EBERE 3

1Ku kine kulia de‚ luŋaseri laga a ŋutu ti Ŋun laga ma lepe luŋundri kilo, yoleta Yesu, lo sunyu Ŋun, a ka’i’ilani laga a leŋgbere lo rugo nika naga ma yi tazinilo. 2Lepe kazu gbo ku teili lo to’diri ku Ŋun lo gelundra nyeloni beti naga kazu ma Mose gbo’dini ku teili lo to’diri i dridriŋi na ŋutulu ti ’ba lo Ŋun kilo giri ina. 3’Bo Yesu akena a lo zuki i rumbi na pura arodru Mose, be naga ma ka’dukoni lo kadilo rumbini sopo arodru kadi ŋanina ina. 4’Bo kadizi giri gele gele ’duko ku ŋutu, ’bo ka’dukoni lo kapazi girilo ŋolo a Ŋun. 5Nyenaga Mose kazu gbo ku teili lo to’diri i dridriŋi na ŋutulu ti ’ba lo Ŋun kilo, a kakitani laga lo ’dodru bo na kuliata naga na ku tatayi a bo kine, 6’bo Kristo gbo ku teili lo to’diri be ŋiro i dridriŋi na ŋutulu ti ’ba lo Ŋun kilo. ’Bo kugbo yi laga a’depakindra ’beri tritri ku teiliko laga lo litani ’beri i yendru nikana, yi a ’ba lo lepe. 7Ku kine kulia de, be naga ma Yuka Nakiyena kulianina adi‚ “Indikini ku ta laga kilo yinga roro lo lepelo‚ 8ku ’de’delakita teiliko kasu kilo a logo, be naga i baŋe naga ma ta pazi Ŋun nu, i luŋa lo modru naga i diŋo kata yu nu, 9i luŋa laga ma merenyezi kasu kilo modrini na lu, ’dia kodro ku ko amedra konesi kuwe kine kiŋazi meria iŋmani de kpe. 10Ku kine kulia de na aŋoma ku nu yuŋe de, na akulia adi, ‘Ko kilo liliaŋa ’duu i teiliko kase kiloni, ko aku deni kikoli kuwe kilo tro.’ 11Be naga ma na kogi mugu ku ŋoma niona adi, ‘Ka’bi ko ku lulubo i piri nio naga a yuketana kata yu tro,’ ina.” 12Luŋaseri, gbo’dita go ka’bi le’de ŋutu kasu dridriŋini ku gbo’da ku teili loro laga ’ba rugo, i tikindra na ta i ko’yu na Ŋun laga zoru ilo. 13’Bo rudeta teiliko kasu kilo kasu dridriŋini luŋazi kilo giri‚ ti inga luŋa lo luŋu a ‘Indikini’ ilo kata‚ le’de ŋutu kasu dridriŋini ka’bi ku gbo’da ku teili logo ku toŋulupa na torona. 14’Bo ku yi laga a’delakindra teiliko kaya kilo i yendru naga a kayona kini tritri yeŋadru tozo i ’dute yu, yi a kaŋara ti Kristo. 15’Bo awuro adi, “Indikini ku ta laga kilo yinga roro lo lepelo, ku ’de’delakita teiliko kasu kilo a logo, be naga i baŋe naga ma ta pazi Ŋun nu.” 16Kuŋa laga ayinga druga pazu Ŋun ya? Agbo’da a ŋutulu giri laga ma Mose tolupundri kaŋo Ezepeto kata yu kiloni ya? 17Lepe aŋoma ku kuŋa kiŋazi meria iŋmani ya? Agbo’da ku ŋutulu laga akondra toro, laga opuo kasiko kilo a’do’do i diŋo kata yu kiloni ya? 18Lepe akoga mugu ku kuŋa adi ka’bi ko ku lulubo i piri nanye naga a yuketana kata yu tro ya? Agbo’da ku ŋutulu laga ’ba sobu na kulia kiloni ya? 19Kuwade yi amedra adi ko aku romoki lubo ku kulia ti ’baka na rugona.

will be added

X\