LUKA 1

1Ŋutulu rodri a’deba kita na wuroni kuliata naga na kondra ’beri kaya dridriŋini kine‚ 2be naga ŋutulu laga lo medra kulia kine ku konye kase kilo ku lo kondra kita ŋanina ma puputukindri yi ina. 3Kuwade Teofilo‚ do laga lo sopo korulo‚ na arambu a na’bu‚ nyena wurokindri na do kuliata ŋani kine giri soso‚ igbonaga na akepodru bo ŋanina soso ŋiyu i lu so de ina. 4Na nyadru adi dene kulia naga mo do togoloni kunu de adi ko a kulia naga mŋgba. 5I luŋa laga ma Herode gbo’dini a mata lo Yudaya kazuna, le’de ka’i’ilani‚ kari ti lepe kine se naga Zakaria, lu i dridriŋi na tomore na Abiyana. Noka na lepena a ŋiro naga i kadi na Aronana‚ kari ti lepe kine se naga Elisabeta. 6Ko mure katru a ŋutulu laga mŋgba ku Ŋun i koŋoni‚ ’bo ko asobu kukuzuki ku ŋeresi ti Matalo kine giri‚ ’ba kulia naga na sosoyi sosoyi. 7Ko ’ba ŋiro‚ igbonaga Elisabeta ŋanina a undo ina‚ ’bo ko mure katru ayeŋundra gbo’di a modoŋa. 8Nyenaga kugbo i baŋe na tomore na lepe na kondri lepe kita na ka’i’ilani ku Ŋun i koŋoni‚ 9beti ka’i’ila ma kondrina‚ kita na lepena a na lubini lepe i ’udya na libani i kadi na Matalona kata yu. 10Ti mongoyo na ŋutuluna ina i magu kaŋo yu i luŋa lo ’urani libanilo. 11Druga malaikata lo Matalo lo puru ku lepe i go lo lutatelo i piri naga a ’uretana i laga yu. 12Ku Zakaria laga amedra lepe de‚ druga zazangu, druga kuze na ’deba lepe. 13Malaikatalo druga takindra lepe adi‚ “Zakaria, ku kukuze‚ igbonaga magu nonuna ayiŋa ina. Noka nonuna Elisabeta iyuyuŋokindro do ŋiro lalale‚ ’bo do igbizo lepe a Yoane. 14Do inyonyola koru‚ ’bo ŋutulu rodri igbogbo’da ku lominye ku yuŋe na lepena‚ 15igbonaga lepe igbo’da a druma ku Matalo i koŋoni ina. Lepe aka mozu suwe ti konye ti zabibu ku yawa naga potroru kineni. Lepe ilo izozore ku Yuka Nakiyena, ŋiyu ku ŋote i pele yu. 16Lepe ilolopukoro ŋutu ti Isiraeli kilo rodri ku Mata‚ Ŋun lasikolo yu. 17Lepe iworo ku Ŋun i koŋo yu ku teriŋi koru be na Eliyana‚ i lopugo na teiliko ti monyezi kilo ku ŋazi kasiko kilo yu‚ ŋutulu laga ’ba sobu na kulia kilo ma gbo’da ku yoyolozu na ŋutulu laga mŋgba kilo‚ ma ko kukuna a ŋutulu ti Matalo.” 18Zakaria druga piza malaikatalo adi‚ “Na idendra kine kulia de adidinyo ya? Na gbo’di a tomodoŋa, ’bo noka niona gbo’di a ŋutu naga alenga itro.” 19Malaikatalo druga teyitokindro lepe adi‚ “Na a Gabirieli, lo lira ku Ŋun i koŋolo. Na sunye i kulia ku do‚ i kipikindro na do ina kuu na’buna de. 20Mete‚ kutu nonuna i’di’diza, do iyiŋa tali‚ do ’baka kuliani yeŋadru tozo i luŋa lo yeŋundri kine kulia de lu‚ igbonaga do aku rugo kulia kuwe naga na ikondra ’beri kasiko i baŋe yu kine ina.” 21Nyenaga ŋutulu kilo amomondru Zakaria‚ ’bo koŋa druga rambu ’beri koru ku ’dutoro na lepe naga i kadi na Ŋun ina kata yu ina. 22Ku lepe laga alupundro kaŋoni‚ lepe gbo’di ani romoki kulia ku ko. Ko druga yo’yu adi dena lepe amedra ŋo laga a rube kadi kata yu‚ igbonaga lepe gbo’di kpekindra ŋutulu kilo kulia kine ku keni‚ ’bo gbo’di kutu na lepena a’diza kaŋo ina. 23Ku luŋa ti lepe laga lo kitaniki i kadi na Ŋun ina kata yu kilo laga alenga‚ lepe druga tutu kanye ’ba yu. 24I bo na kulu luŋa de noka na lepena Elisabeta druga riondru ’busa‚ druga mumugo mugu i ’ba yu yapazi mukana‚ ’bo lepe adi‚ 25“Matalo kondra kuweni de i luŋa laga ma lepe boŋundri na ku ’busa na’bunalo, i ’dumadru na yukuwe niona kaŋo ku ŋutulu kilo i dridriŋini.” 26Nyenaga i yapa lo bukiyelo katani‚ Ŋun druga sonyodru malaikata laga Gabirieli i kezi na luŋu a Nazareta ina yu‚ 27ku ne’de ’diye naga le’de ŋutu nye laga Yosefa ma ’do’ini ina yu. Yosefa ŋanilo a lo kadi na Dawidina, ’bo ’diye ŋanina nye naga Maria. 28Nyena pondri malaikatalo ku lepeni‚ druga romu ku lepe adi, “Do naga na ’doka ku ’busa na’buna‚ koŋona ya! Matalo ilo seku do kugele.” 29Kugbo Maria naga amedra lepe‚ teili lo lepelo druga ’du’duki ku rome lo lepe laga ilo de‚ ’bo lepe druga piza mugu adi ilo rome de a rome laga adinyo. 30Malaikatalo druga takindra lepe adi‚ “Maria‚ ku kukuze‚ igbonaga do ariondru ’busa na’bu ku Ŋun i koŋoni ina. 31’Bo mete‚ do iriondru ŋiro konu peleni‚ ’bo do iyuyuŋundro ŋiro lalale‚ ’bo kari kine igbio a Yesu. 32Lepe igbo’da a druma‚ lepe iluŋu a Ŋiro lo Ŋun laga Ki koru ilo. Mata Ŋun ilo itikindra lepe i gbo’da a mata be na Dawidi‚ merenye lo lepelona. 33Lepe lo igbo’da a mata‚ i’deba tumata na ketimi na Yakobo ina a pii‚ ’bo tumata na lepena ’baka lengani.” 34Maria druga piza malaikatalo adi‚ “Kine kulia de iyeŋundra kuweni adidinyo‚ ku na ’ba lale ya?” 35Druga malaikatalo teyitokindro lepe adi‚ “Yuka Nakiyena na ipondra ku gbi’diki konu kini‚ ’bo teriŋi na Ŋun laga Ki koru ilona nyena imugo do. Kuwade ŋo laga a lokiye lo iyuŋu do lu iluŋu a Ŋiro lo Ŋun. 36’Bo mete‚ sosu naga Elisabeta lepe ’do ariondru ŋiro lalale kanye tomodoŋani. Ilo de gbo’di a yapa lo lepe laga a togi bukiyelo, lepe na luŋu kazu adi a undona. 37’Bo ku Ŋun yu le’de ŋo lo gbo’da a riŋi ’bayi.” 38Maria druga kulia adi‚ “Mete‚ na a upiye na Mata. Ti kulia kine gbo’dini kuweni be naga mo do kulianina.” Malaikatalo druga ŋiŋiyoro ku lepe i lagani kaŋo. 39I kulu luŋa de Maria druga ŋiŋiyoro druga pilara i utu wuleŋa gele i ka naga ku meria nu kata yu‚ i kezi ne’de na Yudayana kata yu‚ 40druga lubo ku Zakaria kadi yu‚ druga roroma seku Elisabeta. 41’Bo kugbo Elisabeta naga ayinga rome lo Marialo, rimatalo druga lalatu ku lepe i pele yu. Elisabeta druga zozore ku Yuka Nakiyena. 42Lepe druga kulia ku roro laga gboŋa adi‚ “Ti do purani pura i dridriŋi na wate kine‚ ’bo rimata laga konu pelenilo ti purani pura itro! 43’Bo kine kulia de yeŋundra kuweni adidinyo, naga ma ŋote na Mata liolo pondri kuweni kine ya? 44Mete‚ na ku yingi roro laga mo do romani ku nalo‚ rimatalo druga lalatu ku nyola kuwe peleni. 45’Bo koŋo na’buna ina a na ŋutu naga arugona, igbonaga kulia naga ma Matalo trukokindri lepe kine itotorumokindro ’beri ina.” 46’Bo Maria druga kulia adi‚ “Na ina pudya Matalo‚ 47’Bo na gbo ku nyola koru ku Ŋun‚ Kariteni liolo‚ 48igbonaga lepe amedra dreli na upiye nanyena ina. ’Bo mete‚ ŋiyoro tinade ŋutulu kilo giri ilungu na a na koŋo na’bu‚ 49igbonaga Ŋun laga a riŋilo akonakindra na kulia naga a riŋiko koru ina‚ ’bo kari ti lepe kine a nakiye. 50Lepe gbo ku ediyo ku ŋutulu lo kuga nye kilo‚ mu yuŋeto. 51Lepe akpeza teriŋi nanyena ku keni lonyelo, lepe ateriri ŋutulu lo woro ku sisinga na ’beri kilo kaŋo ku kulia ti ’dela na ramesi kasiko kine. 52Lepe atemizundro riŋiko kilo ka kasiko i tumataki yu‚ ’bo lepe a’biludru ŋutulu laga ka kilo ki yu. 53Lepe atozodru ko laga ku mago kilo ku kapa lo’bu, ’bo lepe asonyodru korineko kilo kana. 54Lepe arambu kulia ti koŋo na’bu nanyena kine‚ nyena logini lepe kalokoni lonye laga Isiraeli, 55be naga ma lepe takindri merenye lika laga Abarahama, ku nyomo ti lepe kilo ’duu ina.” 56’Bo Maria druga saka seku Elisabeta beti yapazi musala de‚ bulo ku yitozi bo kanye ’ba yu. 57Kuwade kugbo luŋa lo Elisabeta lo ta’dulo laga aromoki, lepe druga ta’duundra ŋiro lalale. 58Ŋutulu laga ku lepe i gurubeni kilo ku maratezi ti lepe kilo ku ayinga adi Matalo atikindra lepe koŋo na’bu, ko druga nyonyola koru ku lepe. 59’Bo i bo na luŋa budro‚ ko druga utu i taadru na ŋirolo‚ druga ko kodro gbizo lepe a Zakaria ku kari ti monye kine. 60Ŋote druga teyitokindro ko adi, “Ka’bi ku gbigbio de‚ ti lepe gbioni a Yoane.” 61Ko druga takindra lepe adi‚ “Le’de ŋutu ’bayi kasu kadini laga aluŋu ku kine kari de.” 62Druga ko kodra monye lo lepelo ku keni i piza na lepe ŋona lepe nyadru ti ŋirolo gbioni a ŋa. 63Lepe druga magu ŋurupi naga a wure‚ druga wudyo adi‚ “Kari ti lepe kine se naga Yoane.” Ŋutulu giri druga rambu ’beri koru. 64Wuleŋa gele kutu na Zakariana druga ŋaŋa mugu‚ ’bo ŋede lo lepelo druga lalaka‚ lepe druga poki i kulia i pudya na Ŋun. 65’Bo ŋutulu laga kasiko i gurubeni kilo giri druga poki i kuze. Kine kuliata de druga kuworo kaŋo yu i ka naga ku meria Yudaya yu nu. 66’Bo ŋutulu laga lo yinga kulia ŋani kilo druga ’de’ya ko kase teilikoni, ’bo ko druga piza ’beri adi‚ “Kulia ti ilo ŋiro de kine igbo’da adidinyo ya?” Ti teriŋi na Matalona ina ku lepe kinina. 67Monye lo Yoanelo Zakaria druga zore ku Yuka Nakiyena, druga poki i trugo na kulia ti Ŋun kine adi‚ 68“Ti Mata‚ Ŋun lo Isiraeli ilo purani pura‚ igbonaga lepe alogu ŋutulu kanye kilo i dakundra na ko ina. 69Lepe atoŋizu Kariteni laga a riŋi lo ritundro yi‚ lo lupundro ku kalokoni lonye laga Dawidi kadilo. 70Be naga ma lepe puputukindri kazu kakeyo kanye laga a lokiye ti ’bero kilona‚ 71adi ma yi ku rite ku mero kaya kilo yu. ku ŋutulu lo ŋmoza yi a loro kilo i kenisi yu itro. 72Lepe atikindra yi koŋo na’bu be naga ma lepe sarakindri kazu merenyezi kaya kilona‚ igbonaga lepe arambu kulia ti tomore nanye nakiyena kine 73ku koyo naga me lepe sarakindri merenye lika laga a kayo Abarahama ina. 74Lepe kazu asadru adi nye inininu yi ku mero kaya kilo i kenisi yu‚ ma yi ku kugi nye ’ba kuze‚ 75ku logbiye laga a lokiye ku laga mŋgba ku lepe i koŋoni mu luŋa laga ma yi sakani zoru kilo giri. 76’Bo do laga a ŋiro ilo‚ do iluŋu a kakeyoni lo Ŋun laga Ki koru ilo‚ igbonaga do ilo iworo ku Matalo i koŋo yu i kukundra na kikoli ti lepe kilona‚ 77Do itikindra ŋutulu kanye kilo i dendra adi ko iririte ku ’diya na torozi kasiko kine‚ 78ku ediyo lo Ŋun lika laga a lo tumadalo, i luŋa laga ma wara na ka na ŋiyuni ki yu i yeŋundra kayani lu. 79Do itikindra ŋutulu lo saka i mude kata yu ku i piri naga ku tuwa i laga yu kilo parara‚ ’bo do i’dolakindra yi kuwe i kiko lo teili lo trotrolo katani itro.” 80Ŋirolo druga ’dudyo ku iŋgbo ku teriŋi na yuka‚ ’bo lepe druga saka i diŋo yu yeŋadru tozo i luŋa laga ma lepe ku kpekini Isiraeli kilo lu.

will be added

X\