YUDA 1

1Yuda laga a upiye lo Yesu Kristolo, laga a luŋase lo Yakobolo, aroma ku ŋutulu laga aluŋu‚ laga lo saka i nyadru na Ŋun Monyelo katani laga ma Yesu Kristo tizi kilo. 2Ediyolo‚ ku teili lo trotrolo ku nyadruna ti ’yale ’ya ’beri kasuni. 3Na kodro nyadru wurokindro ta ku­lia ti rite naga ma yi ŋarundri kasi ta kugelena kine‚ ’bo na ayo’yu adi nyadru ti na wuroki ta waraga i ma’yu na mugu ku ta ma ta ku momoroni ’duu ku kulia ti rugo naga kazu atiki ŋutu ti Ŋun kilo luŋa gele ’duna kine. 4’Bo ku’de kilo ŋutulu alulupuzo tali‚ lo gela kazu ’bero i rumbi na ina ŋera na kulia de‚ laga ani teminizo Ŋun kilo. Ko kilo lolopugo ’busa na’bu na Ŋun likalona a kiko lo konani konesi kase naga a ti yukuwe kine. Ko kilo renya Mata lika laga gele ’du‚ laga a Mata Yesu Kristolo. 5’Dibani kodro ku ta laga atodiniki kazu luŋa gele ku kuliata kine giri kpe‚ na nyadru toyulukindro ta adi Matalo aritundro zuru lo Isiraelilo Ezipeto kata yu‚ ’bo i bo ŋanina lepe atukarakindra ŋutulu laga aku rugo kilo. 6Yoleta kulia ti malaika laga aku tizu todruma na tiki kona kine, ’bo laga akolokindro piri nasikona kilo. Ŋun ilo tizu ko i mude naga kilikilina kata yu ku maaroki laga a ti paratra paratra kilo yeŋadru tozo i ŋera na kulia naga i luŋa laga a druma lu de. 7Yoleta kulia ti Sodoma ku Gomora ku kezino naga nyogoŋa yu kine, ŋutulu laga kata yu kilo akondra be na malaika kuluna‚ ko akondra konye lopi‚ akepodru bo na ki’beŋa naga ti yukuwe naga ka’de ka’de kine. ’Bo ko arumbi rope na toro naga a kima paratra paratrana ma ko ku gbo’dini a kpiyesi. 8Kilo ŋutulu de gbo de itro. Rudesi kasiko kine se na tikindra ko i kokorozu na ’beri kase kine‚ i redra na teriŋi na mataki kilo‚ i momorozu na malaika laga lo momo’yu kilo. 9’Bo kugbo malaikata laga a leŋgbere laga Mikaeli laga amoro ku kasosoyini lo kulialo i rerenya ku kulia ti opu lo Moselo‚ lepe aku togo’yu teili i sosozu na kulia naga a ’dateta kine ku lepe i muguni‚ ’bo akulia adi‚ “Ti Matalo ririŋe do.” 10’Bo kilo ŋutulu de ’dadru kuliata naga ko aku de kine. Kuliata naga ma ko dendri ku ’beri kase kine be na gboroŋa laga ani rambu kulia kilona‚ kunu kuliata de se na tukarakindra ko. 11Dreliana ina a nasiko igbonaga ko kondra beti Kaina‚ ko akolokindro ’beri i kepodru i bo na bayi na Balamana ku kulia ti rie na riye kine. Ko akaraki ku rerenya naga be na Korana. 12Ko kilo kokorozu nyosu nasu naga a momorena. Ko kilo tutunuza ’beri i mera ’ba yukuwe‚ ko kilo trereka ’beri ku yimo nase lepe ka’delona. Ko gbo be ’dikolo naga ’ba kudu kine‚ naga na burazi ku kobuŋeto. Ko gbo be kade laga ani trora konye kase baŋesini‚ laga atatuwa kaŋo‚ laga a’doto ku kukuri kasiko kine giri kaŋo kilo. 13Ko be pio ti suburi naga na latu ku teriŋi‚ konesi kasiko naga ti yukuwe kine puru be latu na pio ti suburi naga ku koputo kine. Ko a kasiri laga lo woworo a bada kilo, laga mude naga kilikilina ina ariritaki ko paratra paratra kilo. 14Enoka laga ayuŋe i yuŋe naga a togi burio i bo na Adamanalo‚ lepe kazu akezu kulia ti kilo ŋutulu de adi‚ “Mete‚ Matalo apondra ku malaika kanye laga rodri rodri kilo i ŋerakindra na ŋutulu kilo giri kulia 15i ŋedya na kulia ti katoronya laga ani teminizo Ŋun kilo giri a naro ku kulia ti konesi kasiko naga ma ko kondri ’ba teminizo na Ŋun kine‚ ku kulia ti kuliesi naga a naro na ta ŋutulu laga ani teminizo Ŋun kilo de itro i momorozu na Ŋun.” 16Kilo ŋutulu de kilo ngunguruto ngunguruto. Ko kilo a kamena. Ko kilo a kakepo ti bo na ki’beŋa kase lepe kine. Kutuzi kasiko kine tazu kulia gboŋa ku sisiŋa na ’beri. Ko kilo sobu ŋutulu laga ma ko rambi adi se iriozu le’de ŋo kasiko yu kilo. 17Ŋutulu laga ma na nyadri kilo‚ yoleta kuliata na ke lososonyo ti Mata lika Yesu Kristo kilo kine. 18Ko atakindra ta adi‚ “I baŋesi ti bo kunu ka’data kilo igbogbo’da, laga lo ikepodru bo na ki’beŋa kase lepe kine‚ ko laga ani teminizo Ŋun kilo.” 19Kilo ŋutulu de so lo tikindra korana i dridriŋi na ŋutulu‚ ko a ŋutu ti ka kilo‚ ’bo Yuka Nakiye ’bayi kasikoni. 20’Bo laga ta‚ ŋutulu laga ma na nyadri kilo‚ to’durodrita ’beri i rugo nasu naga a nakiye koru ina katani. Maketa Ŋun ku teriŋi na Yuka Nakiyena. 21Tineta ti ’beri i nyadru na Ŋun ina katani. Moneta ediyo lo Mata lika Yesu Kristo laga lo itikindra ta ru naga ani lenganalo. 22Gbo’dita ku ediyo ku ŋutulu laga ani lira tritri i rugo nasena katani kilo. 23Rituta ku’de kilo i ninundra na ko i kima kata yu. Gbo’dita ku ediyo ku ku’de kiloni‚ ku kuze. Ŋmoneta ŋmo bongola kasiko naga a mundri ku ki’beŋa ti mugu kine. 24Ti Ŋun purani pura‚ lepe laga lo romoki tizu ta adi ka’bi ta ku ’do’do‚ laga lo romoki tolubo ta kanye koŋo yu i mo’yuna kata yu ku nyola ilo. 25Ŋun laga gele‚ laga a Kariteni lika ku kulia ti Yesu Kristo Mata likalo kinelo‚ ti purani pura‚ ti gbo’dini ku todruma, ku teriŋi na tumatana ku teriŋi giri be naga kazu i suluki yuna tinade‚ paratra paratra. Amena.

will be added

X\