LUKA 10

1I bo na kine kulia de‚ Matalo anyumundro ŋutulu ku’de meria burio‚ druga sonyodru ko kanye koŋo yu mure mure mu pirito naga ma lepe ku mugu iutuni kata yu kine. 2Lepe druga takindra ko adi‚ “Kinyo kilo atrora rodri azo‚ ’bo kakita kilo ’baziŋa. Kuwade maketa Mata lo ’didralo ti sonyoro kakita ku’de kanye ’didra yu. 3Pilarata kasu kikoli yu‚ boŋeta‚ na sonyodru ta be torila ti kebilizi i dridriŋi na rarawuki. 4Ku babarata uŋgbolokozi tro‚ ku zurua tro‚ ku kamuka. Ku roromata ku le’de ŋutu i kiko yu. 5Ku ta laga alubo i kadi naga yaya‚ taneta a kayona adi‚ ‘Ti teili lo trotro gbo’dini i ina kadi de!’ 6Kugbo ŋiro lo teili lo trotro lu i nu kadi de‚ ti teili lo trotro lasulo sakani ku lu ŋiro de ki yu‚ kugbo ’bayi‚ ti teili lo trotro lasulo yiteni bo kasuni. 7Nyenaga sakanita i nu kadi de‚ i nyosu ku i mozu na kapa giri laga ma tiyini ta kilo‚ igbonaga kakitanilo romoki ku rekini nyosu nanyena. Ka’bi ta ku woworotu woworotu i ku’de kadizi. 8I kezi naga yaya ku ta laga alubo‚ ku ko arugo ta‚ nyosunita kapa laga ma ko tikindri ta kilo. 9Toruneta ŋutulu laga ku ’beri mimiye i nu kezi de kilo‚ ’bo takita ko adi‚ ‘Tumata na Ŋun ina ayeŋundra nyogoŋa kasuni.’ 10’Bo i kezi naga yaya ku ta laga alubo‚ ’bo ku ko laga aku rugo ta‚ lubita i kikoli ti lepe kilo kata yu‚ ’bo kulianita adi‚ 11‘’Dibani kodro putru ti kezi nasu na ’deba kaya mukuzi kine kpe‚ yi kilo trutrungo trutrungo ka kasu ’berini, ’bo deneta a ’diri adi tumata na Ŋun ina ayeŋundra nyoga kasuni.’ 12Na takindra ta adi i lu so de kulia ti Sodoma kine igbo’da pa’de’de alangu kulia ti nu kezi de kine. 13“Dreliana ina a nasu Korazina! Dreliana ina a nasu Betesaida! Kazu kodro ku konesi naga ku teriŋi na kona konuni kine de kona Turo yu ku Sidona‚ kazu kodro ko alopugo teiliko ’bero i gbi’diki nasiko naga i lopotrotro kata‚ ti ko asozu ’beri ku trerekese nu de. 14’Bo i luŋa lo ŋerani kulia lu‚ kulia ti Turo ku ti Sidona kine igbogbo’da pa’de’de alangu kulia kasu kine. 15Do naga Kaperinauma, do iŋiŋiyuzi ki i ’diko yu ya? Do itetemizozi ka i piri na ŋutulu laga atatuwa nu. 16“Ŋutu lo yinga talo ŋolo yinga na, ’bo ŋutu lo pazu talo ŋolo pazu na‚ ’bo ŋutu lo pazu nalo pazu Ŋun lo sunyundro nalo itro.” 17Nyenaga ŋutulu laga meria burio kilo ayite ku nyola‚ ko adi‚ “Mata, ’dibani kodro dreria loro kilo kpe‚ ko ayinga kukuzu nikana ku kari konu kine!” 18Lepe druga teyitokindro ko adi‚ “Na abonga Satani i ’duu ki yu beti mo’yu na piya. 19Boŋeta‚ na atikindra ta teriŋi na rogi ta munuo‚ ku longo’dio, ku na rodri ta teriŋi giri na mirikulo. ’Bo ŋo lo ikondra ta aloro ’bayi. 20’Bo ku nyonyolata ku kine kulia de adi yukala kine yiyinga ta‚ ’bo nyolanita igbonaga kari kasu kine awuro i ’diko yu ina.” 21I lu so de Yesu anyola ku Yuka Nakiyena druga kulia adi‚ “Na tikindra do iyete Monye‚ Mata lo ’dikolo ku lo kalo‚ igbonaga do a’dandru kine kuliata de i konye ti ŋutulu laga ku totore‚ ku laga ku dendra kilo‚ druga do ku kpewundra ko ku ludriko kiloni ina. A ’diri Monye‚ kine de a na’bu konu konyeni. 22Monye liolo atikindra na kulia kine giri kuwe kenini. Le’de ŋutu ’bayi laga adeni adi Ŋirolo ŋolo a ŋa‚ gele ’du Monyelo ka’delo, ’bo laga adeni adi Monyelo ŋolo a ŋa‚ gele ’du Ŋirolo ka’delo ku ŋutulu laga ma Ŋirolo nyadri trukokindro ko kulia kine kilo.” 23Yesu druga lopukozi ku lotodiniki kanye kilo yu‚ druga takindra ko ti kara ka’delo adi‚ “Konye lo medra kulia naga ma ta medri kine kilo ko gbo ku koŋo na’bu! 24’Bo na takindra ta a ’diri adi kakeyo ku mataki rodri‚ ko kodro nyadru bonga na kuliata naga ma ta bongi kine de‚ ’bo ko aku bo‚ ko kodro nyadru yinga na kuliata naga ma ta yingi kine de‚ ’bo ko aku yi.” 25Nyenaga katogoloni le’de lo kukuzuna aŋiye ki i modyu na Yesu‚ adi‚ “Katogoloni, ma na kondra inyo naga ma na rumbi ru naga ani lengana ya?” 26Yesu druga piza lepe adi, “Kulia na wuro i kukuzuna kata yu kine adinyo ya? Do kendra adinyo ya?” 27Ŋutu ŋanilo druga teyitokindro lepe adi‚ “Nyare Mata Ŋun lolu ilo‚ ku teili lolu ilo giri‚ ku ru nonuna giri‚ ku teriŋi nonuna giri‚ ku rambu nonuna giri‚ ’bo nyare ŋutulu laga konu gurubeni kilo be na nyadrini do muguna.” 28Yesu druga takindra lepe adi‚ “Do ateyitundro kulia kine soso‚ kone de‚ nyenaga do irurumbi runa.” 29’Bo igbonaga lepe nyadru to’budya muguna, lepe druga piza Yesu adi‚ “ ’Bo ŋutulu kilo a kuŋa laga kuwe gurubeni kilo?” 30Yesu druga kulia adi‚ “Kazu le’de ŋutu aŋiyu Yerusalema yu‚ lu tu Yeriko yu, druga ku momora ku kariaka ku’de i kiko‚ ko druga riariakara bongola ti lepe kine‚ druga kikiri lepe de‚ ko bulo pilara‚ ti akolokindro lepeŋa nyogoŋa ku ’doro. 31Nyenaga ka’i’ilani le’de ma lu pondra i kiko ŋanilo. Ku lepe laga abonga ŋutu ŋanilo‚ druga girara i merete. 32Druga Levitio le’de lo pondra. Ku lepe laga ayenga i piri ŋanina‚ ku abonga lepe‚ druga girara do i merete. 33’Bo ti Samariatio le’de ma lu i pondra i lu kiko de‚ druga yeŋadru ku lepe yu. Ku lepe laga abonga, druga gbo ku ediyo ku lepe, 34druga utu ku lepe i laga yu, druga totoroza ’dikasi ti lepe kine‚ druga ’bugo wele ku suwe ti konye ti zabibu kine kini, druga ’dukukindro lepe kanye drongi kini, druga zonga lepe i kadi na komona kata yu i tizu na lepe. 35Ku gbo’dini imalu de, lepe druga ’dutundro riye mure, atikindra monye kadilo, druga takindra lepe adi, ‘Tine lepeŋa, ku do laga akokorozu ku’de riye i kine de kini, ku na laga ayite, na bulo ku teyitokindro do konu kine.’ 36Ŋa laga i dridriŋi na kilo ŋutulu laga musala kilo de, do rambu adi lepe a wori lo ŋutu lo momora ku kariaka kilolo?” 37Katogoloni lo kukuzunalo druga teyitokindro lepe adi, “A ilo ŋutu lo gbo’da ku ediyo ku lepe ilo.” Yesu druga taki ndra lepe adi, “Uti ku kone de.” 38Nyenaga ku ko laga kulu tutu, Yesu druga lubo i ’ba le’de kata yu, druga ne’de noka nye naga Marita rukodru lepe kanye kadi yu. 39Sase na lepena nye naga Maria na gbi’diki ku Matalo i mukuzini na yinga kulia ti lepe kine. 40’Bo ti Marita ma nu sasandru mugu ku kitazi koru, lepe druga tu ku Yesu yu, druga kulia adi, “Mata do aku yo adi sase niona akolokindro na i kitani ka’delo ya? Taki lepe ti loke na.” 41Matalo druga teyitokindro lepe adi, “Marita, Marita, do ina wiwinya wiwinya ku kuliata rodri. 42Ŋo lo nyara ilo ilo gele ’du ka’delo. Maria agelundra ŋo laga a lo’bu laga aka ninazi ku lepeni ilo.”

will be added

X\