YOANE 18

1Ku Yesu laga akulia kine kulia de‚ lepe druga lupodru kaŋo ku lotodiniki kanye kilo, druga laŋadru kare laga lotri laga Kidirona i lu lozo, i piri na gbo’dini melesi nu, druga lubo kata yu ku lotodiniki kanye kilo itro. 2’Bo Yuda, laga lo nyokindro lepe mundrara ilo adeni piri ŋanina itro‚ igbonaga bita ku Yesu tundra ’beri yu de ku lotodiniki kanye kilo ’duu ina. 3’Bo kugbo Yuda laga amomorani mongoyo na katiyu kasi drumala ti katiyu lo ŋiyu ku ka’i’ila drumala kilo ku Farisayo kilo yu, lepe druga tu yu de ku kimazi kine ku trukuwo ku dyapa. 4Kuwade ku Yesu laga adeni kuliata naga na ikondra ’beri kanyeni kine giri, druga lupodru, i momora kasi ko adi, “Ta ga’yu ŋa ya?” 5Ko druga teyitokindro lepe adi, “Yesu lo Nazaretalo.” Yesu druga takindra ko adi, “Na a lepe.” Yuda laga lo nyokindro lepe mundraralo ti alira kasi ko kugele. 6I naga ma Yesu takindri ko adi‚ “Na a lepe‚” ina‚ ko druga kukutoro a lo ki’di, druga ’do’do ka. 7Kuwade Yesu druga piza ko ’do adi‚ “Ta ga’yu ŋa ya?” Ko druga teyitokindro lepe adi, “Yesu lo Nazaretalo.” 8Yesu druga teyitokindro ko adi, “Na atrukokindro ta adi na a lepe. Kuwade kugbo ta kilo ga’yu na, kolokita kilo ŋutu de ti uti kaŋo.” 9Kine kulia de atorumokindro kulia naga ma lepe tazini kine adi, “I dridriŋi na ŋutulu laga mo do tikindri na kilo, le’de ŋutu gele aku liki kuweni” kine. 10Ti Simona Petero lu ku wale lo moro‚ druga ’dutundro lepe kaŋo ku debi upiye lo ka’i’ilani laga a leŋgberelo druga depadru suweta lo lepe lo lutatelo ka. Upiye ŋanilo kari ti lepe kine se naga Maliko. 11Yesu druga takindra Petero adi‚ “Teyitoro wale lolulo bo kanye zuru yu. Na aka mozu i drikeri naga ma Monyelo tikindri nanani ya?” 12Kuwade mongoyo na katiyu kilo ku druma lasikolo ku kakita ti Yahudi kilo amoga Yesu, druga todya lepe. 13Ko druga zonga lepe a kayona ku Ana yu, igbonaga lepe a ŋogbo lo Kayafa laga a ka’i’ilani laga a leŋgberelo i ilu kiŋa de ina, 14Kayafa lo tretrelakindra kazu Yahudi kilo kulia na adi a na’bu ti ŋutu le’de gele tuwani ku kulia ti ŋutulu kilo giri ilo. 15Ti Simona Petero akepodru bo na Yesuna seku lotodinikita le’de. Igbonaga ka’i’ilani laga a leŋgberelo laga adeni lotodinikita ŋanilona, lepe druga lubo i rii na ka’i’ilani laga a leŋgberelo kata yu seku Yesu, 16ti Petero alira kaŋo i kaakutu yu. Kuwade lotodinikita le’de laga ma ka’i’ilani laga a leŋgberelo dendrilo druga lupundro kaŋo‚ i kulia ku ’diye naga na tizu kaakutuna, druga tolubo Petero. 17Ŋiro naga na tizu kaakutuna druga piza Petero adi, “Do ani gbo’da a lotodinikita le’de lo ilo ŋutu de itro ya?” Petero druga teyitokindro lepe adi, “ ’Bayi.” 18Ti upi kilo ku kakita kilo atokobu kima ku kuu igbonaga kana a katirona. Ko alira i laŋani, ti Petero alira kasi ko i laŋani itro. 19Ka’i’ilani laga a leŋgberelo druga pipiza Yesu ku kulia ti lotodiniki ti lepe kilo‚ ku togole lo lepelo itro. 20Yesu druga teyitokindro lepe adi, “Na atakindra ŋutu ti ka kilo kulia kine gboŋa. Na atogo’yu ’duu i kadizi naga a momoreta kine kata yu‚ i kadi na Ŋun ina kata yu itro ku i pirito naga ma Yahudi kilo giri pepenani kata yu kine. Na aku tazu kulia kine tali. 21Do pipiza na gbandra ya? Pizini ŋutulu laga lo yinga na kilo kulia naga ma na takindri ko kine. Ko adeni kulia naga ma na kuliani kine.” 22Kugbo lepe laga akulia kine kulia de‚ le’de kakitani laga lo lira nyoga yulo druga nangu lepe ku keni‚ akulia adi‚ “Do teyitokindro ka’i’ilani laga a leŋgberelo de ya?” 23Yesu druga teyitokindro lepe adi‚ “Ku na laga atazu a loro‚ trugi toro ŋanina‚ ’bo ku na laga atazu a lo’bu‚ do nangu na gbandra ya?” 24Ana druga sonyodru lepe ti atora‚ ku Kayafa laga a ka’i’ilani laga a leŋgbere ilo yu. 25Ti Simona Petero alira i laŋa yu. Ko druga piza lepe adi‚ “Do ani gbo’da a lotodinikita lo lepelo itro ya?” Lepe druga renya adi‚ “ ’Bayi.” 26Upiye le’de lo ka’i’ilani laga a leŋgberelo‚ laga a marate lo ŋutu laga ma Petero depadri suwetalo druga piza lepe adi‚ “Na aku meri do i melesi kata yu seku lepe ya?” 27Petero druga renya ’do. Sukurilo druga sisira. 28Ko druga zonga Yesu ŋiyoro i kadi na Kayafana katani i rii na luŋu a Praitorio ina kata yu kutumalu ’bero ’bero. Ko ku ’beri aku lubo i Praitoriolo kata yu, ka’bi ko ku kokorozu ’beri, ma ko ku nyosuni Rosetona ’busa. 29Kuwade Pilato druga lupodru kaŋo ku koŋa, druga piza ko adi, “Toro naga ya ma ta sozi ilo ŋutu de ya?” 30Ko druga teyitokindro lepe adi, “Kedri kodro ku ilo ŋutu de ani gbo’da a katoronyani, kedri kodro yi aka tikindra lepe konu yuni.” 31Pilato druga takindra ko adi, “Zoŋeta lepe, ta lepe, ŋedrita kulia ti lepe kine beti kukuzu nasuna.” Yahudi kilo druga teyitokindro adi‚ “Kukuzuna ani rugo adi ti yi tatune le’de ŋutu tro.” 32Kine kulia de atorumokindro kulia naga ma Yesu tazi kine i kpekindra tuwa naga ma nye ituwanina. 33Pilato druga lubo i Praitoriolo kata yu ’do, druga lungu Yesu‚ druga piza lepe adi, “Do a Mata lo Yahudilo ya?” 34Yesu druga teyitokindro lepe adi‚ “Do lo piza kine kulia de ku kuwe nonu, ŋona ku’de ŋutulu atakindra do kulia kuwe kine ya?” 35Pilato druga teyitokindro lepe adi, “Na a Yahuditio ya? Zuru lolulo ku ka’i’ila drumala kilo lo tikindra do kuweni. Do akondra inyo ya?” 36Yesu druga teyitokindro lepe adi, “Tumata niona ani gbo’da a na ŋiyu i ina ka de. Kedri kodro ku tumata niona ŋiyu i ina ka de, kedri kodro kakita kuwe kilo imomoro ka’bi na ku tiki ku Yahudi kiloni. ’Bo tumata niona ani gbo’da a na ŋiyu inide.” 37Pilato druga piza lepe adi, “Kuwade do a mata ya?” Yesu druga teyitokindro lepe adi‚ “Do kulia adi na a mata. Ku kine kulia de na ayuŋe‚ na apondra i kani‚ i trugo na kulia ti to’diri kine. Ŋutulu giri ti to’diri kilo yiyinga roro liolo.” 38Pilato druga piza lepe adi‚ “Kulia ti to’diri kine a inyo ya?” Kugbo Pilato laga akulia de‚ lepe druga lupodru ’do ku Yahudi kilo yu‚ druga takindra ko adi‚ “Na aku rio toro gele ku lepe i muguni. 39’Bo be naga kasu gbiyerini bitana ti na lakaki ta le’de ŋutu i kolo druma na Rosetona. Ta nyadru ki na lakaki ta Mata lo Yahudilo ya?” 40Ko druga resa ’do adi‚ “Agbo’da ilo ŋutu deni‚ ’bo Baraba ayu!” Ti derengi Baraba ŋanilo a kariakani.

will be added

X\