LUKA 12

1I nu baŋe de‚ kugbo mongoyo na ŋutulu alifu alifu kilo laga atunundra ’beri i piri nagele‚ ko ariorioga ’beri i mukuzi. Yesu druga poki i takindra na lotodiniki kanye kilo a kayo adi‚ “Gbo’dita go ku kape ti Farisayo laga a ti toŋulupa kilo. 2Le’de ŋo ’bayi laga kugbo amuko‚ ’baka kpeza muguni‚ kuwagi le’de ŋo ’bayi laga a’dana‚ ’bo ’baka denani. 3Kulia naga ma ta tazi i suwo kata koyo koyo kadi yu kine‚ kine ikpekpeza ’beri ku roro laga gboŋa. 4“Na takindra ta laga a worisi kuwe kilo‚ ku kukuzeta ŋutulu lo rembu mu guna kilo‚ i bo ŋanina ko aka romoki kondra le’de ŋo ’doni. 5Kuwade na ikpekindra ta ŋa laga ma ta ku kuzenilo. Kuzenita Ŋun lo irembu muguna‚ ’bo i bo ŋanina igbo’da ku teriŋi na biriŋozini ta i kima naga a noketa nu kata yu ilo. Na takindra ta a ’diri‚ kuzenita nye! 6Sikinyi mukana ani togboro ku sente mure ya? ’Bo Ŋun ani boŋo ne’de gele tro. 7’Bo ’dibani kupi kasu ti kuwe kilo kpe akena giri. Kuwade ku kukuzeta tro. Gbore nasuna arodru gbore na sikinyi naga rodri kine koru. 8“ ’Bo na takindra ta‚ ŋutu gele gele lo kulia adi nye a ŋutu lio ku ŋutu kilo i koŋonilo, Ŋiro lo ŋutulo ’do ikonakindra lepe de ku malaika ti Ŋun kilo i koŋo yu. 9’Bo ŋutu lo renya na ku ŋutu kilo i koŋonilo, na ’do irerenya lepe ku malaika ti Ŋun kilo i koŋo yu. 10Ŋutu gele gele lo tazu kutu naro ku Ŋiro lo ŋutulo i mugunilo, toro na lepena i’di’diya. ’Bo ŋutu lo momorozu Yuka Nakiyenalo, toro na lepena aka ’diyani. 11Kugbo ta laga izoŋa i kadizi naga a momoreta kine kata yu ku drumala kilo ku kumose teriŋi kilo i koŋo yu‚ ku yoyota tro kulia naga na iteyitoro ta kugbo na ita ta kine‚ 12igbonaga Yuka Nakiyena na itogo’yu ta ku kulia naga ta itata i lu so de kine ina.” 13’Bo le’de ŋutu i mongoyona kata yu atakindra Yesu adi‚ “Katogoloni, taki luŋase liolo adi ti lepe koraki ŋutu luma ti monye lika kilo.” 14Yesu druga piza lepe adi‚ “Maratelo, ŋa lo ’delakindra na a kaŋerani kugbo a kakorani lasu ya?” 15Lepe druga takindra ko adi‚ “Tineta ti ’beri‚ gbo’dita ku konye ka’bi ta ku susuki konye ku kapa ti lege‚ igbonaga ru naga mŋgba na ŋutuna ani gbo’da ku torodri na kapazi ina.” 16Kuwade lepe atakindra ko kulia na guguma adi‚ “Ka na le’de ŋutu laga a korine ina troruni kapa koru. 17Lepe druga rambu adi‚ ‘Ma na kondra inyo? Igbonaga piri nio na ’dezi na kinyo ’bani ina.’ 18Kuwade lepe akulia adi‚ ‘Na ikondra de. Na iraranyi guguwo kuwe kilo kaŋo‚ na iwogu ku’de laga a drumala alangu kilo de ma na ’de’i kinyo kuwe kilo giri kata yu. 19’Bo na itakindra mugu adi, Do gbeleŋi ku kapa rodri, gbo’di yukani yuka, nyosuni‚ mozini, nyolani nyola.’ 20’Bo Ŋun druga takindra lepe adi‚ ‘Do lo mamali! Ilo mude de katani, yuka nonuna iluluŋuzi konuni, ma ŋa lo lumba kapa laga mo do ’de’i kilo ya?’ 21’Bandre lo ’deza kapa kanye lepe, ti ani gbo’da ku kapa kanye laga ku Ŋun yu ilo gbo beti ilo ŋutu de.” 22Yesu druga takindra lotodiniki kanye kilo adi, “Kuwade na takindra ta, ku wiwinyata wiwinya ku kulia ti ru nasuna, adi ma ta nyosu inyo, kuwa ku kulia ti mugu kine, adi ma ta sozu inyo. 23’Bo runa arodru nyosu, ’bo muguna arodru sozu. 24Yoleta kulia ti korike kine: ko ani ’udru, ko ani ’didra tro, ko ’ba gugu kugbo piri na ’delani kapa tro, ’bo Ŋun lo wowoza karaŋa. ’Bo gbore nasuna aku rodru na kpenya kine koru ya? 25Ŋutulo a ŋa kasu dridriŋini laga roromoki ’durodru ki a dridriŋi na mita gele kugbo lepe ilo wiwinya wiwinya ya? 26Kugbo ta laga ani romoki kondra kulia naga ’bazi ’bazi kine de, ta wiwinya wiwinya ku kuliata ku’de kine gbandra ya? 27Yoleta kulia ti koturo kine ku ’duuzo nasikona. Ko ani kondra kita tro, ani wiwizo pata, ’bo na takindra ta, Solomona ku mugu ku ’bu’busi nanyena kpe, aku sozu mugu i kpele be nasiko nade. 28Kugbo Ŋun lo zubu drorulo de, laga indikinina ’du, ’bo imalu biriŋozi i kima, lepe aka rodru sozu na ta ku bongolani, ta laga ku rugo a natri kilo deni ya? 29Ku gagata ŋo laga ma ta ku nyonyo kugbo ma ta ku mozu‚ ’bo ku sasakata ku ’do’do na teiliko. 30Zuro ti ka kilo giri ga’yu kilo kapa de‚ ’bo Monye lasulo adeni adi ta miyundro ko. 31Troru galeta tumata na lepena, kilo kapa de giri iyeyeŋundra kasuni itro. 32“Ku kukuzeta tro, ta laga a moniza naga ’baziŋa na kebilizi kilo de, igbonaga Monye lasulo nyadru koru tikindra ta tumatana ina. 33Togboreta kapa kasu kilo, tikita a ’doketa, ’delakita ’beri uŋgbolokozi laga ani tutuzo kilo, ku tokorine i ’diko yu naga ani lengana, i piri naga kolani ani yenga yu, naga ’de’diya ani kokorozu tro nu. 34I piri naga ma tokorine nasuna gbo’dini nu, teiliko kasu kilo kulu gboloŋara we yu itro. 35“Riteta ri kapala kasu ti mukoto kine, ti kimazi kasu kine ti kobi kobu. 36Gbo’dita be ŋutulu lo mondru mata laselo, kugbo lepe ilo iyiyite i tokomona na ’depani nokanana yu. Kugbo lepe lo yeŋundra itrutrungo kakana, ’bo ko iŋakindra lepe wuleŋa gele. 37Koŋo na’buna ina i kulu upi de, laga kugbo mata lasikolo lo yeŋundra, ku rumbi ti ko kilo i tizu. Na takindra ta a ’diri, lepe iridro kapa nanyena, itogbi’dikindra ko i nyosuni, ’bo lepe ipopondra i tikindra na ko nyosu. 38Ŋona ku lepe lo yeŋundra tukaze kide, kugbo i trari na ka, ku lepe lo ’bunyekindro ko de, upi laga be kilo de kilo kilo i koŋo na’bu. 39’Bo deneta de, kedri kodro kugbo monye’balo laga adeni luŋa laga ma kolanilo pondri ilo, kedri kodro aka kolokindro kadi nanyena i ’beleŋoni. 40Kuwade gbo’dita go, igbonaga Ŋiro lo ŋutulo ilo ipondra i luŋa laga ta aku yolo katani ina.” 41Petero druga piza adi, “Mata, do tazu kine kulia na guguma de ku yi ka’delo, kugbo ku ŋutulu giri ya?” 42Matalo druga teyitokindro lepe adi, “Ŋa laga a kakitani laga ku teili lo to’diri ku tobodo itro laga mata lo lepelo romoki kolokindro ŋutulu kanye laga i ’bani kilo ku lepeni, ma lepe tikindra ko nyosu nasikona i baŋe naga soso ya? 43Koŋo na’buna ina ku upiye laga ma mata lo lepelo ku ’bunyekindri ti ilo kondra delo. 44Na takindra ta a ’diri‚ lepe i’delakindra lepe a katiyuni lo kapa kanye kilo giri. 45’Bo kugbo lu upiye de lo kulia kanye teili yu adi, ‘Mata liolo a’dutoro,’ druga poki i kidro kakita lalalia ku nawate kine, pokini kuru i nyosu, i mozu, i mera, 46mata lo lu upiye de iyeŋundra i luŋa laga lepe aku yuluki, i sawa laga lepe aku deni lu. Lepe idedepe dedepe lepe, itikindra lepe i saka kasi ŋutulu laga ’ba teiliko ti to’diri kilo kugele. 47’Bo kugbo upiye ŋanilo laga adeni kulia naga ma mata lonyelo ma nyadri kine, ’bo kugbo aku kukundra pirina, aku kondra be naga ma lepe nyadrinina, lepe i’bi’bito koru. 48’Bo ŋutu laga aku denilo, ku kondra ŋo laga ma lepe kpinyani ilo‚ lepe i’bi’bito ’baziŋa. Ŋutu laga a ti kapa rodrilo‚ lepe imakani kapa kilo rodri. Ŋutu laga ma kolokini kapa rodrilo, kapa laga arodru kilo imaka ku lepeni ’do. 49“Na pondra i mokakindra na kana ku kima. ’Bo na kodro nyadru rumbi ti kima ŋanina akobu azo! 50Baputizi lo i’de nalo kata‚ ’bo teili liolo igbo’da tomoni koru ti inga lepe aku konu mugu kanye piri yu! 51Ta rambu adi na pondra i tikindra na teili lo trotro i kani ya? Na takindra ta adi‚ ’Bayi, ’bo na zondra kora na ’beri. 52’Bo ŋiyoro tinade ŋutu laga mukana i kadi nagele kilo ikokoru ’beri, musala kilo ku mure kilo, ’bo mure kilo ku musala kilo. 53Ku monye ikokora seku ŋiro, ku ŋiro seku monye, ku ŋote seku ŋiro ’diye nanyena, ku ŋiro ’diye seku ŋote, ku moke seku noka nanyena, ku noka seku moke nanyena.” 54Yesu druga takindra mongoyo ti ŋutulu kilo adi, “Ku ta lo medra lurulo lu ŋiyu i ’doro na kolona yu, ta kulia wuleŋa adi, ‘Lilimalo ilo iyeyeŋundra,’ ’bo igbogbo’da de. 55’Bo ku ta bonga kobuŋena na burundra yeki yu, ta kulia adi, ‘Ina de kana isasa’yu’, ’bo ŋo ŋani igbo’da de. 56Ta a katoŋulupa! Ku ta roromoki tritrimba kulia ti konye ti kana ku ’dikona de, ta ani romoki tritrimba kulia ti ina baŋe de kine gbandra ya? 57“Ta ani lilikindra ’beri kulia naga soso kine gbandra ya? 58Kugbo ta lo tu seku katurani lolulo ku kaŋerani lo kulialo i koŋo yu, ku ta laga inga kilo i kikoni, morita ku teili giri i kukundra na kulia seku lepe, ka’bi lepe ku zonga do ku kaŋeranilo i koŋo yu, kaŋeranilo ka’bi ku tikindra do ku katiyu kiloni, katiyu kilo ka’bi ku todya do i kadi naga a drodrorena kata yu. 59Na takindra do, do aka lupundro yu deni ti inga do aku roba limbi na sentetana.”

will be added

X\