YOANE 2

1I luŋa lo musala lu tokomona na ’depani noka nu kata Galili yu i kezi naga Kana yuna, ti ŋote na Yesuna nu yu. 2’Bo Yesu lepe ku lotodiniki kanye kilo aluŋu itro. 3Ku suwe ti konye ti zabibu kine naga aduwe, ŋote na Yesuna druga takindra lepe adi, “Suwe kasiko ti konye ti zabibu kine gbo’di ’bayi.” 4Yesu druga teyitokindro lepe adi, “Nokana, ku tataki na kulia ku’de. Luŋa liolo inga aku yeŋundra.” 5Ŋote na lepena druga takindra kaloko kilo adi, “Kulia giri na taki lepe ta kine, ’dia gbo adinyo kpe, koneta.” 6Kuwade ti ŋoropo laga akepa a luku’dolo ti pio bukiye kilo kulu atogbo’daki yu de, laga Yahudi kilo ma yakizi i toke’ya na ’beri kilo, gelelo tozore ku soŋgbolo mure kuwa musala. 7Yesu druga takindra kaloko kilo adi, “Tozoreta luku’dolo kilo ku pio kine.” Ko druga tozodru zore ’biru’biru. 8Lepe druga takindra ko adi, “ ’Bo ’ilarata, zoŋeta ku kametani lo komolo yu.” Ko druga ’iladru, zonga de. 9Kametani lo komolo kugbo a’de’dendra pio naga gbo’di awusa a suwe ti konye ti zabibu kine, ’bo ti aku deni piri ŋani na ŋiyuni ina, ’bo ka’ila ti pio kilo lo dendra ’du, kametani lo komolo druga lungu ko’doonilo, 10druga takindra lepe adi, “Ŋutulu giri bita tikindra suwe ti konye ti zabibu naga na toto’bi kine a nze. Kugbo ŋutulu kilo amozu tritri azo‚ ko bita tikindra naga patata kine a bo. ’Bo laga do ariridra suwe ti konye ti zabibu na toto’bi kine yeŋundra tinade.” 11Ilo kpiye de laga a kayo lo konu Yesu Galili yulo i kezi naga Kana yuna i kpeza na todruma nanyena. Kuwade lotodiniki ti lepe kilo druga rugo lepe. 12I bo ŋanina Yesu druga ŋiyoro tu Kaperinauma yu, lepe ku mugu, kasi ŋote nanyena, ku luŋaseri ku lotodiniki kanye kilo itro. Ko druga saka yu de luŋa ’baziŋa. 13Kugbo kolo druma naga a Roseto na Yahudi kilona naga gbo’di nyoga, Yesu druga utu Yerusalema yu. 14Lepe druga rumbi i kadi na Ŋun ina kata yu katogboro ti su, kebilizi, ku a’bugo, ku katogbuwa ti riye ti kulu agbi’diki yu de. 15Ku lepe laga akukundra pata na tratrakana, lepe druga droŋodru koŋa giri kaŋo i kadi na Ŋun ina kata yu ku kebilizi kine ku su kilo. Lepe druga teteriri riye ti katogbuwa ti riye kilo kaŋo druga dudukuza mesala kasiko kine. 16Lepe druga takindra katogboro ti a’bugo kilo adi, “Zoŋeta kilo kapazi de kaŋo. Ku wowonyuta kadi na Monye liona a kadi na togboroni kapazi.” 17Lotodiniki ti lepe kilo druga rambu adi awuro adi, “Puso na kadi nonuna ilelenga na.” 18Yahudi kilo druga teyitokindro lepe adi, “Do ilo kpekindra yi kpiye laga a inyo mo do kondri kine konesi dena ya?” 19Yesu druga teyitokindro ko adi, “Ranyeta ina kadi na Ŋun de kaŋo, ’bo i bo na luŋazi musala na i’du’du lepe i piri ’do.” 20Yahudi kilo druga kulia adi‚ “ ’Duko na ina kadi na Ŋun de ina ’dumadru kiŋazi meria iŋmani ku konye bukiye, ’bo do i’du’du lepe ’do i luŋa musala ’du ya?” 21’Bo lepe tazu kulia ti kadi naga a mugu nanyena. 22Kuwade i bo na ŋiye na lepe naga i dridriŋi na ŋutulu laga atatuwa kilo yuna, lotodiniki ti lepe kilo druga rambu adi lepe atakindra se kine kulia de, druga ko rugo kulia na wuwuro kine ku kulia na ta Yesu kazu kunu de. 23Ku inga Yesu lu Yerusalema kata yu ku kulia ti kolo druma na Rosetona kine‚ ŋutulu rodri arugo kari ti lepe kine ku medra na kpiyesi naga ma lepe kondri kine. 24’Bo Yesu lepe aku nyadru ’delakindra teili kasiko kini, 25igbonaga lepe adeni ŋutulu girina. Aku nyadru adi le’de ŋutu ka’bi ku kpekpe kulia ti ŋutulu naga lepe ku mugu adeni ŋo laga ku loŋutu i teiliko yulo ina.

will be added

X\