YAKOBO 3

1Luŋaseri kuwe kilo‚ ŋutulu rodri kasu dridriŋini ka’bi ko ku yeyeŋundra a katogolo, igbonaga ta adeni adi yi laga a katogolo kilo iŋeraki kulia kine a naro arodru ina. 2’Bo yi kilo giri liliaŋa liliaŋa koru. Ŋutu laga ani liliaŋa ku kulia na ta nye kine, lepe a ŋutu laga soso a ’diri. Lepe roromoki tizu mugu nanyena giri. 3Kugbo yi laga asozu ŋo laga a witiko ku drongiyo kilo i kutuzini, adi ma ko ku sobini kulia kaya kine, yi yoyoŋadru ko mu pirito naga ma yi nyadrini kine. 4Meteta ki’bozi kine itro, ’dia kodro ku ko naga a drumala koru, ’dia kodro ku ko naga kine burazi ku kobuŋeto naga a riŋiko kine kpe, ko kine yoyoŋa yoyoŋa ku ’dole laga ’baziŋa koru i piri naga ma kayekani lo ki’bolo nyadri utini kata yu nu, ’dia gbo adinyo kpe. 5Ŋedelo gbo de. Lepe a dridriŋi naga ’baziŋa na mugu, naga na pudya mugu koru ku kuliata naga a drumala kine. Kade naga gba kine de kine ’ura ku kima na trerara a natriŋana. 6Ŋedelo lepe a kima. Lepe lo saka i dridriŋita ti ’beri kaya kine katani beti ka naga ani gbo’da gbogbona. Lepe kokorozu mugu na ŋutuna giri. Lepe totokobu yi kaya tuzoruni giri ku kima na ŋiyu i drili na kima naga a noketa nu. 7’Bo dridriŋita giri ti kapa ku ti kpenya ku ti kapa lo woworo ku gedyo ki kilo ku kapa ti suburi kilo roromoki todino ku loŋutu, a ’diri loŋutu atodindro ko ŋiyu ’bero. 8’Bo le’de ŋutu ’bayi lo romoki todindro ŋedelo. Lepe a loro, ani saka mada tro, lo zore ku kisu lo tatuza ŋutululo. 9Yi bita pupudya Ŋun Monyelo ku lepe. Yi bita momorozu ŋutulu kilo ku lepe ’do, ŋutulu laga agbeki ku gbetita na Ŋun kilo. 10Pupudyana ku momorozuna ko kine lupundro i kutu nagelena. Luŋaseri kuwe kilo, kine kulia de ka’bi ku gbogbo’da de. 11Kidilo roromoki tolupundro pio naga na toto’bi kine ku pio naga na potroru kine i koyita logele ya? 12Luŋaseri kuwe kilo, koligilo roromoki trora konye ti oliva kilo ya? Zabibulo roromoki trora konye ti koligi kilo ya? Pio naga na toto’bi kine ani romoki ’eme i pio naga a ’bala kine. 13Ŋa laga gbo ku tobodo ku dendra kasu dridriŋini ya? Ti lepe kpene konesi kanye kine ku gbiyeri lo’bu lonyelo, ku teili lo mada lo ŋiyu i tobodona katanilo. 14’Bo ku ta laga ku yule naga a narona, ku yikile na ’beri kasu teilikoni, ku pupuruta ’beri, ku gogota kulia ti to’diri kine ku se. 15Ina tobodo de agbo’da kiyundra kani i ’diko yuni, ’bo lepe a na ka, a na mugu, a na dreria loro kilo. 16’Bo i piri na gbo’diniki ku yule ku yikile na ’beri, kulia naga mŋgbelemŋgbele kine igbo’da itro, ku konesi naga a naro naro kine giri. 17’Bo tobodo na ŋiyu ki yuna gbo a kayo ku kekeli, ku teili lo trotro itro, ku teili lo mada, lepe gbo pa’de’de i makani, ku ediyo koru, ku trora na konye laga a lo’bu kilo‚ ani yoyongu mugu‚ ’ba toŋulupa itro. 18Kugbo ŋutulu lo ruruzu teiliko kilo kondra ku teili lo trotro‚ ko ’udru nyomo laga lo trora konye ti logbiye lo’bulo kilo.

will be added

X\