LUKA 13

1I lu luŋa de ti ku’de ŋutulu kulu yu de lo trukokindro Yesu kulia ti ŋutu ti Galili laga ma Pilato sogi rima kasiko kine ku rima ti ’i’iza kasiko kine kugele kilo. 2Yesu druga teyitokindri ko adi, “Ta rambu adi kilo ŋutu ti Galili de gbo ku torozi alangu ŋutu ti Galili kilo giri, igbonaga ko asanya dena ya? 3Na takindra ta, ’Bayi, ’bo ku ta laga aku lopugo teiliko, ta giri ikakaraki de. 4Kuwagi ŋutulu laga mere gele konye budro laga ma lo’de lo kadi na Siloama merekeni kini, muyugi ko kulu de, ta rambu adi ko laga a katoronya alangu ŋutu laga Yerusalemani kilo giri ya? 5Na takindra ta adi ’Bayi, ’bo ku ta laga aku lopugo teiliko‚ ta giri ikakaraki de.” 6Yesu druga tazu kine kulia na guguma de adi‚ “Le’de ŋutu gbo ku koligi laga a’utuki kanye melesi kata yulo. Ku lepe laga apondra i ga’yu na konye ŋani kini, druga aku rio. 7Lepe druga takindra kasolianilo adi, ‘Mete, na apondra i kiŋazi laga musala kilo de katani i ga’yu na konye ti ilo koligi de, ’bo na aku rio konye ŋani uye. Depe lepe. Lepe nyosu kana a ’busa gbandra ya?’ 8Ŋutu ŋanilo druga teyitokindro lepe adi, ‘Mata, koloki lepe inga ilo kiŋa de, ma na inga sosoli lepe ki’do, ma na ’bugi woro i mukoni. 9’Bo boni kugbo arada konye, a lo’bu, kugbo aku rada, mo do bulo ku deba lepe.’ ” 10Ku Yesu lu i togo’yu i kadi naga a momore ne’de kata yu, i luŋa lo sabatolo, 11ne’de noka naga i nu piri de, asaka ku yuka naga na tikindra mugu na lepena adrego, ’ba teriŋina kiŋazi mere gele konye budro. Ti noka ŋanina arunga mugu a naŋu’du, ani romoki ’bizu mugu ki tro. 12Yesu ku bongi lepe, druga luŋudru lepe kanye yu, druga takindra lepe adi, “Nokana, do gbo’di ayukuwe konu todrego katani.” 13Lepe druga tanyakindra kenisi kanye kilo ku lepe kini,wuleŋa gele mugu na lepena druga ririzo gbogbo, lepe druga pudya Ŋun. 14’Bo druma lo kadi naga a momorena kata yu ilo agbo’da ku ŋoma igbonaga Yesu atoruzo ŋutu i luŋa lo sabatolona, lepe druga takindra ŋutulu kilo adi‚ “Luŋa kilo bukiye kata laga lo konani kita. Pondrita katani ma ta ku toruwe ’busa‚ ’bo ku popondrata i luŋa lo sabatolo.” 15Matalo druga teyitokindro lepeŋa adi‚ “Ta a katoŋulupa! Ta giri kilo de ani yukundro ’baŋa ti su kasu marini‚ kuwa drongiyo kasu i luŋa lo sabatolo i zikodru na ko kare i gbu’do ya? 16’Bo ina noka naga a ŋiro na Abarahama ina de‚ naga ma Satani todyini kiŋazi mere gele konye budrona, ani gbo’da a na’bu ti lakani i ina tora de i luŋa lo sabatolo ya?” 17Ku lepe laga akulia de‚ mero ti lepe kilo giri kuweto kine ayu koru. Ku’de kilo ŋutulu giri druga nyonyola ku konesi giri naga ku sopo‚ naga ma lepe kondri kine. 18Kuwade Yesu druga kulia adi‚ “Tumata na Ŋun ina gbo beti inyo ya? Ma na tuzukindro lepe ku inyo ki’do? 19Lepe gbo beti koyita lo mutadi laga ma le’de ŋutu ’dumadri, ma ku ’udri kanye melesi katanilo. Kuwa a’dudyo druga yeŋundra a kedini‚ druga kpenya kine ku ’duko ku lepe i keniyani.” 20Lepe druga kulia ’do adi‚ “Ma na tuzukindro tumata na Ŋun ina ku inyo ki’do? 21Lepe gbo beti kape laga ma ŋutu nonoka ’dumadri druga ku ’dandru i kpokpo ti mugati naga nyakaleta musala kine kata yu‚ yeŋadru tozo i yuku nasiko giri kilo.” 22Druga Yesu worozi i dridriŋi na kezino ku ’beŋito i togolodru na ŋutulu kilo‚ i naga ma lepe utini Yerusalema yuna. 23Le’de ŋutu druga piza lepe adi‚ “Mata‚ ŋutulu laga lo ririte kilo igbo’da ’baziŋa ’du ya?” Lepe druga teyitokindro ko adi‚ 24“Galeta lubo naga i kaka natrina. ’Bo na takindra ta‚ ŋutulu rodri lo iga’yu lubo naga kata yuna kilo‚ ’bo ko aka romokini. 25Kugbo monye kadilo laga aŋiye ki i kindru na kakana‚ ku ta laga apoki i lira kaŋo i trutrungo na kakana‚ i kulia adi‚ ‘Mata‚ ŋaki yi kakana‚’ lepe iteyitokindro ta adi‚ ‘Na aku deni piri naga ma ta ŋiyunina.’ 26’Bo ta ipoki i kulia adi‚ ‘Yi bita nyosu‚ yi mozu konu laga yu de‚ do bita togo’yu kaya kikoli yu.’ 27’Bo lepe ikulia adi‚ ‘Na takindra ta‚ na aku deni piri naga ma ta ŋiyunina. Ŋiyorota kuwe koŋoni kaŋo‚ ta laga giri a katoronya kilo!’ 28Yu de gbiye kata ku ŋira na rubi‚ i medra nasu na Abarahama ku Isaka ku Yakobo ku kakeyo kilo giri i tumata na Ŋun ina‚ ti ta lepe ku ’beri gbo’di arikozi kaŋo. 29Ko iŋiyu i lupundro na kolona yu‚ ku i ’doro na kolona ku lolowe‚ ku yeki yu i gbi’diki ka i tumata na Ŋun ina katani. 30’Bo boŋeta‚ ŋutu laga ti bo kilo se lo igbo’da a ti ŋero, ’bo ti ŋero kilo, se lo igbo’da a ti bo.” 31I lu so de Farisayo ku’de kilo apondra druga takindra Yesu adi, “Yoŋe mugu kaŋo‚ igbonaga Herode ilo nyadru tatuza na dona.” 32Yesu druga teyitokindro ko adi‚ “Utita ku takita lu gbagbeta de adi‚ ‘Boŋe‚ indikini ku imalu na ilo irikodru dreria, na lo toruzo ŋutulu, ’bo i luŋa lo musala lu na ileleŋi kita niona giri. 33’Bo kpe, na lo pipilara kuwe kikolini indikini‚ ku imalu ku imolulu itro‚ igbonaga ani gbo’da a na’bu ku kakeyoni le’de tokini kaŋo Yerusalema yu.’ 34Do Yerusalema‚ Yerusalema, do na reremozu kakeyo kilo‚ na bibiringo ŋutulu lo sonyo konu yu ku ŋoropona. Luŋa mudaa na kodro nyadru tundra ŋazi kolu kilo kugele beti sukurina tundri torila kanye kme kanye kopuko kata ina‚ ’bo do a’biye! 35Meteta, kadi nasuna akoloki ta yiŋ. Na takindra ta‚ ta aka medra nani‚ yeŋadru tozo i luŋa lo ku yeŋundri ma ta ku kuliani adi‚ ‘Ŋutu lo pondra ku kari ti Mata ilo ti purani pura!’ lu.”

will be added

X\