EBERE 6

1Ku kine kulia de‚ ti yi kolokindri togoleto naga a kayo ti Kristo kine‚ ti yi rosodri ŋero yu yeŋadru tozo i gbo’da a ŋutulu laga aguguli‚ ka’bi yi ku ’de’delaki muko na kulia ti lopuko na teili i konesi naga na zondra tuwa kine ’do ’do‚ ku na rugo naga ma yi rugini Ŋun ina‚ 2ku togole laga i baputizilo ku laga i tanya na kenisilo, ku ŋiye na ŋutulu laga atatuwa kilona‚ ku ŋera na kulia naga ani lengana. ’Bo ti yi rosodri ŋero yu ayu. 3Yi ikokondra de ku Ŋun laga anyadru. 4’Bo ŋutulu laga kazu awangu ’doke lo ’dikolo kilo‚ laga aŋarundra Yuka Nakiyena kilo‚ 5laga awangu ’bu’busi na kulia ti Ŋun kine ku teriŋito ti baŋe naga na popondrana kilo‚ 6i bo ŋanina ku ko laga ako’yu kulia ŋani kine‚ ko ani romoki tiki koŋo na’bu na lopukoni teilikona ’do igbonaga ko ku ’beri lo ’begu Ŋiro lo Ŋun ilo ’do i kedini ki‚ i tikindra na lepe yukuwe ku ŋutulu i koŋo yu ina. 7’Bo ka naga na ’biza kudu laga lo ziye koru ilo‚ naga na trorani ’detilo na zuki ku ŋutulu laga ma lepe kuruni ku kulia kasiko ina, ka ŋanina irurumbi ’bu’busi na Ŋun ina. 8’Bo kugbo lepe naga arada kakuwa kine ku tulala kilo, lepe ani ruke a na’bu, lepe iyeŋundra nyoga ku lomo, ’bo ’dute na lepena igbo’da a tonoka. 9Ta laga lo nyanyara kilo‚ ’dia kodro ku yi laga lo kulia de kpe‚ yi lidra ’beri ku kulia kasu kine‚ adi ta gbo ku kulia naga a na’bu a ti rite kine. 10’Bo Ŋun ani muzu kulia, ’bo lepe ani boŋo kita nasuna ku nyadru naga ma ta kpezi ku kulia ti kari kanye kinena‚ ma ta konakindri kazu ŋutu ti lepe kilo kita be naga tinade ma ta konakindri koŋa itro ina. 11Yi nyadru adi ŋutulu giri gele gele kasu dridriŋini ti ko kpene puso naga be ina dena‚ yeŋadru tozo i ’dute‚ yeŋadru tozo i luŋa laga ma ta riondrini kulia naga ma ta yendrini kine lu. 12Ka’bi ta ku yeyeŋundra a lu’betiko i yoyolozu nasuna‚ ’bo gbo’dita a kamira ti ŋutulu laga lo rumbi kulia na sari Ŋun kine ku rugo‚ ku teiliko laga madaa itro. 13I luŋa laga ma Ŋun kazu sarakindri Abarahama sare lu‚ lepe asarakindra koyo ku kari kanye lepe‚ igbonaga le’de ŋutu ’bayi laga lo rodru lepe ma lepe ku romokini sarakindri koyona ku kari ti lepe kinena. 14Lepe akulia de adi‚ “Na ititikindra do koŋo na’bu a ’diri‚ na itotoyili do.” 15Kuwade kazu kugbo Abarahama laga asaka ku teili lo rile‚ lepe arumbi kulia na saraki nye kine. 16’Bo ŋutulu kilo bita sarakindra koyo ku kari ti ŋutu laga arodru selo‚ ’bo koyo ŋanina atoliriza kulia ŋani kine i goza na kutu na rerenyeta nasikona. 17Kuwade kugbo ku Ŋun laga anyadru kpekindra ŋutulu lo iku rumbi ŋo lo sari nyelo kilo lopete lonye laga ani lopugo mugulo soso‚ lepe druga sarakindra ko koyo. 18Kuwade kulia mure kata‚ naga ani romoki lupugo ’beri‚ naga Ŋun ani romoki lengi ’bure kine‚ ma yi laga awoku ku lepeni kilo ti gbo’dini ku ruda na teiliko koru i ’depakindra na ’beri i yendru naga kaya koŋonina. 19Ina yendra de naga na toliriza teiliko kaya kilo sosona gbo beti witi lo toliriza ki’bona, laga logo, laga ani yoyongu mugu‚ lo lubo i piri naga kide nu i ki’di na bongo na ŋerani kata na kadi na Ŋun ina, 20i piri naga ma Yesu lubini kata yu ku kulia kaya kinena. Lepe ayeŋundra a ka’i’ilani laga a leŋgbere lo paratra paratra lo rudra piri na Melekizidekinalo.

will be added

X\