YOANE 13

1Ti inga luŋa lo kolo druma na Rosetonalo aku yeŋundra, kugbo Yesu laga adeni adi luŋa lonyelo ayeŋundra azo‚ laga ma nye kolokindri ina ka dena i utu ku Monyelo yulo‚ ti lepe anyari ŋutu kanye laga lo gbo’da i kani kilo‚ lepe anyari ko tozo i ’dute yu. 2Ku ko laga kulu i nyosu na tokotriana‚ ti kasosoyini lo kulialo a’delakindra kulia ku Yuda lo Kariota laga a ŋiro lo Sirhonalo i teili yu i nyokindro na Yesu mundrara. 3’Bo Yesu adeni adi Monyelo atikindra nye teriŋi giri azo‚ adi nye ŋiyu ku Ŋun yu‚ nye itutu ku Ŋun yu ’do. 4Kuwade lepe aŋiye i nyosu na tokotriana i kutu yu druga yokodru bongola kanye drumala kine‚ druga ’dumundra bongo naga a siye na muguna‚ druga pitakindra kanye mukoni. 5Lepe druga ’bugo pio kine i a’ba’baŋa katani, druga sulukindra lalazu na mukuzi ti lotodiniki kilo‚ druga seza ko ku bongo naga a siye na mugu naga ma lepe pitakindri kanye mukonina. 6Ku lepe laga apondra ku Simona Peteroni, Petero druga piza lepe adi‚ “Mata‚ do lo lalazu mukuzi kuwe kilo ya?” 7Yesu druga teyitokindro lepe adi‚ “Kulia naga ma na kondri kine de do aku de tinade‚ ’bo do idendra a bo.” 8Petero druga teyitokindro lepe adi, “Do ’baka lalazu mukuzi kuwe kiloni.” Yesu druga teyitokindro lepe adi, “Kugbo na laga ani lalazu do, do ani gbo’da a lio.” 9Simona Petero druga teyitokindro lepe adi‚ “Mata‚ agbo’da mukuzi kuwe kilo ka’deloni‚ ’bo kenisi kuwe kilo ku kuwe niona itro.” 10Yesu druga teyitokindro lepe adi‚ “Ŋutu laga akuwolo‚ ani nyadru kuwo‚ ŋo kilo mukuzi ti lepe kilo ’du, ’bo mugu na lepena giri a nakiye. Ta a lokiye‚ ’bo agbo’da ta girini.” 11’Bo lepe adeni ŋutu laga lo inyokindro nye mundrara ilo‚ nyena kuliani lepe adi, “Ta giri ani gbo’da a lokiye.” 12Kugbo lepe laga alalazu mukuzi kasiko kilo‚ ku lepe a’dumundra bongola kanye kine ku agbi’diki ka ’do‚ lepe druga piza ko adi‚ “Ta ayo kulia naga ma na konakindri ta kine ya? 13Ta kilo lungu na a Katogoloni‚ ku a Mata itro. Ta kulia soso‚ ’bo na gbo de. 14Na laga a Katogoloni lasulo ku a Mata lasulo kuwa na alalazu mukuzi kasi kilo‚ laga ta, lalaneta mukuzi kasu kilo kasu dridriŋini. 15’Bo na atikindra ta kpiye‚ ma ta kondri beti naga ma na konakindri tana. 16Na takindra ta a ’diri, upiyelo ani langu mata lonyelo‚ lososonyolo ani langu kasonye lonyelo. 17Ku ta laga adeni kine kulia de‚ ku ta laga akondra de‚ koŋo na’buna ina a nasu. 18Na agbo’da kulia ku kulia kasu girini‚ ’bo na adeni ŋutulu laga ma na nyumundri kilo, ’bo kulia na wuwuro kine ti torumokindri ’beri adi, ‘Ŋutu laga lo nyosu seku nalo alopugo mugu i kondra na na a loro.’ 19Ŋiyoro tinade na lo takindra ta ti inga kulia kine aku kondra ’beri‚ ma ta rugi adi na a lepe. 20Na takindra ta a ’diri, ŋutu laga lo rugo ŋutu laga ma na sonyodrilo, lepe arugo na. Ŋutu laga lo rugo na ilo, arugo Ŋun laga lo sunyundro nalo.” 21Kugbo Yesu laga akulia de, lepe druga gbo ku drelia koru, druga kulia adi, “Na takindra ta a ’diri, ŋutu gele kasu dridriŋini inyonyokindro na mundrara.” 22Lotodiniki kilo druga medra ’beri kase dridriŋini, ’bo ko aku deni ŋutu laga ma lepe tazi kulia ti lepe kinelo. 23Ti lotodinikita le’de laga lo nyari Yesulo agbi’diki ku Yesu i lagani. 24Kuwade Simona Petero druga kotundra lepe, druga kulia adi, “Trukoki yi ŋutu laga ma lepe tazi kulia ti lepe kinelo.” 25Kuwade ti lepe atogu mugu, ku Yesu i lagani‚ lepe druga piza lepe adi‚ “Mata, ilo ŋa ya?” 26Yesu druga teyitokindro lepe adi, “Ilo ŋutu lo inyelakindri na ’dilo i tikindra na lepelo. ” Lepe druga nyelakindra ’dilona‚ druga ’dumundra lepe druga tikindra Yuda lo Kariota laga a ŋiro lo Simonalo. 27I bo na nyelaki na ’dilo ŋanina‚ Satani druga lubo ku Yuda kata yu. Yesu druga takindra lepe adi‚ “Ŋo laga mo do kondrilo‚ kone wule.” 28Le’de ŋutu ’bayi i kulu ŋutu de laga lo saka i mesa kutu kilo i dridriŋini lo dendra adi Yesu takindra lepe de gbandra. 29Ku’de kilo arambu adi igbonaga Yuda gbo ku zuru lo riyelona, Yesu atakindra lepe adi, “Gbore le’de ŋo laga ma yi nyadri a lo kolo drumanalo‚” kuwagi ma lepe tikindra lemerika kilo le’de ŋo. 30Kugbo Yuda laga amakadru ’dilona, lepe druga lupodru kaŋo‚ ti kana gbo’di asomuko. 31Kugbo Yuda laga alupodru azo‚ Yesu druga kulia adi‚ “Tinade Ŋiro lo ŋutulo irumbi pura kanye katani‚ ’bo Ŋun irumbi pura ku lepe katani. 32Kugbo Ŋun laga arumbi pura ku Ŋiro lo ŋutulo katani‚ Ŋun ipupudya Ŋiro lo ŋutulo kanye katani itro, ’bo lepe ipupudya lepe agbole. 33Ŋazi kuwe kilo, na isaka kasi ta ku baŋe a naŋutru. Ta igaga’yu na‚ ’bo beti naga ma na takindri Yahudi kilona, ‘Piri naga ma na utini nu ta ani romoki utu‚’ kuwade na takindra ta tinade. 34Na lo tikindra ta kukuzu naludu, adi nyareta nya ’beri kasu dridriŋini. Nyareta nya ’beri kasu dridriŋini be naga ma na nyadri tana. 35Ku kine kulia de ŋutulu kilo giri idedendra adi ta a lotodiniki kuwe kilo, kugbo ta laga gbo ku nyadru kasu dridriŋini.” 36Simona Petero druga piza lepe adi, “Mata‚ do lu tu da ya?” Yesu druga teyitokindro lepe adi‚ “Tinade do ani romoki kipundro bo niona i piri naga ma na utini nu, bo do ikekepodru bo niona a bo.” 37Petero druga piza lepe adi, “Mata, na ani romoki kepodru do tinade gbandra ya? Na ikokolokindro ru niona ku kulia konu kine.” 38Yesu druga teyitokindro lepe adi, “Do ikokolokindro ru nonuna ku kulia kuwe kine ya? Na takindra do a ’diri, ti sukurilo inga aku sira do irerenya na luŋa musala.

will be added

X\