EBERE 13

1Nyareta nya ’beri ’duu kasu dridriŋini a luŋaseri. 2Ku boboŋota rukundro na ŋutulu laga a kulege kilo a komo, igbonaga ku kondra naga be ina dena ŋutulu ku’de kilo arukundro malaika a komo ti inga ko aku deni ko. 3Rameta kulia ti ŋutulu laga adrodrora kilo beti naga ma ta gbo’dini kasi ko kugele i drodrora kata yuna. Rameta kulia ti ŋutulu laga akona a loro kilo, igbonaga ta itro gbo a ŋutu ti muguna. 4Kulia ti lundra kine ti teminioni teminio ku ŋutulu giri. Kulia naga ma lalelo totoni seku noka nanyena kine ka’bi ku kokoroyi kokoroyi, igbonaga Ŋun iŋeŋedya kulia ti ŋutulu laga ku konye lopi ku laga ti towute kilo i tiga na ko 5Nyara na riyena ka’bi ku gbogbo’da kasu gbiyerini. Sakanita ku teiliko laga a ti nyola ku kapazi lo gbo’da kasuni kilo, igbonaga Ŋun akulia adi, “Na aka zara ku tani, na aka kolokindro tani.” 6Kuwade yi kulia ku teiliko logo adi, “Matalo a Kalokoni lio, na aka kuzeni‚ Ŋutulu kilo roromoki konakindra na inyo ya?” 7Rameta kulia ti ŋutulu laga a ka­’dola ti kuweto kilo, laga atrukokindro ta kulia ti Ŋun kine. Rameta kulia naga na lupundro ku gbiyeri lasikolo kine. Keporota bo na rugo nasikona. 8Yesu Kristo gbo ku busi nanye nagelena kaaze, indikini yeŋadru tozo paratra paratra. 9Ka’bi ta ku wuwusayi wuwusayi ku togoleto naga ka’de ka’de naga a ti lege kine, igbonaga a na’buna teiliko kaya kilo ti rumbini teriŋi i ’busa na’bu na Ŋun ina‚ agbo’da i nyosutoni. Kakepo ti kine kulia de kilo aku rumbi loko tro. 10Yi gbo ku piri nika naga a ’i’ilena. Kakita ti hema kilo ani romoki nyosu kapa ti ina piri de kilo. 11’Bo kapa lo ’duŋo laga ma ka’i’ilani laga a leŋgberelo zondri rima kasiko kine i piri naruruwana katani a kapa lo kukunani kulia ti torozi kine kilo‚ ko atonoka kaŋo i piri na resani hemalana i ki’di yu. 12Kuwade Yesu asasanya kaŋo i kezi ki’di yu‚ ma lepe ku toke’ya ŋutulu kilo ku rima kanye lepe kine. 13Kuwade ti yi lupodri ku lepe yu kaŋo i piri na resani hemazina i ki’di yu‚ i ’dogu na yukuwe na lepena. 14’Bo kezi nika na sakaniki ’duuna ’bayi nide‚ ’bo yi ga’yu kezi naga na popondra nu. 15Kuwade ku kulia ti Yesu kine‚ ti yi tikindri Ŋun ’i’ile lo purani lepe ’duu‚ trugo adi roroto kaya kilo ti pudyini kari ti lepe kine. 16Ku boboŋota kondra na konesi naga a na’bu kine, ku kora na kapazi kilo‚ igbonaga Ŋun nyonyola ku konesi naga be kine de kine. 17Sopeta so kulia ti ka’dola ti kuweto kasu kilo. Ruketa ko ku teminizo igbo­naga ko a katiyu ti yukala kasu kine laga lo ikpeza kolele kulia ti kita nasena. Tikita ti ko kondri de ku nyola, agbo’da ku luŋulini. Kugbo ko gbo ku luŋuli ta ani rumbi rezema tro. 18Maketa Ŋun ku yi, igbonaga yi adeni adi yi gbo ku dendra naga a nakiye na teilikona, yi nyadru kondra naga soso i kuliata giri. 19Na ma’yu mugu ku ta ku teili giri, ma ta ku magini de ma na yiteni kasuni wule ’busa. 20Ŋun lo teili lo trotrolo atoŋizu Mata lika Yesu laga a Kayukuni druma lo kebilizilo ku ŋutulu laga atatuwa kilo i dridriŋini, ku kulia ti rima naga a ti tomore naga a na paratra paratrana. 21Ti Ŋun kukunakindri ta kapazi giri laga a lo’bu kilo ma ta ku kondra ŋo laga ma lepe nyadrinilo ’busa. Ti lepe kone kayani ŋo laga ma lepe nyadrinilo ku kulia ti Yesu Kristo kine. Ti lepe purani pura, paratra paratra. Amena. 22Na ma’yu mugu ku ta, luŋaseri, tineta ti teiliko kasu kilo ku kulia kuwe na rudani teiliko kine, igbonaga na awurokindro ta kulia naga a naŋutrutro kinena. 23Deneta adi luŋase lika laga Timoteo alake azo. Ku lepe laga apondra wule, yi imedra ta seku lepe kugele. 24Rometa roma ku ka’dola kasu ti kuweto kilo giri ku ŋutu ti Ŋun kilo giri itro. Ŋutulu lo pondra Itali yu kilo aroma ku ta. 25’Busa na’buna ti gbo’dini ku ta giri.

will be added

X\