YOANE 9

1Ku Yesu i rosodruni, lepe druga medra ŋutu laga ayuŋe ku konye a mudumudu. 2Lotodiniki ti lepe kilo druga piza lepe adi, “Katogoloni, toro niŋa, kugbo na ilo ŋutu de, kugbo na kayuŋo ti lepe kilo, na tikindra lepe yuŋe ku konye a mudumuduna ya?” 3Yesu druga teyitokindro ko adi, “Ilo ŋutu de aku kondra toro tro, ’bo kayuŋo ti lepe kilo aku kondra itro, ’bo kitazi ti Ŋun kine ma kpeza ’beri ku lepe i muguni ’busa. 4Ti yi kone kitazi ti Ŋun laga lo sunyundro nalo ti inga kolona ina kata. Mudena ina ipondra, ’bo le’de ŋutu ’bayi lo romoki kondra kita ku mude. 5Ku na laga ilo i kani, na a parara na kana.” 6Kugbo lepe laga akulia de, lepe druga yagu kamula kani, miminizi lipona ku kamulu ŋani kine. Lepe druga ’borikindra lipona ku ŋutu ŋanilo i konyeni, druga takindra lepe adi, 7“Utini, ku lalane mugu i kare laga Siloama kata yu” (trugo adi‚ Sunyuzi). Kuwade lepe druga utu, druga lalazu, lepe druga pondra, amedra kana. 8Ŋutulu laga ku lepe i gurubeni kilo ku ko laga kazu amedra lepe ku lepe i mamakazu na kapazi kilo druga piza adi, “Ilo de ani gbo’da a ŋutu laga lo gbi’diki kazu i mamakazu na kapazi lu ya?” 9Ku’de kilo druga kulia adi, “Ŋolo a lepe.” Ku’de kilo adi, “ ’Bayi‚ kodro gbo be lepe.” Ŋutu ŋanilo druga kulia adi‚ “Ŋolo a na lepe.” 10Ko druga piza lepe adi, “Konye kolu kilo ŋazu ’beri adidinyo ya?” 11Lepe druga teyitokindro ko adi, “Ŋutu lo luŋu a Yesu ilo amiminiza lipo, a’boriza konye kuwe kilo, atakindra na adi, ‘Utini i Siloama yu ku lalane mugu.’ Kuwade na autu, druga lalazu, na druga medra kana.” 12Ko druga piza adi‚ “Lepe ilo ya ya?” Ŋutu ŋanilo adi‚ “Na aku de.” 13Nyenaga ko druga zonga ŋutu laga ayuŋe ku konye a mudumudulo ku Farisayo kilo yu. 14Luŋa laga ma Yesu miminizi lipona ku ŋazi konye ti lepe kilolo a luŋa lo sabatolo. 15Kuwade Farisayo kilo druga piza lepe ’do adi lepe medra kana adidinyona. Lepe druga teyitokindro ko adi‚ “Lepe a’boriza konye kuwe kilo ku lipona, na druga lalazu, na bulo medra kana.” 16Farisayo ku’de kilo druga kulia adi, “Ilo ŋutu de aku ŋiyu ku Ŋun yu, igbonaga lepe ani sobu luŋa lo sabatolona.” Ku’de kilo adi, “Ŋutu loro roromoki kondra kpiyesi naga kine de adidinyo ya?” Rerenya druga lupundro kasiko i dridriŋini. 17Ko druga kulia ’do ku ŋutu laga ku konye a mudumudulo druga piza lepe adi, “Lepe aŋazu konye kolu kilo, kuwade laga do‚ do kulia adinyo ku kulia ti lepe kine ya?” Ŋutulo druga kulia adi, “Lepe a kakeyoni.” 18Kuwade Yahudi kilo aku rugo adi lepe kazu gbo ku konye kilo a mudumudu, ’bo lepe gbo’di memedra kana, ti inga ko aku lungu kayuŋo ti lepe kilona. 19Ko druga piza koŋa adi, “Ilo de a ŋiro lasu laga ma ta kuliani adi lepe ayuŋe ku konye kilo a mudumudulo ya? Kuwade tinade lepe lo medra kana adidinyo ya?” 20Kayuŋo ti lepe kilo druga teyitokindro ko adi, “Yi adeni adi ilo de a ŋiro likalo, ayuŋe kazu ku konye kilo a mudumudu, 21’bo yi aku deni lepe tinade ilo medra kana adidinyo‚ yi aku deni ŋutu laga lo ŋazu konye ti lepe kilolo itro. Gbo’di lepe a golo. Pizinita lepe‚ lepe itatazu kulia kanye kine.” 22’Bo kayuŋo ti lepe kilo akulia de igbonaga ko akuze Yahudi kilona‚ igbonaga Yahudi kilo kazu atomodya kutuzi adi kugbo le’de ŋutu laga akpeza Yesu adi a Kristolo, ŋutu ŋanilo ti rikokini kaŋo i kadi naga a momorena katani. 23Nyena kuliani kayuŋo ti lepe kilo adi‚ “Gbo’di lepe a golo. Pizinita lepe.” 24Kuwade ko druga lungu ŋutu laga ayuŋe ku konye a mudumudulo luŋa laga a togi murelo, druga takindra lepe adi, “Tane kulia naga mŋgba ku Ŋun i koŋoni. Yi adeni adi ilo ŋutu de a ŋutu loro.” 25Lepe druga teyitokindro ko adi, “Kugbo lepe a ŋutu loro kuwa ’bayi, na aku deni. Na adeni ŋo laga gelelo, adi kazu na ku konye a mudumudu, ’bo tinade na gbo’di ilo memedra kana.” 26Ko druga piza lepe ’do adi‚ “Lepe kondra do adidinyo ya? Lepe ŋazu konye kolu kilo adidinyo ya?” 27Lepe druga teyitokindro ko adi‚ “Na atakindra ta azo‚ ’bo ta aku yinga. Ta nyadru yinga ’do gbandra ya? Ta nyadru i gbo’da a lotodiniki ti lepe kilo ya?” 28Ko druga ’da’dadru lepe‚ druga takindra lepe adi, “Laga do a lotodinikita lo lepe, ’bo laga yi a lotodiniki ti Mose. 29Yi adeni adi Ŋun akulia ku Mose, ’bo laga lu ŋutu de, yi aku de piri naga ma lepe ŋiyuni nu.” 30Ŋutulo druga teyitokindro ko adi‚ “Kine de a kulia naga na raramani ’beri, adi ta aku de piri naga ma lepe ŋiyuni nu, ’bo lepe aŋazu konye kuwe kilo! 31Yi adeni adi Ŋun ani yinga ŋutulu loro kilo, ’bo ku le’de ŋutu lo teminizo Ŋun, lo kondra beti naga ma lepe nyadrinina‚ Ŋun yiyinga lepe. 32Ŋiyu i sulukindra na kana yi aku yinga adi le’de ŋutu aŋazu konye ti ŋutu laga ayuŋe ku konye a mudumudulo. 33Kedri kodro ku ilo ŋutu de agbo’da ŋiyu ku Ŋun yuni, kedri kodro lepe ani romoki kondra le’de ŋo tro.” 34Ko druga teyitokindro lepe adi, “Do yuŋe mŋgbana i torozi kata‚ ’bo do togo’yu yi ya?” Ko druga droŋodru lepe kaŋo. 35Kugbo Yesu laga ayinga adi ko adroŋodru lepe, ku lepe laga ario lepe, druga piza lepe adi, “Do arugo Ŋiro lo ŋutulo ya?” 36Ŋutulo druga piza Yesu adi, “Mata, lepe a ŋa ma na rugi lepe ya?” 37Yesu druga teyitokindro lepe adi‚ “Do ameri lepe azo. Ŋutu lo kulia seku dolo ŋolo a lepe.” 38Ŋutulo druga teyitokindro Yesu adi‚ “Mata‚ na arugo.” Lepe druga ruguŋo ka ku lepe i koŋo yu i teminizo na lepe. 39Yesu druga kulia adi‚ “Na pondra i ina ka de ku kulia ti ŋera na kulia kine, ma ŋutulu laga ani medra kana kilo memedra, ’bo ŋutulu laga lo medra kana kilo ma yeŋundra ku konye a mudumudu.” 40Ŋutu ku’de ti Farisayo lo gbo’da kasi lepe kilo ku ayinga kine kulia de‚ ko druga piza lepe adi‚ “Laga yi konye kaya kilo a mudumudu itro ya?” 41Yesu druga teyitokindro ko adi‚ “Kedri kodro kugbo ta laga ku konye kilo a mudumudu, ta ’ba toro‚ ’bo ku ta kulia adi‚ ‘Yi memedra kana‚’ trugo adi ta kilo i toroni i piri.

will be added

X\