EBERE 7

1’Bo ilo Melekizideki de, laga a mata lo Salemalo, laga a ka’i’ilani lo Ŋun laga Ki yulo‚ amomora seku Abarahama i naga ma lepe yiteni boni i reremozu na mataki kilona‚ druga tikindra lepe koŋo na’bu. 2Abarahama druga korakindra lepe dri driŋi gele i mere gele katani ti kapazi kilo giri. A kayona bo na kari ti lepe kinena a mata lo logbiye lo’bulo. ’Bo lepe a mata lo Salema itro, trugo adi mata lo teili lo trotrolo. 3Kari ti monye lo lepelo kuwa ti ŋote na lepena kuwa ti merenyezi kine aku wuro. Yuŋe na lepena kuwa tuwa na lepena aku wuro ’do. Lepe gbo beti Ŋiro lo Ŋun, lo saka a ka’i’ilani lo paratra paratralo. 4Meteta ilo ŋutu de a druma gbaŋa ya! Abarahama laga a merenye lika laga a kayolo atikindra lepe dridriŋi gele i mere gele katani ti kapazi lo nine i moro kata yu kilo. 5Kulu ŋutulu de laga a ti ŋazi ti Levi laga lo rumbi kita na ka’i’ila kilo, se lo ruke ku kukuzuna i rukundro na dridriŋita gele gele i mere gele katani ku ŋutu kilo yu‚ trugo adi ku luŋaseri kase kilo yu‚ ’dia kodro ku kilo ŋutulu de alupundro ku Abarahama i mugu yu itro kpe. 6’Bo ilo Melekizideki de laga aku kena ku Levi kilo i merenyezi kilo i dridriŋini ilo arumbi dridriŋi gele i mere gele katani ŋiyu ku Abarahama yu druga tikindra Abarahama laga ma Ŋun sarakindri kapalo koŋo na’bu. 7Kine kulia de ani romoki rerenyaniki adi ŋutu laga a drudrulo bita tikindra ŋutu laga iloŋadroolo koŋo na’bu. 8Inide ŋutulu laga romoki tatuwa kilo se lo rumbi dridriŋita gele i mere gele katani‚ ’bo yu de ŋutu laga ma bo na kulia ti lepe kine ’dotoni adi lepe ilo zoru ’duulo nyelo rumbini. 9A ’diri yi roromoki kulia adi Levi lepe laga lo rumbi dridriŋita gele i mere gele katani ilo nyelo tikindra dridriŋita kine ku kiko lo Abarahamalo‚ 10igbonaga lepe inga lu ku merenye lonyelo i mugu yu i luŋa laga ma Melekizideki momorani lepe lu. 11Kukuzuna nyena tiki ku kulia ti ka’i’ila laga a ŋutu ti Levi kilo. Nyenaga kugbo kita na ka’i’ila laga a ŋutu ti Levi kilo naga kazu romoki toyeŋundra ŋutulu kilo a lo’bu‚ kazu kodro ka’i’ilani le’de lo rudra piri na Melekizidekilo, agbo’da lo rudra piri na Aronananilo, kazu kodro ani nyara. 12Kuwade kugbo kulia ti ka’i’ila kilo naga alopuko, trugo adi kukuzuna nyena lopuko itro. 13’Bo ŋutu laga ma kine kulia de tayinilo a lo ketimi ne’de. Le’de ŋutu ’bayi laga a lo ketimi ŋanina laga akondra kita i piri naga a ’i’iletana kata yu. 14’Bo kine kulia de adena adi Mata likalo ŋiyu i ketimi na Yudana kata yu. ’Bo Mose aku ’di’dindra kari ti inu ketimi de i naga ma lepe tazini kulia ti ka’i’ila kilo nu. 15Kugbo ka’i’ilani le’de laga beti Melekizideki laga alupundro, kulia ŋani kine puru gboŋa arodru. 16Lepe a ka’i’ilani, agbo’da ku kukuzuki naga ti ina ka de kineni, ’bo ku teriŋi na ru naga ani romoki tukarakina. 17Bo na kulia ti lepe kine a’doto adi, “Do a ka’i’ilani lo paratra paratra, lo rudra piri na Melekizidekinalo.” 18Kuwade kukuzu na ’berona akolo kaŋo igbonaga lepe ’ba teriŋi, ’ba logu itrona. 19’Bo kukuzuna aku toyeŋundra le’de ŋo a lo’bu tro. ’Bo tinade yendru naga troru a na’bu atolupe azo‚ naga na mizoroni yi nyogoŋa ku Ŋun. 20’Bo kine kulia de agbo’da ’ba koyoni. Kazu ’berona ka’i’ila kilo a’deba kita nasena ’ba koyo‚ 21’bo Yesu a’deba nanyena ku koyo‚ be naga ma Ŋun takindri lepena adi, “Matalo asara ku koyo‚ Lepe aka lopugo teilini‚ adi ‘Do a ka’i’ilani lo paratra paratralo.’ ” 22Kuwade ku kine kulia de Yesu ayeŋundra a karopani lo tomore naga a na’bu arodruna. 23Ka’i’ila ti ’bero kilo ko rodri‚ igbonaga tuwana agoza ko i saka naga ’duu i kita kutunina. 24’Bo Yesu a’deba kita nanye na ka’i’ilanina paratra paratra igbonaga lepe lo yiŋiki kini ina. 25Ku kine kulia de lepe gbo ku teriŋi i ritundro na ŋutulu giri lo pondra ku Ŋun ni ku kiko lonyelo kilo paratra paratra, igbonaga lepe lu yiŋiki kini mu luŋa i mulukindro na koŋa Ŋun ina. 26’Bo a na’bu kayani ku yi lo gbo ku ka’i’ilani laga a leŋgbere be ilo delo, laga a lokiye lokiye, ’ba kulia na sosoyi sosoyi, ’ba toro‚ lo gele ka’de i katoronya kilo‚ laga atoŋiye ki ku teminizo i ’diko yulo‚ kayani a na’bu. 27Ani nyadru ti lepe ’i’izi ’i’ileta mu luŋa be kulu ka’i’ila laga a leŋgberela kulu de‚ a kayona ku kulia ti torozi kase lepe kine, i bo ŋanina ti torozi ti ŋutulu kilo giri kine. Yesu akondra de luŋa gele ’du i naga ma lepe tikindri muguna. 28A ’diri kukuzuna ina ’delakindra ŋutulu laga a munyeka kilo a ka’i’ila laga a leŋgberela kilo‚ ’bo kulia na sari Ŋun ku koyo na sara i bo na kukuzu ŋanina se na ’delakindra Ŋiro laga a lo’bu paratra paratra ilo.

will be added

X\