YOANE 7

1I bo ŋanina Yesu aworo Galili kata yu igbonaga lepe aku nyadru woro Yudaya kata yu ina igbonaga Yahudi kilo kilo ga’yu tatuza na lepe ina. 2Ti kolo druma na Yahudi kilona gbo’di nyoga, na luŋu a na muruguzina. 3Kuwade luŋaseri ti Yesu kilo druga takindra lepe adi, “Ŋiyoroni i ina ka de, utini Yudaya yu ma lotodiniki kolu kilo medra kitazi konu naga mo do kondri kine. 4’Bo le’de ŋutu ’bayi laga kugbo lepe ga’yu dena nanye lo kondra le’de ŋo tali. Kugbo do laga ilo kondra kilo ŋo de, kpeki mugu ku ŋutulu ti ka kilo.” 5’Bo ’dibani kodro luŋaseri ti lepe kilo kpe, ko aku rugo lepe. 6Yesu druga teyitokindro ko adi, “Luŋa liolo inga aku yeŋundra, ’bo luŋa lasulo gbo de ’duu. 7Ŋutulu ti ka kilo ani romoki ŋmoza ta, ’bo ko kilo ŋmoza na, igbonaga na lo topurundro konesi kasiko naro kine ina. 8Utita i kolo drumana yu. Laga na ani utu‚ igbonaga luŋa liolo inga aku torumoki ina.” 9Kugbo lepe laga atakindra ko kine kulia de lepe druga saka Galili yu. 10’Bo kugbo luŋaseri ti Yesu kilo laga apilara i kolo drumana yu azo, Yesu druga pilara itro, lepe aku utu gboŋa‚ ’bo taliŋa. 11Yahudi kilo druga ga’yu lepe i kolo drumani‚ ’bo ko akulia adi‚ “Lepe ilo ya ya?” 12Ti mongoyo na ŋutulu kilona kulu momoŋoza lepe kase dridriŋi yu‚ ku’de kilo akulia adi‚ “Lepe a ŋutu lo’bu‚” ku’de kilo adi‚ “ ’Bayi‚ lepe ilo ’bo’boliza mongoyona.” 13’Bo le’de ŋutu ’bayi laga lo tazu kulia ti lepe kine gboŋa‚ ku kuzene na Yahudi kilona. 14Kolo drumala kine ku ayeŋadru kide yu‚ Yesu druga utu druga lubo i kadi na Ŋun ina kata yu‚ druga poki i togo’yu. 15Yahudi kilo druga rambu ’beri druga kulia adi‚ “Ilo ŋutu de adeni dendrana adidinyo, ti aku togolo ya?” 16Yesu druga teyitokindro ko adi‚ “Togole liolo ani gbo’da a lioŋa tro‚ ’bo a lo Ŋun laga la sunyundro na ilo. 17Ku le’de ŋutu laga lo nyadru kondra ŋo laga ma lepe nyadrinilo, ŋutu ŋanilo idedendra togole ilo‚ ŋona lu ŋiyu ku Ŋun yu‚ kugbo ku na tazu kulia ŋani kine a na lepe. 18Ŋutu laga lo tazu kulia ku kuwe nanyelo, ga’yu todruma nanye lepe. ’Bo ŋutu laga lo ga’yu todruma na ŋutu laga lo sunyundro nyelo‚ lepe laga a ’diri‚ kulia ti to’bure ’bayi ku lepe katani. 19Mose aku tikindra ta kukuzuna ya? ’Bo le’de ŋutu ’bayi kasu dridriŋini laga lo kondra kukuzu ŋanina. Ta ga’yu tatuza na na gbandra ya?” 20Mongoyona druga teyitokindro lepe adi‚ “Do gbo ku dreri loro. Ŋa lo ga’yu tatuza na do ya?” 21Yesu druga teyitokindro ko adi‚ “Na akondra kone gele‚ ’bo ta giri arambu ’beri. 22Mose atikindra ta taarona. ’Bo aku ŋiyu ku Mose yu‚ ’bo ku merenyezi kilo yu. I luŋa lo sabatolo ta lo taadru ŋutulu. 23Kugbo ŋutu laga lo rumbi taarona i luŋa lo sabatolo ma kukuzu na Mosena ka’bi ku kokorozu, ta aŋoma ku na igbonaga na atoruzo mugu na le’de ŋutu ayeŋundra soso i luŋa lo sabatolona gbandra ya? 24Ku ŋeŋerita kulia kine be naga ma ta medrina, ’bo ŋereta kulia kine ku ŋeresi laga mŋgba kilo.” 25Ku’de ŋutu ti Yerusalema kilo druga piza adi, “Ilo de ani gbo’da a ŋutu laga ma ko ga’i i tatuwilo ya? 26’Bo mete. lepe ilo kulia gboŋa, ’bo ko ani takindra lepe kulia. Ŋona drumala kilo adeni a ’diri adi ilo de a Kristo ya? 27’Bo yi adeni piri naga ma ilo ŋutu de ŋiyuni nu‚ ’bo kugbo Kristolo laga ayeŋundra le’de ŋutu ’bayi laga adeni piri naga ma lepe ŋiyuni nu.” 28Ku Yesu laga i togo’yu i kadi na Ŋun ina kata yu‚ lepe druga laiza adi‚ “Ta adeni na‚ ’bo ta adeni piri naga ma na ŋiyuni nu‚ ’bo na aku pondra ku kuwe nio‚ ’bo Ŋun laga lo sunyundro nalo nye laga mŋgba‚ ’bo ta aku deni lepe. 29Laga na adeni lepe‚ igbonaga na ŋiyu ku lepe yuna‚ ’bo lepe lo sunyundro na.” 30Ko druga ga’yu i moga na lepe‚ ’bo le’de ŋutu ’bayi lo ’delakindra keni ku lepe kini‚ igbonaga luŋa lo lepelo inga aku yeŋundra ina. 31’Bo ŋutulu rodri i dridriŋi na mongoyona arugo lepe. Ko druga piza adi‚ “Kristolo kuwa ayeŋundra, lepe ikokondra kpiyesi rodri alangu naga ma ilo ŋutu de kondri kine ya?” 32Farisayo kilo ku ayinga mongoyo na ŋutuluna imomoŋoza na Yesuni de‚ ka’i’ila drumala kilo ku Farisayo kilo druga sonyodru katiyu kase kilo i moga na lepe. 33Yesu druga takindra ko adi‚ “Akoloki ’baziŋa na igbo’da kasu dridriŋini, i bo ŋanina na itutu ku lepe laga lo sunyundro nalo yu. 34Ta iga’yu na‚ ’bo ta ’baka rumbi nani‚ ta ani romoki utu i piri naga ma na gbo’dini nu.” 35Yahudi kilo druga pipiza ’beri kase dridriŋini adi‚ “Lepe lu itu ku ŋutulu laga lo reki ku Giriki kilo i dridriŋi yu i togo’yu na Giriki kilo ya? 36Kulia naga ma lepe tazini kine adi‚ ‘Ta iga’yu na, ’bo ta ’baka rumbi nani‚’ ’bo‚ ‘ta ani romoki utu i piri naga ma na gbo’dini nu‚’ kine de trugo adinyo ya?” 37I luŋa lo duweni kolo drumala kinelo‚ luŋa ŋanilo a druma koru‚ Yesu druga lira‚ druga laiza adi‚ “Le’de ŋutu kugbo ku kure na pio‚ ti lepe pondri kuweni i mozuni‚ 38be naga kulia na wuwuro kine ma tazinina adi‚ ‘Ku ŋutu lo rugo nalo‚ kidia ti pio ti ru kine i wonu ŋiyu ku lepe i teili yu.’ ” 39Lepe tazu kine kulia de ku kulia ti Yuka Nakiye naga ma ŋutulu laga lo rugo nye kilo lo irumbi ina‚ ’bo Yuka ŋanina inga aku tiki igbonaga Yesu inga aku lubo i mo’yu nanyena kata yu ina. 40Kugbo ku’de ŋutulu i dridriŋi na mongoyona ayinga kine kulia de‚ ko druga kulia adi‚ “A ’diri‚ ilo de a Kakeyoni ilo.” 41Ku’de kilo akulia adi‚ “Ilo de a Kristo ilo.” ’Bo ku’de kilo akulia adi‚ “Kristolo ŋiyu Galili yu ya? 42Kulia na wuwuro kine aku kulia adi Kristolo ŋiyu i nyumuti lo Dawidilo Betelehema yu‚ i kezi naga ma Dawidi gbo’dini nu ya?” 43Kuwade rerenya druga lupundro i mongoyo na ŋutuluna i dridriŋini ku kulia ti lepe kine. 44Ku’de kilo ŋutulu anyadru moga na lepe‚ ’bo le’de ŋutu ’bayi lo ’delakindra keni ku lepe kini. 45Katiyu kilo druga utu ku ka’i’ila drumala ku Farisayo kilo yu‚ kulu ŋutu de druga piza ko adi‚ “Ta aku zondra lepe gbandra ya?” 46Katiyu kilo druga teyitokindro ko adi‚ “Ŋiyu ’bero ŋutu laga lo kulia be ilo ŋutu de ’bayi.” 47Farisayo kilo druga teyitokindro ko adi‚ “Lepe atoliaŋara ta itro ya? 48Le’de ŋutu i dridriŋi na drumala kilo kugbo Farisayo kilo arugo lepe ya? 49’Bo ina mongoyo na ŋutuluna de laga aku deni kukuzuna kilo‚ ko a lomo!” 50Nikodemo laga kazu apondra ku Yesunilo, laga kasiko i dridriŋinilo druga piza ko adi‚ 51“Kukuzu nikana bita ŋedya kulia ti le’de ŋutu kine ti inga kulia ti lepe kine aku yiŋa‚ kuwa konesi ti lepe kine ani dena a nze ya?” 52Ko druga teyitokindro lepe adi‚ “Do lepe lo niyu Galili yu itro ya? Gale ku mete adi kakeyoni ’bayi lo ŋiyu Galili yulo.” [ 53Ko druga utu giri gele gele kase ’beŋito yu.

will be added

X\