YOANE 17

1Kugbo Yesu laga akulia de‚ lepe druga ’bi’yu konye kanye kilo ki i ’diko yu, druga kulia adi, “Monye liolo, luŋalo gbo’di ayeŋundra azo. Pure Ŋiro lolulo, Ŋiro lolulo ma pudya do itro, 2ku naga mo do tikindri lepe teriŋi ku loŋutu giri i koŋonina, ma lepe tikindri ŋutulu giri laga mo do tikindri nye kilo ru naga ani lengana. 3Ru naga mŋgba naga ani lengana nye ina de, ma ko dendri do laga gele’du a Ŋun laga a ’dirilo, seku Yesu Kristo laga mo do sunyundrilo. 4Na apudya do i kani azo. Na alenga kita naga mo do tikindri na i kondrana. 5Tinade Monye liolo, pure na konu lagani ku pura naga a nikaŋa seku dona ti inga kana aku gbeki nu. 6“Na akpeza do ku ŋutulu laga mo do tikindri na i kani kiloni. Ko kazu a koluŋa‚ do atikindra na ko, ’bo ko asobu kulia konu kine. 7Ko gbo’di adeni adi ŋo giri laga mo do tikindri na kilo ŋiyu konu yu, 8igbonaga kuliata naga mo do takindri na kine giri‚ na atakindra ko, ’bo ko arugo adi do lo sunyundro na. 9Na lo magu do ku karaŋa. Na agbo’da magu do ku ŋutu ti ka kiloni, ’bo ku ŋutu laga mo do tikindri na kilo, igbonaga ko a koluŋana. 10Ŋo kuwe kilo giri a koluŋa, ŋo kolu kilo giri a kuweŋa, ’bo na arumbi pura ku ko. 11Na ani gbo’da ’do i kani, ’bo kara kilo gbo i kani, na lu tu konu yu. Monye laga lokiye lokiyelo, ririte ko ku teriŋi na kari konu naga mo do tikindri na ina, ma ko gbo’da a mugu gele, beti naga ma yi gbo’dini a mugu gele seku do ina. 12Kugbo na laga asaka kasi ko, na ariridra ko laga mo do tikindri na kilo ku kari konu kine, ’bo na atizu karaŋa. Le’de ŋutu ’bayi kasiko i dridriŋini laga akaraki, ŋolo a ŋiro laga lo karakilo ka’delo, ma kulia na wuwuro kine torumokindri ’beri. 13Tinade na lu tu konu yu, na lo tazu kine kulia de i kani, ma nyola niona gbo’da kasiko katani koru. 14Na atikindra ko kulia konu kine, ’bo ŋutu ti ka kilo aŋmoza ko, igbonaga ko ani gbo’da a ŋutu ti ka beti naga na ani gbo’da a ŋutu lo kana. 15Na agbo’da magu adi ’dumara ko kaŋo i kanini, ’bo ririte ko ku ŋutu lorolo. 16Ko ani gbo’da a ŋutu ti ka‚ beti naga na ani gbo’da a ŋutu lo kana. 17Tokele ko ku kulia konu ti to’diri kine. Kulia konu kine a kulia ti to’diri. 18Beti naga mo do sunyundri na i kanina‚ na asonyodru ko ’do i ka yu. 19Ku kulia kasiko kine‚ na atoke’ya mugu‚ ma ko ku toke’yi ’beri ku kulia ti to’diri kine ’busa. 20“Na agbo’da magu do ku kilo ŋutu de ka’deloni, ’bo ku kulu ŋutu de giri laga lo rugo na ku kulia na ita ko kine, 21ma ko giri gbo’da a mugu gele, beti naga do Monye, mo do gbo’dini kuwe katani, ma na gbo’dini konu katanina, ’bo ma ko gbo’dini kaya katani‚ ma ŋutu ti ka kilo rugi adi do lo sunyundro na. 22Na apudya karaŋa ku pura naga mo do tikindri nana‚ ma ko gbo’da a mugu gele, beti naga ma yi gbo’dini a mugu gele seku do ina. 23Na kasiko katani, do kuwe katani, ma ko yeŋundra soso a mugu gele‚ kuwade ma ŋutu ti ka kilo dendra adi do lo sunyundro na‚ ’bo do anyari ko be naga mo do nyadri nana. 24Monye, na nyadru adi ŋutulu laga mo do tikindri na kilo ti gbo’dini kasi na i piri naga ma na gbo’dini ina, ma ko medra pura nio naga mo do tikindri nana‚ igbonaga do anyari na ti inga kana aku ’delakina. 25Monye laga mŋgbalo‚ ŋutu ti ka kilo aku deni do‚ ’bo laga na adeni do‚ ’bo kilo ŋutu de adeni adi do lo sunyundro na. 26Na atodinikindro karaŋa kari konu kine‚ ’bo na itodinikindro kari konu kine‚ ma nyadru nonu naga mo do nyadri nana gbo’da kasiko katani‚ ma na gbo’da kasiko katani itro.”

will be added

X\