YOANE 16

1“Na atakindra ta kine kulia de ka’bi ta ku bayi. 2Ko idrodroŋoro ta i kadizi naga a momoreta kine kata yu kaŋo. A ’diri luŋalo ilo ipondra, ŋutulu giri laga lo reremozu ta kilo irarambu adi se konakindra Ŋun kita. 3Ko ikokondra ta de igbonaga ko aku deni Monyelo ku na itrona. 4’Bo na takindra ta kine kulia de‚ kuwade kugbo luŋa lasikolo laga ayeŋundra, ma ta rambi adi kazu na atakindra ta kine kulia de. “Na aku takindra ta kine kulia de ŋiyu i suluki yu igbonaga na asaka kasi tana. 5’Bo tinade na lu tutu ku Ŋun laga lo sunyundro nalo yu. ’Bo le’de ŋutu ’bayi kasu dridriŋini laga lo piza na adi‚ ‘Do lu tu yeda ya?’ 6’Bo igbonaga na atakindra ta kine kulia dena‚ ta gbo ku luŋuli koru. 7’Bo na takindra ta kulia ti to’diri kine‚ a na’bu kasuni ku na utu we yu, igbonaga ku na ani utu, Kalokonilo ’bani pondra kasuni. ’Bo kugbo na laga autu, na isusunyundro lepe kasuni. 8Kugbo lepe laga apondra‚ lepe ikpekpeza ŋutu ti ka kilo adi ko a ’bureniko ku kulia ti torozi kine‚ ku kulia ti logbiye lo’bulo kine‚ ku na kulia naga sosona itro‚ 9ku kulia ti torozi kine igbonaga ko aku rugo na ina‚ 10ku kulia ti logbiye lo’bulo kine‚ igbonaga na lu tu ku Monyelo yu ’bo ta ’baka medra na ’doni ina‚ 11ku ti ŋera na kulia naga sosona kine igbonaga druma lo ina ka delo aŋeraki kulia kine a naro azona. 12“Na gbo ku kuliata rodri naga na taki na ta kine‚ ’bo tinade kine kulia de a riŋiko kasuni. 13Kugbo Yuka na kulia ti to’dirina naga apondra, lepe i’dolakindra ta kuweto i kulia ti to’diri kine giri katani‚ igbonaga lepe aka tazu ku kuwe nanyeni, ’bo kulia naga ma lepe yingi kine‚ lepe itataazu se‚ ’bo lepe itrutrugo kulia na popondra kine. 14Lepe ititikindra kari kuwe kine ti purani pura‚ igbonaga lepe i’de’deba kulia kuwe kine i trukokindro na tana. 15Kulia giri naga na gbo ku Monyelo kine a kuweŋa‚ kuwade na akulia adi lepe i’de’deba kulia kuwe kine i trukokindro na ta. 16“Akoloki luŋa ’baziŋa, ta ’baka medra nani. Akoloki luŋa ’baziŋa ’do‚ ta imemedra na.” 17Lotodiniki ti lepe ku’de kilo druga pipiza ’beri kase dridriŋini adi‚ “Kine kulia naga ma lepe takindri yi kine de adi‚ ‘Akoloki luŋa ’baziŋa, ta ’baka medra nani. Akoloki luŋa ’baziŋa ’do‚ ta imemedra na‚’ ’bo‚ ‘igbonaga na lu tu ku Monyelo yuna‚’ trugo adinyo ya?” 18Ko druga piza adi‚ “Kulia naga ma lepe tazi kine adi‚ ‘Akoloki luŋa ’baziŋa,’ kine adinyo ya? Yi aku de kulia naga ma lepe tazini kine.” 19’Bo Yesu adeni adi ko kilo nyadru pipiza nye‚ lepe druga piza ko adi‚ “Ta pipiza ’beri kasu dridriŋini ku kulia naga ma na tazi kine adi‚ ‘Akoloki luŋa ’baziŋa, ta ’baka medra nani. Akoloki luŋa ’baziŋa ’do‚ ta imemedra na’ de gbandra ya? 20Na takindra ta a ’diri‚ ta igbigbiye, ta iluluzo luluzo‚ ’bo ŋutu ti ka kilo inyonyola. Ta igbogbo’da ku luŋuli‚ ’bo luŋulio kasu kilo ilolopuke a nyola kasuni. 21Kugbo nokana naga ku miye na ŋiro i ta’duni, lepe gbo ku luŋuli koru igbonaga luŋa lo lepelo aromoki azona. ’Bo kugbo lepe naga ata’duundra ŋirolo‚ lepe ani rambu miyena gbo’di ’do ku kulia ti nyolana kine adi ŋiro ata’duwe i kani. 22Ta gbo ku luŋuli tinade‚ ’bo na imemedra ta ’do‚ ta inyonyola‚ ’bo le’de ŋutu ’bayi lo ininadru nyola nasuna kaŋo. 23I ini luŋa de‚ ta aka magu le’de ŋo kuwenini. Na takindra ta a ’diri‚ kugbo ta laga magu le’de ŋo ku Monyelo yu‚ lepe ititikindra ta ku kari kuwe kine. 24Yeŋundra tinade ta aku magu le’de ŋo ku kari kuwe kine. Maketa‚ ta irurumbi, nyola nasuna ma gbo’da koru. 25“Na atakindra ta kine kulia de ku kulia na guguma. Luŋalo ilo ipondra, i ilu luŋa de na aka takindra ta ku kulia na gugumani, ’bo na itrutrukokindro ta kulia ti Monyelo kine gboŋa. 26I inu luŋa de ta imamagu ku kari kuwe kine‚ ’bo na ani takindra ta adi na imamagu Monyelo ku ta, 27igbonaga Monyelo lepe nyanyari tana, igbonaga ta anyari na, ’bo ta arugo adi na apondra ku Ŋun yu ina. 28Na apondra ku Monyelo yu, na apondra i kani, ’bo ’do, na lo kolokindro kana, ’bo na itu ku Monyelo yu.” 29Lotodiniki ti lepe kilo druga takindra lepe adi, “Mete, tinade do lo kulia gboŋa, do ani tazu kuliata na guguma tro. 30Yi adeni gbo’di adi do adeni kuliata kine giri, le’de ŋutu ka’bi ku pipiza do. Ku kine kulia de yi arugo adi do pondra ku Ŋun yu.” 31Yesu druga teyitokindro ko adi, “Ta gbo’di arugo de ya? 32Meteta, luŋalo ilo ipondra, ’bo ayeŋundra azo‚ i ilu luŋa de ta irereki‚ ŋutulu giri gele gele kanye ’ba yu‚ ta ikokolokindro na ka’delo. ’Bo na ani gbo’da ka’delo tro, igbonaga Monyelo gbo seku na kugelena. 33Na takindra ta kine kulia de ma ta saka kuwe katani ku gbiŋ na suwo. Ta isasanya sasanya i kani. Gbo’dita ku teiliko logo. Na atiga kana.”

will be added

X\