YAKOBO 5

1Na adi‚ ta laga a ŋutulu laga a korineko kilo‚ gbineta‚ luluzita ku kulia ti dreliesi naga na popondra kasuni kine. 2Tokorine nasuna a’bure‚ ’de’diya kilo ame’yu bongola kasu kine. 3Drumo kasu kine ku riye kasu kine awori‚ ’bo wori nasikona isosozu kulia kasu ’berini, ko inyonyosu ’beri kasu kine beti kima. Ta a’delakindra ’beri tokorine i kilo luŋa de laga a ’dute kilo. 4Meteta, ropeta ti kakita laga lo bakindra ta melesiŋo kilo‚ ropeta ŋani kilo ta atroŋundra bo ku toŋulupana. Ko kilo wuwuŋi wuwuŋi. ’Bo resa na ka’dita kilo ayeŋadru suu i suwo ti Mata lo mongoyo na kamoro kilo yu. 5Ta asaka i kani ku kapazi lo’bu rodri ku nyola itro. Ta awowoa be su ku kulia ti ilo luŋa lo ’duŋoni talo de kine. 6Ta aŋedya kulia ti ŋutu laga ’ba torolo a naro‚ ta atatuza lepe‚ ’bo lepe aku goza ta. 7Luŋaseri kuwe kilo‚ gbo’dita ku teili lo mada yeŋadru tozo i pondra na Matalona. Meteta‚ kakurunilo momondru trora na konye laga a lo’bu lo’bu ti ka kilo. Lepe mondru ko ku teili lo rile ti inga kudu lo poŋolo ku lo aizelo aku ziye kini. 8Laga ta‚ gbo’dita ku teili lo mada itro. Tolireta teiliko kasu kilo, igbonaga pondra na Matalo ina gbo’di nyogoŋa ina. 9Luŋaseri kilo‚ ka’bi ta ku mamani ’beri kasu dridriŋini‚ ka’bi ta ku ŋeraki kulia. Meteta‚ kaŋerani lo kulialo alira i kaakutuni. 10Luŋaseri‚ yoleta kulia ti kakeyo laga kazu lo tazu kulia ku kari ti Matalo kine‚ kepodrita bo nasiko naga ku teili lo mada i dridriŋi na luŋulina. 11Meteta, ŋutulu laga ku teili lo rile se lo luŋu yi a ŋutu laga a ti koŋo na’bu kilo. Ta ayinga kulia ti teili lo rile lo Eyobolo kine. Ta amedra kulia naga ma Matalo kondri lepe i ’duteni kine‚ igbonaga koŋo na’buna ku ediyolo se lo gbo ku Mataloni koru. 12’Bo alanguna, luŋaseri kuwe kilo, ku nyonyota milio ku kari ti ’diko kine, kugbo ti ka kine, kugbo ku milio ne’de tro, ’bo kulia na ta ta kine kugbo Iye, taneta Iye ka’delo, ’bo kugbo kulia na ta ta kine kugbo ’Bayi, taneta ’Bayi ka’delo, ka’bi ta ku tika ku ŋera na kulia. 13Le’de ŋutu kasu dridriŋini ilo sasanya sasanya ya? Ti lepe make Ŋun. Le’de ŋutu gbo ku nyola ya? Ti lepe weloni i pudya na Ŋun. 14Le’de ŋutu kasu dridriŋini gbo ku tuwane ya? Ti lepe lungi temezi ti tomore na karuko kilo, ti ko make Ŋun, ti ko ’bukoki ŋutu ŋanilo wele i muguni ku kari ti Matalo kine. 15Magu naga ku rugo ina nyena ilogu ŋutu laga ku tuwanelo, Matalo lo itoruzo lepe, ’bo kugbo lepe laga akondra torozi, ko i’id’diya. 16Kuwade trukoki wori lolulo toro naga mo do konakindri lepena. Makakita ’beri Ŋun kasu dridriŋini, ma ta ku totoruwe. Magu na ŋutu laga mŋgbalona nyena gbo ku teriŋi na konani kulia koru. 17Eliya kazu a ŋutu laga be yi, ’bo lepe amagu Ŋun ku teili giri adi kudulo ka’bi ku ziziye. I kiŋazi musala ku yapazi bu kiye kilo kudulo aku ziye i kani. 18I bo ŋanina lepe druga ma’yu Ŋun ’do. ’Dikona druga tikindra kudu, kana druga trotrora konye kanye kilo. 19Luŋaseri kuwe kilo, kugbo le’de ŋutu kasu dridriŋini laga aliaŋa ku kulia ti to’diri kine, kugbo le’de ŋutu laga ateyitundro lepe bo, 20deneta adi ŋutu laga lo teyitundro katoronyani bo i konesi naro ti lepe kine kata yulo iritundro yuka na ŋutu ŋanilo i tuwani, lepe imumugo torozi kine rodri.

will be added

X\