YOANE 21

1I bo ŋanina Yesu druga puku ku lotodiniki kiloni i suburi lo Tiberialo i kutu yu. ’Bo lepe apuku de. 2Simona Petero ku Toma laga lo luŋu a Kurudolo, Natanaeli laga lo Kana Galili yulo, ku ŋazi ti Zebedayo kilo ku lotodiniki ku’de ti lepe kilo mure, ko kugele. 3Simona Petero druga takindra ko adi, “Na lu tu i rega na somo.” Ko druga teyitokindro lepe adi, “Kita tu kasi do.” Ko druga lupodru, druga lubo i ki’bo nasena kata yu agbole, ’bo i inu mude de ko aku rekundra le’de ŋo. 4Ku gbo’dini i wara na kana, ti Yesu alira suburi i kutu yu, ’bo lotodiniki kilo aku deni adi ŋolo a Yesu. 5Yesu druga piza ko adi‚ “Ŋazi kilo ta aku rio somo ya?” Ko druga teyitokindro lepe adi‚ “Yi aku rio.” 6Lepe druga takindra ko adi‚ “Biriŋorota birana i go lo lutate lo ki’bolo‚ ta irurumbi.” Kuwade ko druga biriŋodru, ’bo ku zore na somo kine‚ ko aku romoki pikundro birana. 7Lu lotodinikita laga ma Yesu nyarilo de druga takindra Petero adi‚ “Ŋolo a Matalo.” Kugbo Simona Petero laga ayinga adi ŋolo a Matalo, lepe druga todya bongo nanye na kaŋona kanye muguni, igbonaga lepe kana ’ba bongona‚ druga labara suburi kata yu. 8’Bo lotodiniki ku’de kilo apondra ku ki’bo ti ko pigo bira naga na zore ku somona‚ igbonaga kutu na suburina ani gbo’da pazo‚ ’bo beti mitazi kama gele ka’delo. 9Ku ko laga alupodru i kuti yu ko druga medra kima na topoko ku kuuna yu de, ti somo a’delaki kini‚ ’bo ko medra ’dilo itro. 10Yesu druga takindra ko adi‚ “Zowuta somo ku’de laga ma ta rekundri tinade kilo.” 11Simona Petero druga lubo i ki’bo kata yu‚ druga pikundro birana i kutini. ’Bo bira ŋanina azore ku somo laga drumala, kama gele ku meria mukana konye musala. ’Dibani kodro ku ko rodri de kpe, birana aku gindra. 12Yesu druga takindra ko adi, “Pondrita i ’bo’yu na kutu!” Le’de ŋutu ’bayi i dridriŋi na lotodiniki kilo laga ku teili logo i piza na lepe adi, “Do a ŋa ya?” igbonaga ko adeni adi lepe a Matalo ina. 13Yesu druga pondra, druga ’dumundra ’dilo i tikindra na ko, ku somo kilo de itro. 14Ilo de a luŋa laga a togi musala laga ma Yesu kpekindri mugu ku lotodiniki kiloni i bo na ŋiye nanye i dridriŋi na ŋutulu laga atatuwa kilona. 15Kugbo ko laga anyosu azo‚ Yesu druga piza Simona Petero adi‚ “Simona, ŋiro lo Yoanelo‚ do anyari na arodru kilo de ya?” Simona druga teyitokindro lepe adi‚ “Iye Mata‚ do adeni adi na anyari do.” Yesu druga takindra lepe adi‚ “Wowone torila ti kebilizi kuwe kilo.” 16Yesu druga piza lepe ’do‚ i luŋa laga a togi murelo adi‚ “Simona‚ ŋiro lo Yoanelo, do anyari na ya?” Simona druga teyitokindro lepe adi‚ “Iye Mata‚ do adeni adi na anyari do.” Yesu druga takindra lepe adi‚ “Yuke kebilizi kuwe kine.” 17Yesu druga piza lepe ’do‚ i luŋa laga a togi musalalo adi‚ “Simona‚ ŋiro lo Yoanelo‚ do anyari na ya?” Petero druga gbo ku luŋuli igbonaga Yesu apiza nye i luŋa laga a togi musalalo adi‚ “Do anyari na ya?” ina. Lepe druga teyitokindro lepe adi‚ “Mata‚ do adeni kuliata giri. Do adeni adi na anyari do.” Yesu druga takindra lepe adi‚ “Wowone kebilizi kuwe kine. 18Na takindra do a ’diri‚ ti inga do a ’bulani, do bita pidra muko nonuna do lepe‚ ’bo do tu i piri naga mo do nyari nu. ’Bo kugbo do laga ayeŋundra a temezitio do iriodru kenisi kolu kilo‚ ’bo ŋutu le’delo ipipidra do i zonga na do i piri naga do aku nyari nu.” 19Yesu akulia de i kpeza na tuwa naga ma Petero ituwani ma lu ititikindra na Ŋun pura nu. Kugbo lepe laga kulia de‚ druga takindra lepe adi‚ “Keporo bo niona.” 20Petero druga lopukozi i ki’di‚ druga medra lotodinikita lo nyari Yesulo ti lu i kipundro. Lepe a ŋutu kazu lo togu mugu ku Yesu i laga i nyosu na tokotriana, ku lo piza adi‚ “Mata‚ ŋutu lo inyokindro do mundraralo a ŋa?” ilo. 21Kugbo Petero laga amedra lepe‚ druga piza Yesu adi‚ “Mata‚ kulia ti lu ŋutu de kine adinyo ya?” 22Yesu druga teyitokindro lepe adi‚ “Ki na nyadru ti lepe sakani yeŋadru tozo kuwe pondra yu‚ kulia ŋani kine a konuŋa ya? Keporo bo niona ayu.” 23Kine kulia na tayi kine de kuworo ku luŋaseri i dridriŋini adi lu lotodinikita de aka tuwani. ’Bo Yesu agbo’da kulia adi lepe aka tuwanini, ’bo adi‚ “Ki na nyadru adi ti lepe sakani yeŋadru tozo kuwe pondra yu‚ kulia ŋani kine a konuŋa ya?” 24Ilo de a lotodinikita laga lo ’dodru bo na kine kulia de ku laga lo wudyo kolo. Yi adeni adi bo na kulia naga ma lepe ’dodrini kine a kulia naga mŋgba. 25Kuliata ku’de rodri naga ina Yesu kondrini kine ko kata. Kazu kodro ku le’de ŋutu awudyo ko giri gele gele‚ na rambu adi kedri kodro kana ku mugu aka romoki ’dukundro bukulo na wuro kineni.

will be added

X\