EBERE 2

1Ku kine kulia de kita ’deba kulia naga ma yi yingi kine soso arodru‚ ka’bi yi ku ’dukuzi kaŋo. 2’Bo kugbo kulia naga kazu malaika kilo ma tazi kine naga alira tritri‚ kugbo ŋutulu kilo giri laga akokorozu kukuzuna, kugbo ko laga aku sobu kulia ŋani kine kilo kazu arumbi ropeta laga soso‚ 3yi lepe iritundro ’beri adidinyo kugbo yi laga a’dadru rite naga a druma dena ya? Matalo lepe atrugo kulia ti rite kine druga ŋutulu laga lo yinga lepe kilo tolirakindra kulia ŋani kine kayani, 4’bo Ŋun lepe a’dodru bo na kuliana kasi ko kugele ku kpiyesi‚ ku wonyesi, ku konesi ka’de ka’de naga ku teriŋi kine‚ ku ’doketa ti Yuka Nakiye laga akora be naga ma lepe lepe nyadrinina kilo. 5’Bo Ŋun aku tikindra malaika kilo ’dola na kuwe na ka naludu naga na ipopondrana, naga ma yi tazinina, 6’bo i piri ne’de kata yu bo na kuliana a’doto adi‚ “Ŋutulu kilo a inyo‚ laga mo do rambini kulia kasiko kine‚ kugbo loŋutu a inyo laga mo do yo’ini ko ya? 7Do a’delakindra ko ku malaika kilo i boni ku baŋe a ŋaŋutru, do atikindra ko pura seku sopo be yogono kasiko i kuwetoni, 8Do a’delakindra kapa kilo giri kasikoi mukuzini, ma kapa ŋani kilo ku sobi ko ’busa.” Nyenaga kugbo lepe laga a’delakindra kapa kilo giri ku loŋutu i mukuzini, lepe aku kolokindro le’de ŋo laga aku sobu ko. ’Bo yi inga aku medra adi Ŋun a’delakindra kapa kilo giri ku loŋutu i mukuzini. 9’Bo yi medra Yesu laga a’delaki ku malaika kilo i boni ku baŋe a naŋutru‚ tinade lo tiki ku pura seku sopo ku kulia ti luŋulio ti tuwa kine ma lepe ku wangini tuwana i piri na ŋutulu giri‚ ku ’busa na’bu na Ŋun ina. 10’Bo kulia kine azuki adi Ŋun lo gbeza kapa kilo giri ku lo tizu ko itro ilo ma toyeŋundra Yesu‚ Kariteni lasiko laga a Ka’dolani lo kuwelo a lo’bu ku sasanya na lepena, adi ma lepe ku tikindri ŋazi rodri i ŋarundra na pura nanyena. 11’Bo katokelani lo ŋutulu kilo kasi ŋutulu laga atokela kilo ŋiyu giri ku Monye logelelo yu. Ku kine kulia de lepe ani gbo’da ku yukuwe i lungu na ko a luŋaseri 12adi‚ “Na itrukokindro luŋaseri kuwe kilo kari konu kine, na iwilikindro do wirito i dridriŋi na tomore na ŋutulu kilo.” 13’Bo‚ “Na ititikindra mugu i rugo na Ŋun.” ’Bo‚ “Mete, na ma lo ku ŋazi laga ma Ŋun tikindri na kilo.” 14Nyenaga igbonaga ŋazi kilo ŋaŋarundra mugu na rima inana, Yesu lepe aŋarundra mugu nasiko na rimana itro, adi ku tuwa nanyena ma lepe ku tukarakindri kanukanilo, ŋolo a kasosoyini lo kulialo, 15ma lepe ku lagi ŋutulu giri laga atora a upi ku kuze na tuwana i baŋesi ti tuzoru nasikona giri kilo. 16’Bo lepe agbo’da logu malaika kiloni, ’bo lepe logu nyomo ti Abarahama kilo. 17Trugo adi nyadru ti lepe yeŋundri be luŋaseri kanye kilo i kuliata giri, ma lepe ku gbo’dini a ka’i’ilani laga a leŋgbere laga ku ediyolo‚ ku teili lo to’dirilo, laga lo konakindra Ŋun kita‚ a ’i’ile lo kukunani kulia ti torozi ti ŋutulu kilo. 18Kuwade igbonaga lepe ku mugu asasanya, aluluka ina, lepe roromoki logu ŋutulu laga lo luluka luluka kilo.

will be added

X\