EBERE 11

1Rugona nyena toliriza yendru nikana‚ lepe na tikindra yi lidra na kuliata naga ani meta kine. 2Ku rugo nasikona ŋutu ti ’bero kilo kazu aruko adi ko a lo’bu. 3Ku rugona‚ yi ayo’yu adi kapazi kilo giri agbeki ku kulia na ta Ŋun‚ gbode ŋo laga lo memeta kilo alupundro ku ŋo laga ani meta kilo katani. 4Ku rugona‚ Abeli atikindra Ŋun ’i’ile laga a lo’bu arodru lo Kainalo. Lepe druga kena mŋgba‚ ’bo Ŋun a’dodru bo na lepe na kuliana ku naga ma lepe rugi ’doketa ti lepe kilona. ’Dibani kodro ku lepe laga atuwa kpe‚ ku kulia ti rugo na lepena kine‚ lepe ilo kulia ’duu. 5Ku rugona Enoka a’dukuzi ki yu‚ ka’bi lepe ku wangu tuwana. Lepe aku rie‚ igbonaga Ŋun azonga lepe kanye yuna. ’Bo ti inga lepe aku ’dukuzina, bo na lepe na kuliana a’doto adi lepe atikindra Ŋun nyola. 6Kugbo rugona naga ’bayi‚ yi ani romoki tikindra lepe nyola tro‚ ’bo ŋutu lo kodro mizu nyoga ku Ŋun ilo‚ ti lepe rugi adi Ŋun kata‚ adi lepe lo roba ŋutulu lo ga’yu nye kilo. 7Ku rugona Noa a’delakindra teili i kukundra na ki’bona ku riteni ŋutu ti ’ba lonye kilo‚ ti Ŋun akukuzu lepe ku kulia ti ŋo laga inga aku meta kilo. Ku kine kulia de lepe aŋerakindra ŋutulu ti ka kilo kulia naro ’bo lepe akena mŋgba, ayeŋundra a ŋutu lo logbiye lo’bu lo rie ku rugo lo. 8Ku rugona Abarahama asobu kulia ti Ŋun kine i luŋa laga ma Ŋun lungini lepe i lupodru kaŋo i utu i piri naga ma lepe ku rumbi a ŋo lonye lepe nu. Lepe druga lupodru kaŋo, ’bo lepe aku deni piri naga ma lepe ku utini nu. 9Ku rugona lepe asaka a monyatio i ka naga asaraki lepena kata yu be naga i ka na lege kata yu ina. Lepe asaka i hemala kata yu kasi Isaka ku Yakobo laga lo saraki kulia kasi lepe kugele kilo. 10Kuwade lepe lu momondru kezi naga na gbo’da ku mukoto, naga kakukunanilo ku ka’dukonilo a Ŋun ina. 11Ku rugona Sara lepe arumbi teriŋi na rieni ’busa ’dia kodro ku kiŋazi ti lepe kilo arodru kpe, igbonaga lepe arambu adi kasarani laga lo sarakindra nye kulialo gbo ku teili lo to’dirina. 12Kuwade ŋiyu ku ŋutu gele laga nyoga ku tuwalo, ŋutulu rodri ayuŋele be naga ma kasiri ti ’diko kilo gbo’dini rodrina, be konye ti kuzo naga suburi i kutu yu kine ani kena ina. 13Kilo ŋutulu de giri atatuwa i rugona kata yu, ti inga ko aku rumbi kulia naga asaraki ko kine‚ ’bo ko amedra kulia ŋani kine‚ aroma ku ko ŋiyu pazo‚ ’bo ko arugo adi se a monyazi‚ a ŋutulu laga lo woworotu i kani kilo. 14Ŋutulu laga lo kulia de kilo kpeza adi se ga’yu ka nasena. 15’Bo kugbo ko laga arambu kulia ti ka naga ma se lupundrinina kine‚ kedri kodro ko arumbi kiko lo yitoziniki bo yulo azo. 16’Bo a’diri ko kilo ga’yu ka naga a na’bu koruna ku puso‚ trugo adi naga a na ’dikona. Kuwade Ŋun ani gbo’da ku yukuwe i luŋu a Ŋun lase‚ igbonaga lepe akukunakindra ko kezina ina. 17Ku rugona Abarahama kodro atikindra Isaka a ’doke i luŋa laga ma lepe moroni lu. Ŋutu laga lo saraki sareta ilo‚ nyelo gbo nyoga i tikindra na ŋiro lonye lo yuŋe gelelo. 18Ku kulia ti ŋiro ŋanilo Ŋun kazu akulia adi‚ “Nyomo kolu kilo iluŋu ku Isaka.” 19Lepe arambu adi Ŋun roromoki toŋizu ŋutulu ’dia kodro ku ko laga atatuwa kpe. ’Bo ku kulia na guguma lepe arumbi lepe i piri a ’diri. 20Ku rugona Isaka atikindra Yakobo seku Esau koŋo na’bu naga na ipopondra kolele nu. 21Ku rugona Yakobo atikindra ŋazi ti Yosefa kilo koŋo na’bu mure katru i luŋa laga ma lepe gbo’dini nyoga ku tuwa lu. Lepe druga teminizo Ŋun ma lepe togini mugu ku ture lonyelona. 22Ku rugona Yosefa a’di’dindra lupodru na ŋutu ti Isiraeli kilona, i luŋa laga ma lepe gbo’dini nyoga ku tuwa lu, druga tazu kukuzu ku kulia ti kuyu kanye kilo. 23Ku rugona, kugbo Mose laga ayuŋe, kayuŋo ti lepe kilo a’dandru lepe yapazi musala igbonaga ko amedra adi lepe a ŋiro lo’buna. Ko aku kuze kukuzu na Farona. 24Ku rugona, ku Mose laga a golo, lepe aredra luŋu naga a ŋiro lo ŋiro na Faronalo kaŋo. 25Lepe anyumokindro mugu ŋare na sasanya naga kasi ŋutu ti Ŋun kilo kugelena, alangu rumbi na nyola naga na lenga wuleŋa naga a na torona. 26Lepe arambu adi yukuwe na rie ku kulia ti Kristo kinena a na’bu arodru tokorine giri na Ezepetona, igbonaga lepe mondru rope laga lo ititiki kolele lu. 27Ku rugona lepe akolokindro Ezepeto, lepe aku kuze ŋoma na Farona tro, igbonaga lepe asaka ku teili lo rile, ti lepe amedra Ŋutu laga ani metalo ina. 28Ku rugona lepe asulukindra sopo na kolo druma na Rosetona, druga gbadru rima kine, adi katukarani lo ŋazi laga a kayizi kilo ilo ka’bi ku ’bo’yu ko. 29Ku rugona ŋutulu kilo arosodru Suburi Lotrorulo kata yu beti ka naga a natio. ’Bo kugbo ŋutu ti Ezepeto kilo laga amodyu kondra de, ko druga ruruto ku pio kine. 30Ku rugona goroma ti Yeriko kine a’do’do ka i bo naga ma loŋani gbiri i luŋazi burio katani ina. 31Ku rugona Rahaba naga a noka na towutena aku karaki ku ŋutulu laga aku sobu kulia kilo kugele, igbonaga lepe arukundro ’binya kilo ku teili lo trotrona. 32Ma na kulia adinyo ’do ya? ’Bo baŋena aka romoki nani ma na ku trugi kulia ti Gideona seku Baraka, ku Samasona, Yefeta, Dawidi ku Samueli ku kakeyo kilo kine, 33ko laga atiga tumataki ku rugona kilo, aŋedya kuliata kine soso, arumbi kuliata naga na sara kine, a’diza kutuzi ti kemuruko kine, 34atatu kima naga a riŋina, alokodru ’beri ku reremoyina, arumbi teriŋi i piri na tomunye, ayeŋundra a riŋiko i moro katani, adroŋodru mongoyo ti kamoro ti monyazi kilo. 35Wate ku’de kine arumbi opuo kase laga lo ŋiye ku ŋutulu laga atatuwa kilo i dridriŋi yu kilo. Ku’de kilo ŋutulu asasanya ku teriŋi, ’bo ko a’biye ku lakana, ma ko ku toŋiyeni i ru naga a na’bu arodruna ’busa. 36Ku’de kilo a’data, akpinya, ko atora ku maarota i drodrorani. 37Ko abibiriŋo ku ŋoropo, ko aŋeŋerayi ku musumeni kilo toŋ toŋ, ko areremoyi. Ko aworozi ku ’beriko ti kebilizi ku ti lidi kase ’berini, a lemerika, asasanya, akona a loro. 38Kana aku zuki ko. Ko aworozi i diŋo kata yu‚ i meria ki yu itro‚ i kugio kata yu, i drilio na ’boka ka yu kine. 39’Dia kodro ku bo na kulia ti rugo na kilo ŋutulu de girina a’doto a na’bu kpe, ko aku rumbi kulia naga na saraki ko kine tro, 40igbonaga Ŋun apetakindra yi kuliata naga a na’bu arodru kine‚ adi ka’bi ko ku totoyeŋe a lo’bu ti yi ’bayi.

will be added

X\