EBERE 8

1Moko lo kulia naga ma yi tazi kinelo nye ilo de: yi gbo ku ka’i’ilani laga a leŋgberelo be ilo de‚ laga agbi’diki i keni lo lutate lo si’de na Ŋun laga ku todruma koru i ’diko yu‚ 2laga a kakitani lo piri naruruwa lo hema naga mŋgbana itro. Matalo lo ’begu hema ŋanina agbo’da loŋutuni. 3’Bo ka’i’ila laga a leŋgberela kilo giri gele gele a’delaki i tikindra na ’doketa ku ’i’ileta. Kuwade nyadru ti ilo ka’i’ilani de gbo’dini ku ŋo laga lo titikilo. 4Kedri kodro ku lepe laga ilo i kani‚ lepe kedri kodro aka gbo’da a ka’i’ilani troni‚ igbonaga ka’i’ila kilo kata laga lo tikindra ’doketa be naga ma kukuzuna nyadrinina. 5Laga ko kilo kondra kita na ŋo laga a kpiye kugbo a kodudo na piri naruruwa naga i ’diko yuna‚ ’bo kugbo Mose laga gbo’di nyogoŋa ku ’begu na hemana‚ Ŋun atogo’yu lepe adi‚ “Gbo’di ku konye i kondra na kapazi giri be na kpiye lo kpekini do i merelo ki yu ina.” 6’Bo kpe, Yesu arumbi kita naga a na’bu arodru kita na ’berona, beti naga ma tomore naga ma lepe tomodyina a na’bu arodru ina, igbonaga asara ku sareta laga a lo’bu arodru kilona. 7Kedri kodro ku tomore naga a kayona naga ’ba toro‚ kedri kodro naga a togi murena aka galani. 8’Bo lepe ilo mandru ko i kulia naga adi‚ “Meteta‚ luŋa kilo kilo ipondra‚ Matalo lo kulia‚ laga ma na kukundri tomore naludu ku ketimi na Isiraelina, ku na Yudana. 9Agbo’da be na tomore naga ma na kukundri ku merenyezi kasiko kiloni‚ i luŋa laga ma na ’debini ko ku kenisi‚ i ’dolakindra na ko kuwe ŋiyu i ka na Ezepeto kata yunani. Ko aku sobu kulia ti tomore niona. Kuwade na lepe aku rambu kulia kasiko kine‚ Matalo lo kulia. 10’Bo tomore naga na ikukundra ku ketimi na Isiraelina i bo na kulu luŋazi de kilona, nye ina de‚ Matalo lu kulia: Na i’delakindra kukuzuki kuwe kine kasiko i yoyoluzuni, ’bo na iwudyo ko kasiko i teilikoni itro. Na igbo’da a Ŋun lasiko‚ ’bo ko igbo’da a zuru lio. 11Ŋutu gele gele aka togo’yu ŋutu laga kanye ’ba yu‚ kuwa luŋase lonyeni adi‚ ‘Dene Matalo‚’ igbonaga ko giri idedeni na‚ suluza i ŋutulu laga kiloŋadroo kilo yeŋadru suu i drumala kasiko kilo yu ina. 12’Bo na igbo’da ku ediyolo ku kulia naro kasiko kine‚ na aka rambu kulia ti torozi kasiko kine ’doni.” 13Ku lepe laga atazu kulia ti tomore naluduna kine, lepe atoyeŋundra tomore naga a kayona gbo’di a naŋoru. Ŋo laga ayeŋundra a loŋorulo, laga lo lelenga ilo gbo’di nyoga ku liki.

will be added

X\