋa lo inyadru i tikindra na ta tokorine naga mŋgba ina ya? 12’Bo ku ta laga ani gbo’da ku teiliko ti to’diri ku kapa ti lege‚ ŋa lo iromoki tikindra ta kapa laga a kasu lepe kilo ya? 13Kakitani le’de ’bayi lo konakindra drumala mure kita‚ igbonaga ŋona lepe iŋmoza le’delo, ’bo inyadru le’de lu‚ kuwa ko i’depakindra ’beri seku le’delo i ’dadru na lu de. Ta ani romoki konakindra Ŋun kita seku tokorinena itro.” 14Kugbo Farisayo lo nyadru silingi koru kilo laga ayinga kine kuliata de giri‚ ko druga ’da’daradru Yesu. 15’Bo lepe druga takindra ko adi‚ “Ta a ŋutu lo kpeza ’beri mŋgba ku ŋutulu i konye kilo‚ ’bo Ŋun adeni teiliko kasu kilo giri. Ŋo laga ma ŋutulu sobini kilo a kapa laga ma Ŋun ŋmozi a loro kilo. 16“ ’Bo kukuzuna ku kakeyo kilo itro ko asaka yeŋundra tozo ku Yoane. Ŋiyu i lu so de kuu na’bu na tumata na Ŋun ina na itruko, ’bo ŋutulu giri gele gele ri’diadru ’beri i lubo ŋanina kata yu. 17’Dikona ku kuzo kine roromoki lenga wuleŋa gele‚ ’bo kulia gele naga ’baziŋadroo ti kukuzuna kine aka yeŋundra a ’busani. 18“Ku le’de ŋutu laga arikodru noka nanyena‚ druga ’deba ne’de‚ lepe akondra towute ‚ ’bo ŋutu lo ’deba noka naga ma lale lo lepelo rikokindrina, lepe akondra towute ’do . 19“Kazu ’berona le’de ŋutu a korine‚ lepe asozu mugu ku bongola naluwe ku bongola na gbiya ku pamba namilinya kine‚ lepe nyosu nyosuto naga na toto’bi kine mu luŋa. 20Ti bita ku lepe i kaakutu yu le’de ŋutu nye laga Lazaro a lemeri‚ a’delaki yu de‚ ku ’dikasi kine zore ku lepe i muguni. 21Lepe lu ŋoŋoliza limbito na ’do’do kani ku korinelo i mesa ki yu kine i nyei‚ ’bo ’dioŋozi lo pondra i drangu na ’dikasi ti lepe kine. 22Kuwade lemeri ŋanilo ku tuwani‚ druga malaika kilo ’dokodru lepe ku Abarahama i gedyo yu. I bo ŋanina ku ŋutu laga a korinelo laga atuwa itro, druga nuka nuka. 23’Bo i piri na ŋutulu laga atatuwa kilona kata yu, lepe a’biludru konye kilo, ti lepe lu i sanya, druga medra Abarahama pazo yu de‚ ti Lazaro lu ku lepe i gedyo yu. 24Druga lepe laiza adi‚ ‘Monye lio Abarahama‚ gbo’di ku teili lo trotro ku na‚ sunyu Lazaro ti ku suki lo’do lonyelo i pio kata ma lepe ku toligi ŋede liolo po! ’Bo na lo sasanya i ina kima de katani.’ 25Abarahama druga teyitokindro lepe adi‚ ‘Tore‚ rame adi kazu mo do gbo’dini zoruna‚ do arumbi kapa laga a lo’bu‚ ’bo laga Lazaro arumbi kapa loro. ’Bo tinadena lepe ilo rumbi ruruyi na teili‚ ti do lo rumbi miye na muguna. 26’Bo kulia ku’de naga alangu kine‚ kaya dridriŋi naga kasi tana drili druma ina ini‚ na tikindra ŋutulu lo nyadru ŋiyoro kayani laŋadru kasu yu kilo ani romoki‚ ’bo lo ŋiyu kasu yu kilo ani romoki yeŋundra kayani.’ 27Lepe druga kulia adi‚ ‘Na ma’yu mugu ku do Monye‚ troru sonyoro lepe ku monye lio i ’ba yu‚ 28igbonaga na gbo ku luŋaseri kuwe mukana‚ ma lepe ku tepizo ko‚ ka’bi ko ku pondra i piri naga na sasanyani ’beri ina de katani po!’ 29Abarahama druga teyitokindro lepe adi‚ ‘Kulia na wuru Mose kasi kakeyo kilo kunu yu‚ ti ko yingi kulia ŋani kine.’ 30Korinelo druga kulia adi‚ ‘ ’Bayi‚ monye Abarahama, ku ŋutu le’de lo ŋiyoro i dridriŋi na ŋutulu laga atatuwa kasiko yu‚ ko ilolopugo teiliko. 31Abarahama druga teyitokindro lepe adi‚ ‘Ku ko laga ani yinga Mose ku kakeyo kilo‚ ko aka rugo lopuko na teiliko kaseni‚ ’dibani kodro ku le’de ŋutu laga aŋiyoro i dridriŋi na ŋutulu laga atatuwa kilo de kpe.’ ”

will be added

X\