YAKOBO 1

1Yakobo laga a upiye lo Ŋun ku lo Mata Yesu Kristo ilo‚ aroma ku ketimito mere gele konye mure naga na reki i kani kine. 2Luŋaseri kuwe kilo, kugbo ta laga amomorani modruzi ka’de ka’de kine‚ ruketa ko a kulia ti nyola koru‚ 3igbonaga ta adeni adi moro na rugo nasuna nyena zowundra teili lo rile ina. 4’Bo kolokita teili lo rilelo ti leŋe kita nanyena, ma ta ku romokini soso i gbi­yeri lasulo giri, ka’bi ta ku zara le’de ŋo tro. 5Kugbo le’de ŋutu kasu dridriŋini laga ’ba tobodo, ti lepe make Ŋun laga lo ’doga ŋutulu kilo giri ’ba weleta, laga ani riringa ko ilo‚ ŋutu ŋanilo ititiki. 6’Bo ti lepe make ku rugo, ’ba yoyongu na teili. ’Bo ŋutu lo yoyongu teililo gbo beti pio ti suburi naga ma kobuŋena buradri, ma yingi ’beri kine. 7Lu ŋutu de ka’bi ku rarambu adi nye irumbi le’de ŋo ku Matalo i kenini, 8lepe gbo ku teiliko mure‚ laga lo gbo’diniki ’ba rame lo’bu i konesi kanye kine katani giri ilo. 9Luŋase laga iloŋadroolo ti pudyini mugu igbonaga lepe gbo’di akukakina. 10Ŋutu laga a korinelo ti pudyini mugu igbonaga lepe gbo’di ayeŋundra iloŋadroona‚ igbonaga lepe ilelenga be koturo naga i droru kata kine ina. 11’Bo kolo naga na lupundro na sa’yu kamaka be kimana‚ lepe tetiogu drorulo, koturo kine druga lugu ka‚ ’bu’busi nasikona druga kakaraki kaŋo. Korinelo ililiki de ’do i dridriŋi na konesi kanye kine. 12Koŋo na’buna ina i ŋutu laga lo gbo’da ku teili lo rile i modru katanilo, igbonaga kugbo lepe laga amoro‚ lepe irurumbi yogono lo ru laga lo saraki ŋutulu laga lo nyadru Ŋun kilo. 13Kugbo le’de ŋutu laga aluluka, lepe ka’bi ku kukulia adi, “Ŋun lo luluga na.” Ŋun ani romoki luluka ku kulia naro‚ ’bo lepe ani luluga le’de ŋutu ’do tro. 14’Bo ŋutu gele gele luluka i naga ma ki’beŋa ti lepe kine pikundri lepe i zigo na lepe itrona. 15I bo ŋanina kugbo ki’bena naga ariondru pele‚ lepe druga yuŋundro toro. Kugbo torona naga gbo’di a golo‚ lepe druga yuŋundro tuwa. 16Luŋaseri kuwe laga ma na nyadri kilo, ka’bi ta ku ’bo’bolia ’bo’bolia. 17’Doga gele gele naga a na’buna ku ’doketa gele gele laga a lo’bu kilo ŋiyu ki yu, ko kilo kiyundra kani ŋiyu ku Monye lo pararazi ti ’diko kinelo yu. Lepe ani lopugo mugu tro, ani tikindra mude ku lopugo na mugu nanyena. 18Ku nyadru nanye lepena, lepe ayuŋundro yi ku kulia ti to’diri kine, ma yi ku gbo’da be konye lo trora a kayo kilo, i dridriŋi na kapazi laga ma lepe gbekindri kilo. 19Luŋaseri kuwe laga ma na nyadri kilo, deneta kine kulia de. Ti ŋutulu kilo giri yiŋe wule, ka’bi ko ku popoki i tazu wule, ka’bi ku ŋoŋoma wule itro. 20Ŋoma na ŋutuluna ani kondra be na lopete laga soso lo Ŋun ilo. 21Kuwade guparata ŋo giri laga a mundri kilo kaŋo, ku kulia naro na ’du’dudyo kine, ruketa ku teili lo tumada kulia na ’utuki kasu teiliko katani, naga na romoki i ritundro na ta kine. 22’Bo gbo’dita a kakona ti kulia ŋani kine, agbo’da a kayiŋa ’du laga lo ’bo’boliza ’beri kiloni. 23’Bo kugbo le’de ŋutu laga a kayiŋani lo kulia ’du, kugbo agbo’da a kakonanini‚ lepe gbo be ŋutu laga lo medra koŋo nanye lepena i maraya ilo. 24Lepe medra mugu wule‚ druga tutu‚ ’bo wuleŋa gele lepe druga boboŋo adi koŋo nanyena gbo adinyona. 25’Bo ŋutu laga lo medra soso kukuzu naga a na’bu‚ na yokozu ŋutuluna ilo‚ kugbo lepe lo kondra ’duu‚ ku lepe agbo’da a kayiŋani laga lo boboŋoloni‚ ’bo a kakonani laga lo kokondralo, ŋutu ŋanilo nyelo igbo’da ku koŋo na’bu ku kondra nanyena. 26Kugbo le’de ŋutu laga lo rambu adi nye a kateminioni lo Ŋun‚ ’bo kugbo lepe laga ani goza ŋede lonyelo teminizo naga ma ŋutu ŋanilo teminizi Ŋun ina a busa ’bo lepe ilo ’bo’boliza mugu. 27Teminizo naga ku kekeli‚ naga aku kokoreyi ku Ŋun Monyelo i konyenina‚ nye naga ina de: wodru na kikiziko kilo ku na awuzio kine kasiko i sasanyani, ku tiyu na mugu ’ba ’bo’yu na mundri ti ina ka de kine.

will be added

X\