YAKOBO 4

1Morona ŋiyu yeda ya? Ŋalapa naga kasu dridriŋinina ŋiyu yeda ya? Ŋiyu ku ki’beŋa kasu naga na momoro ’duu kasu ’berini kine. 2Ta gbo ku ki’beŋa ku le’de ŋo‚ ’bo ta ani momorani, nyena tatuzi ta ŋutu ina. Ta sozu konye i le’de ŋo ki‚ ’bo ta ani romoki rumbi ŋo ŋanilo, kuwade ta ŋaŋalapa ŋaŋalapa, ta momoro. Ŋo kilo ’bayi kasuni igbonaga bita ta aku magu ina. 3Ta mamagu, ’bo ta ani momorani tro, igbonaga ta kilo magu a naro, adi ma ta ku yakiza ŋo nani kilo ku ki’beŋa kasu lepe kinena. 4Ta laga a ŋutu ti towute kilo, ta aku deni adi ku ta laga kilo nyadru ina ka de, ta gbo’di a mero ti Ŋun? Kuwade kugbo le’de ŋutu laga lo nyadru gbo’da a wori lo na ka de, lepe atoyeŋundra mugu a miriku lo Ŋun. 5Ta arambu adi kulia na wuwuro kine akulia a ’busa adi Yuka Nakiye naga ma Ŋun tikindri i saka kaya katanina a kayinoni naga ku puso ya? 6’Bo lepe lo tikindra yi ’busa na’bu naga koruna. Ku kine kulia de, atayi adi, “Ŋun lo ringa ŋutulu laga lo pudya ’beri kilo, ’bo lepe tikindra ŋutu laga ’ba pudya na ’beri kilo ’busa na’buna.” 7Kuwade sopeta so kulia ti Ŋun kine. Goneta go kasosoyini lo kulialo, ma lepe wowoke kasu lagani. 8Mizuta nyoga ku Ŋun ni, ma lepe mizu nyoga kasuni. Lalaneta kenisi, ta laga a katoronya kilo. Tokeleta teiliko, ta laga ku teiliko mure kilo. 9Sakanita ku drelia‚ luluzita ku gbiye itro. Towuseta zonya nasuna a gbiye‚ nyola nasuna a luŋuli. 10Gbo’dita ’ba pura na ’beri ku Matalo i koŋoni‚ ma lepe toŋiyudru ta ki. 11Luŋaseri‚ ka’bi ta ku ’da’dari ’beri kasu dridriŋini. Ŋutu laga lo ’dadru luŋase‚ kugbo lo ŋedya kulia ti luŋase kinelo‚ lepe lo ’dadru kukuzu ina‚ lepe lo ŋedya kulia ti kukuzu ŋanina kine itro. ’Bo kugbo do ŋedya kulia ti kukuzuna do ani gbo’da a kakonani, ’bo do a kaŋerani lo kukuzu ŋanina. 12Ŋutu lo tikindra kukuzu ku lo ŋedya kulialo ilo gele‚ ŋolo a Ŋun laga lo romoki i ritundro na ŋutulu kilo‚ kugbo i tukarakindra na ŋutulu kilo itrolo. ’Bo do laga a ŋa lo ŋedya kulia ti ŋutu laga lo gbo’da konu gurubenilo ya? 13Na adi, ŋutulu laga lo kulia adi‚ “Indikini kuwa imalu, yi iutu i ne’de kezi yu, i saka yu de kiŋa gele i togbodru na kapazi kilo i riondru na rezema,” 14ti derengi ta aku de kulia ti imalu kine. Ru nasuna a inyo ya? Ta gbo beti kopure naga na meta i baŋe a naŋutruna, ’bo i bo ŋanina druga liliki kaŋo. 15’Bo nyadru kulianita de, adi, “Ku Matalo laga anyari, yi isasaka zoru i kondra na kine kulia de kugbo kunu de.” 16’Bo tinade ta pudya ’beri ku sisiŋa na ’beri. Pura na ’beri naga beti ina dena a naro. 17Kuwade ŋutu laga lo dendra kondra naga a na’bu ilo, kugbo lepe aku konu, kine kulia de a toro na lepe.

will be added

X\