YOANE 8

1’Bo Yesu druga utu i mere laga Oliva yu. 2Kutumalu ’bero ’bero kugbo lepe laga alubo ’do i kadi na Ŋun ina kata yu‚ ŋutulu kilo giri druga pondra ku lepeni. Lepe druga gbigbi’diki ka‚ druga poki i togo’yu na ko. 3Katogolo ti kukuzuna kilo, ku Farisayo kilo druga zondra ne’de noka, amoka ti lepe nu kondra towute. 4Ko druga tolirakindra lepe kide kase dridriŋini, druga takindra Yesu adi, “Katogoloni, ina noka de amoka i kondra na towute lepe. 5I kukuzuna katani, Mose atakindra ŋutu kukuzu adi ti yi bibiriŋe wate naga be kine de kine ku ŋoropo. Laga do, do kulia adinyo ya?” 6Ti ko akulia kine kulia de i modyu na lepe, ma ko sosozi kulia ku lepe kini ’busa. ’Bo Yesu druga dula ka, druga poki i wudyo i kuzo kini ku lo’do lonyelo. 7Kugbo ko laga apipiza lepe ’duu, lepe druga ’bi’yu mugu ki, druga takindra ko adi‚ “Ku le’de ŋutu kasu dridriŋini laga ’ba torolo ti biriŋe lepe a nze.” 8Lepe druga dula ka yu ’do‚ i wudyo i kuzo kini. 9Ku ko laga ayinga de‚ ko druga lupodru gele gele kaŋo yu‚ sulukindra ku temezi kilo‚ Yesu lepe lo koloki ka’delo ku nokana ku lepe i koŋoni. 10Yesu druga ’bi’yu mugu ki‚ druga piza lepe adi‚ “Nokana‚ ko kilo yeda ya? Kasosoyi kolu ti kulia kilo ’bayi ya?” 11Nokana druga teyitokindro lepe adi‚ “Ŋutu gele ’bayi Mata.” Yesu druga kulia adi‚ “Na itro‚ na ani sosozu kulia konu muguni. Uti‚ ku kokonu toro ’do.”] 12’Bo Yesu atakindra ŋutulu kilo ’do adi‚ “Na laga a parara na kana. Ŋutu lo kepodru bo nionalo aka woro i mude katani, ’bo igbogbo’da ku parara na runa.” 13Farisayo kilo druga takindra lepe adi‚ “Do ’dodru bo nonu na kuliana ku mugu. Bo na kulia naga mo do ’dodri kine ani gbo’da a ti to’diri.” 14Yesu druga teyitokindro ko adi, “ ’Dia kodro ku na lo ’dodru bo nio na kuliana kpe‚ bo na kulia naga ma na ’dodri kine a kulia ti to’diri‚ igbonaga na adeni piri naga ma na ŋiyuni nu ku piri naga ma na utini nu itrona. ’Bo laga ta aku deni piri naga ma na ŋiyuni nu ku piri naga ma na utini nu. 15Laga ta kilo ŋedya kulia beti naga ma loŋutu ŋedyina. Laga na ani ŋedya kulia ti le’de ŋutu tro. 16’Bo ku na laga lo ŋedya kulia‚ ŋeresi kuwe kilo a kulia ti to’diri, igbonaga na ani gbo’da ka’delo, ’bo yi seku Monye lo sunyundro na ilona. 17I kukuzu nasuna katani awuro adi bo na kulia naga ma ŋutulu mure ’dodri kine a kulia naga mŋbga. 18Na a ŋutu laga lo ’dodru bo nio na kulianalo, ’bo Monye laga lo sunyundro nalo ’dodru bo nio na kuliana itro.” 19Kuwade ko druga piza lepe adi‚ “Monye lolulo ilo ya ya?” Yesu druga teyitokindro ko adi‚ “Ta aku deni na‚ ’bo ta aku deni Monye liolo itro. Kedri kodro ku ta laga adeni na‚ kedri kodro ta dedeni Monye liolo itro.” 20Lepe tazu kine kulia de i piri na ’delani riyena kata yu kanye togo’yu i kadi na Ŋun ina kata yu. Ŋutu ’bayi lo moga lepe‚ igbonaga luŋa lo lepelo inga aku yeŋundrana. 21Yesu druga takindra ko ’do adi‚ “Na lo iututu‚ ta igaga’yu na‚ ’bo ta itatuwa i torozi kasu kine katani. Ta ani romoki utu i piri naga ma na utini nu.” 22Yahudi kilo druga piza adi‚ “Lepe itatuza mugu a mugu ku naga ma lepe kuliani adi‚ ‘Ta ani romoki utu i piri naga ma na utini nu‚’ dena ya?” 23Lepe druga teyitokindro ko adi‚ “Laga ta gbo a ŋutu ti ka kilo‚ laga na a ŋutu lo ki. Laga ta ŋiyu i ina ka de‚ laga na agbo’da ŋiyu i ina ka deni. 24Kuwade na takindra ta adi ta itatuwa i torozi kasu kine katani‚ igbonaga ku ta aku rugo adi na a lepe ina‚ ta itatuwa i torozi kasu kine katani.” 25Ko druga piza lepe adi‚ “Do a ŋa ya?” Yesu druga ko adi‚ “Na a ŋo laga ma na takindri ta ŋiyu i suluki yulo. 26Na gbo ku kulia rodri na taki ta ku na ŋeŋera kasuni kine. ’Bo Ŋun laga lo sunyundro nalo nye laga mŋgba‚ ŋo laga ma na yingi ku lepe yulo‚ na takindra ŋutu ti ka kilo ŋo ŋanilo.” 27Ko aku yo adi lepe takindra se kulia ti Monyelo kine. 28Yesu druga takindra ko adi‚ “Kugbo ta laga a’biludru Ŋiro lo ŋutulo ki‚ ta idedeni adi na a lepe. Na ani kondra le’de ŋo ku kuwe nio‚ ’bo na tazu kine kulia de beti naga ma Monyelo togo’i nana. 29Ŋun laga lo sunyundro nalo ilo gbo seku na. Lepe aku kolokindro na ka’delo, igbonaga na kondra ’duu kulia naga na tikindra lepe nyola kine ina.” 30Ku lepe itazu na kine kulia deni ŋutulu rodri druga rugo lepe. 31Yesu druga takindra Yahudi laga lo rugo nye kilo de adi‚ “Ku ta lo sobu kulia ti togole lio kine ’duu‚ a ’diri ta a lotodiniki kuwe kilo. 32Ta idedendra kulia ti to’diri kine‚ kulia ti to’diri ŋani kine ilalakundra ta.” 33Ko druga teyitokindro lepe adi‚ “Yi a nyomo ti Abarahama kilo. Ŋiyu ’bero yi aku gbo’da a upi ti le’de ŋutu tro. Do kulia adi yi ilalaka adidinyo ya?” 34Yesu druga teyitokindro ko adi‚ “Na takindra ta a ’diri‚ ŋutu gele gele laga lo kondra toro ilo gbo a upiye lo toro. 35Upiyelo ani saka kadi yu ’duu tro‚ ŋiro lo saka ’duu. 36Kuwade kugbo Ŋiro laga alakundra ta‚ ta ilalaka a ’diri. 37Na adeni adi ta a nyomo ti Abarahama kilo‚ ’bo ta kilo ga’yu tatuza na na igbonaga kulia kuwe kine aku rumbi piri kasu katanina. 38Laga na tazu kulia naga ma na medri ku Monyelo yu kine‚ ’bo laga ta kondra kulia naga ma ta medri ku monye lasulo yu kine.” 39Ko druga teyitokindro lepe adi‚ “Monye lika a Abarahama.” Yesu druga teyitokindro ko adi‚ “Kugbo ta laga a ŋazi ti Abarahama, koneta kitazi ti Abarahama kine. 40’Bo tinade ta ga’yu tatuza na na‚ laga a ŋutu lo takindra ta kulia ti to’diri naga ma na yingi ku Ŋun yu kinelo. Abarahama kazu aku kondra de tro. 41Ta kondra kitazi ti monye lasulo kine.” Ko druga teyitokindro lepe adi‚ “Yi ani gbo’da a ŋazi ti towute uye. Yi gbo ku Monye gele laga a Ŋun.” 42Yesu druga teyitokindro ko adi‚ “Kedri kodro ku Ŋun laga a Monye lasu‚ ta kedri kodro inyanyari na igbonaga na ŋiyu ku Ŋun yuna‚ ’bo na ayeŋundra ilo de. Na aku pondra ku kuwe nio‚ ’bo lepe lo sunyundro na. 43Ta aku yo kulia naga ma na tazini kine gbandra ya? ’Bo ta ani romoki yinga kulia kuwe kine. 44Ta ŋiyu ku monye lasu laga a kasosoyini lo kulialo yu. Teiliko kasu kilo nyadru kondra ki’beŋa ti monye lasulo kine. Ŋiyu i suluki yu lepe a karemoni. Lepe ani lira i kulia ti to’diri kine katani‚ igbonaga kulia ti to’diri kine ’bayi ku lepe katanina. Kugbo lepe lo tazu kulia ti to’bure, lepe tazu kulia ti gbiyeri lonye lepe‚ igbonaga lepe a kato’bureni laga a monye to’burelo itrona. 45’Bo ta ani rugo na igbonaga na tazu kulia ti to’dirina. 46Ŋa laga kasu dridriŋini akpeza toro niona ya? Ku na laga lo tazu kulia ti to’diri kine‚ ta ani rugo na gbandra ya? 47Ŋutu laga lo ŋiyu ku Ŋun yulo yinga kulia ti Ŋun kine. Ku kine kulia de ta ani yinga‚ igbonaga ta aku ŋiyu ku Ŋun yuna.” 48Yahudi kilo druga teyitokindro lepe adi, “Yi akulia adi do a Samariatio, do ku dreri loro. A ’bure ya?” 49Yesu druga teyitokindro ko adi‚ “Na ani gbo’da ku dreri loro, ’bo na akuga Monye liolo‚ ’bo laga ta a’dari na. 50Na ani ga’yu todruma nio lepe. Le’de kata lo ga’yu lepe‚ lo igbo’da a kaŋerani lo kulialo. 51Na takindra ta a ’diri, kugbo le’de ŋutu lo sobu kulia kuwe kine‚ lepe ’baka medra tuwani.” 52Yahudi kilo druga teyitokindro lepe adi‚ “Tinade yi adeni adi do gbo ku dreri loro. Abarahama ku kakeyo kilo atatuwa‚ ’bo do kulia adi kugbo le’de ŋutu lo sobu kulia konu kine lepe ’baka wangu tuwani. 53Do arodru Abarahama, monye lika laga lo tuwa lu ya? Kakeyo kilo atatuwa itro! Do a’delakindra mugu a ŋa ya?” 54Yesu druga teyitokindro ko adi‚ “Ku na laga pudya mugu‚ pudya nio na muguna a ’busa, ’bo Monye liolo lo pudya na, laga ma ta kuliani adi, lepe a Ŋun lasu ilo. 55’Bo ta aku deni lepe tro, ’bo laga na, na adeni lepe. Ku na laga kulia adi na aku deni lepe, na igbo’da beti ta, a kato’bureni. ’Bo na adeni lepe, na lo sobu kulia ti lepe kine. 56Abarahama laga a monye lasulo anyola koru i medra na luŋa liolo. Lepe ameri luŋa ŋanilo, druga saka ku nyola.” 57Yahudi kilo druga piza lepe adi, “Kiŋazi kolu kilo inga aku yeŋundra meria mukana‚ ’bo do ameri Abarahama ya?” 58Yesu druga teyitokindro ko adi, “Na takindra ta a ’diri, ti inga Abaraham aku yuŋe ina, na kata.” 59Ko druga ’dumundra ŋoropo i bibiringo na lepe, ’bo Yesu a’danadru mugu druga lupodru i kadi na Ŋun ina katani kaŋo.

will be added

X\