YOANE 20

1Ku gbo’dini kutumalu ’bero ’bero i luŋa laga a kayo lo sabitilo‚ ti inga kana aku wara‚ Maria na Magadalana druga utu i gulo yu‚ druga medra adi ŋurupina adukazi kaŋo i gulo kutu yu. 2Kuwade lepe druga wo i utu ku Simona Petero yu ku lotodinikita le’de laga lo nyari Yesulo, druga takindra ko adi‚ “Ko a’dokoro Matalo kaŋo i gulo yu, ’bo yi aku de piri naga ma ko topirikindri lepena.” 3Kuwade Petero seku lotodinikita le’delo druga pilaki i utu i kiko lo gulo yu. 4Ko mure katru druga wo kugele. ’Bo lotodinikita le’delo arodru Petero ku wokena druga yeŋadru i gulo yu a kayo. 5Ku lepe laga adulazi ka yu, lepe druga medra bongola nakpe kine kase pirini, ’bo lepe aku lubo kata yu. 6Simona Petero druga yeŋadru itro ku lepe i boni‚ druga lubo i gulo kata yu, lepe druga medra bongola nakpe kine kase pirini, 7ku bongo naga ku Yesu i kuwenina, ti bongo ŋanina aku gbo’da ku bongola nakpe kine kugele, ’bo lepe atrakazi i piri ne’de ka’de. 8I bo ŋanina lotodinikita le’de laga lo yeŋadru a kayo i gulo yulo druga lubo itro. Ku lepe laga amedra, druga rurugo. 9’Bo bita ko inga aku yo kulia na wuwuro kine adi lepe iŋiŋiye i dridriŋi na ŋutulu laga atatuwa kilona. 10Kuwade lotodiniki kilo druga yitozi bo kase ’ba yu. 11’Bo Maria alira kaŋo yu i gulo nyoga yu i gbiye. Ku lepe igbiyeni, lepe druga dulazi ka yu i medra i gulo kata yu. 12Lepe druga medra malaika mure ku bongola nakpe kasiko i ’berini ti agbi’diki le’delo i kuwe yu, le’delo i mukuzini, i piri naga ma opu lo Yesulo topirikini nu. 13Ko druga piza Maria adi, “Nokana, do gbi gbandra ya?” Lepe druga teyitokindro ko adi, “Igbonaga ko a’dokodru Mata liolo, ’bo na aku de piri naga ma ko topirikindri lepena!” 14Ku lepe naga akulia de druga lopukozi kanye ki’di yu, druga medra Yesu ti alira, ’bo lepe aku deni adi ŋolo a Yesu. 15Yesu druga piza lepe adi, “Nokana, do gbi gbandra ya? Do ga’yu ŋa ya?” Ku Maria irambuni, lepe rambu adi dena ŋolo a kakuruni, lepe druga teyitokindro lepe adi, “Mata, ku do laga a’dokodru lepe kaŋo, trukoki na piri naga mo do topirikindri lepena po, ma na ku ’dokodri lepe kaŋo po!” 16Yesu druga teyitokindro lepe adi, “Maria!” Maria druga lopukozi i takindra na lepe ku kutu na Eberena adi, “Raboni!” trugo adi, Katogoloni. 17Yesu druga takindra lepe adi, “Ku ’de’de na, igbonaga na inga aku kiyadru ku Monye liolo yuna. ’Bo utini ku luŋaseri kuwe kilo yu, ku taki ko adi na lu kiyadru ku Monye liolo yu, laga a Monye lasulo, ku Ŋun liolo yu, laga a Ŋun lasulo.” 18Maria na Magadalana druga tu ku trukokindro na lotodiniki kilo adi, “Na amedra Matalo,” adi lepe atakindra nye kine kulia de. 19Ku gbo’dini kotriana i lu luŋa de laga a kayo lo sabiti lu de, ti kakazi kine akinu, i piri naga ma lotodiniki kilo tunundri ’beri ku kuzene na Yahudi kilona nu, Yesu druga pondra ku lira i dridriŋini, druga takindra ko adi, “Teili lo trotrolo ti gbo’dini kasuni.” 20Kugbo lepe laga akulia kine kulia de, lepe druga kpekindra ko kenisi kanye kilo ku merete lonyelo. Lotodiniki kilo druga nyonyola igbonaga ko amedra Matalona. 21Yesu druga takindra ko ’do adi, “Teili lo trotrolo ti gbo’dini kasuni. Be naga ma Monyelo sunyundri nana, na sonyodru ta de itro.” 22Kugbo lepe laga akulia de‚ lepe druga burakindra ko ku yukana, druga takindra ko adi, “Makundrita Yuka Nakiyena. 23Ku ta laga a’diza torozi ti le’de ŋutu, ko ’i’di’diki, ’bo ku ta laga aku ’diza torozi ti le’de ŋutu, ko aka ’diyani.” 24Ti Toma laga i ŋutulu laga mere gele konye mure kilo laga lo luŋu a Kurudolo, aku gbo’da kasi ko i luŋa laga ma Yesu pondrinilo. 25Kuwade lotodiniki ku’de kilo druga takindra lepe adi‚ “Yi amedra Matalo.” Lepe druga teyitokindro ko adi, “Ku na laga aku medra bo na musumari kilo ku lepe i kenisini, ku na laga aku sukindro lo’do liolo i piri na musumari kilo kata yu, ku na laga aku sukindro keni liolo ku lepe i merete yu, na aka rugoni.” 26I bo na luŋa budro, lotodiniki ti Yesu kilo ti kulu kadi yu ’do, ti Toma lu kasi ko. Yesu druga pondra, ti kakazi kine akinu, druga lira kideni, druga kulia adi, “Teili lo trotrolo ti gbo’dini kasuni.” 27Lepe druga takindra Toma adi, “Sukindri lo’do lolulo inide, mete kenisi kuwe kilo. ’Bo riyu keni loluŋalo, suki lepe kuwe mereteni. Ku gbogbo’da ’ba rugo, gbo’dini ku rugo ayu.” 28Toma druga teyitokindro lepe adi, “Mata lio, Ŋun lio.” 29Yesu druga teyitokindro lepe adi, “Do arugo igbonaga do amedra nana ya? Koŋo na’buna ina i ŋutulu laga aku medra ’bo laga arugo kilo.” 30’Bo Yesu akondra kpiyeta ku’de rodri ku lotodiniki kanye kilo i konyeni, naga aku wuro i ina buku de katani kine. 31’Bo kine de wuro ma ta rugi adi Yesu lepe a Kristo, laga a Ŋiro lo Ŋun ilo, ku ta laga arugo ma ta gbo’dini ku ru ku kari ti lepe kine.

will be added

X\