YAKOBO 2

1Luŋaseri kuwe kilo‚ ku ta laga a karuko ti Mata lika Yesu Kristo‚ Mata lo pupuralo, ku gegeta ŋutulu. 2Le’de ŋutu laga lo sozu drumo ku bongola naga na kpekpele a na’bu kine kugbo laga ilo lupundro kasu momorani‚ ’bo ŋutu laga a lemeri laga ku bongola naga akekenyeza kine kugbo ilo lupundro itro‚ 3kugbo ta laga kuga ŋutu laga lo sozu bongola naga na kpekpele kinelo‚ i takindra na lepe adi‚ “Pondri ku gbi’dikini nide po!” ’bo i takindra na ŋutu laga a lemerilo adi‚ “Lirani yu de‚” kugbo, “Gbi’dikini kuwe mukuzini‚” 4kine de trugo adi ta ge’ya ŋutulu kasu dridriŋini, ta gbo’di ŋedya kulia kine ku teili loro. 5Luŋaseri kuwe laga ma na nyadri koru kilo, yiŋeta. Ŋun anyumundro lemerika ti ina ka de kilo i gbo’da a korineko ku kulia ti rugo kine, ko i’deba tumata naga ma lepe sarakindri ŋutulu lo nyadru nye kilona. 6’Bo laga ta a’dadru lemerika kilo. Ani gbo’da korineko kilo lo sasandru ta ku teriŋi, lo pikodru ta i pirito na ŋerani kuliata kine kata yu ya? 7Ani gbo’da ko lo momorozu kari naga na kukaki naga kazu na tayi kasu kini kine ya? 8Ku ta laga kilo sobu kukuzu na tumatana a ’diri be naga ma wuronina adi, “Nyare ŋutulu lo saka konu gurubeni kilo be na nyadrini do muguna,” ta kilo kondra a na’bu. 9’Bo ku ta laga kilo ge’ya ŋutulu, ta kilo kondra toro‚ ’bo kukuzu ŋanina aŋerakindra ta kulia kine a naro, be na kakokoro ti kukuzuna kilo. 10’Bo ŋutu laga lo kondra kukuzuki girilo, ’bo kugbo akokorozu kulia gele, lepe iŋeŋeraki kulia be naga ma lepe kokorozi kukuzu girina. 11’Bo ŋutu laga kazu lo kulia adi, “Ku kokonu towute” ilo, nyelo kulia kazu adi, “Ku reremi ŋutu” itro. Kugbo do laga aku kondra towute, ’bo laga lo rembu ŋutu‚ do gbo’di a kakokoroni lo kukuzuna. 12Taneta kulia, koneta be na ŋutulu laga lo iŋerakini kulia kolele ku kukuzu na yokozu ŋutulu ina. 13’Bo i nu ŋera na kulia de Ŋun aka gbo’da ku ediyo ku ŋutu laga ’ba ediyoloni, ’bo kpe ediyolo nyelo itiga ŋera na kuliana. 14Luŋaseri kuwe kilo, kugbo le’de ŋutu laga akulia adi nye a karukoni, ’bo konesi ti lepe kine kugbo ’bayi‚ ilogu lepe adinyo ya? Rugo ŋanina iroromoki ritundro na lepe ya? 15Luŋase kuwa sase kugbo a pilili, ’ba kapa lo nyenyei soso mu luŋa, 16kugbo le’de ŋutu kasu dridriŋini laga atakindra ko adi, “Utinita ku teili lo trotro, ’beri kasu kine ti gbo’dini yu yu, yimonita yimo,” ’bo kugbo lepe ani tikindra ko kapazi laga ma ’beri kasiko kine nyadrini kilo, kine kulia de ilogu ko adinyo ya? 17Rugona gbo de. Kugbo lepe naga saka ka’delo, ’ba konesi, lepe atuwa azo. 18’Bo ku le’de ŋutu lo kulia adi‚ “Laga do gbo ku rugo‚ laga na gbo ku konesi,” na lo teyitokindro lepe adi‚ “Kpeki na rugo nonu naga ’ba konesina, laga na ikpekindra do rugo niona ku kiko lo konesi kuwe kine.” 19Do arugo adi Ŋun ilo gele. Do akondra a na’bu. ’Bo dreria kilo arugo itro, ko kilo zazangu ku kuze. 20’Bo do lo mamali‚ do aku deni adi rugo naga ’ba konesina ina ’ba logu ya? 21Ŋun aku kendra Abarahama merenye likalo mŋgba ku konesi ti lepe kine i naga ma lepe kodro tikindri ŋiro lonye laga Isaka a ’doke i piri naga a ’i’iletana ya? 22Do aku meri adi rugo na lepena akita kasi konesi ti lepe kine kugele ya? Rugo na lepena atorumokindro mugu soso ku kulia ti konesi ti lepe kine. 23Kulia na wuwuro kine atorumokindro ’beri adi, “Abarahama arugo Ŋun, ku kulia ŋani kine Ŋun akendra lepe mŋgba,” ’bo lepe aluŋu a wori lo Ŋun. 24Kuwade ta ameri adi ŋutulo kena mŋgba ku kulia ti konesi kanye kine‚ agbo’da ku kulia ti rugo kine ka’deloni. 25’Bo ’do Rahaba naga a noka na towutena akena mŋgba ku kulia ti konesi kanye kine, i naga ma lepe rukundri lo’dia kilo, i sonyodru na ko kaŋo ku le’de kikona. 26Kuwade, be naga ma muguna tuwani kugbo yuka naga ’bayina, rugona itutuwa kugbo konesi naga ’bayi.

will be added

X\