GALATIA 6

1Luŋaseri, kugbo le’de ŋutu laga arie i toroni‚ ta laga a ti yuka kilo teyituta lepe bo ku teili lo mada. Mete mugu‚ ka’bi do lepe ku luluka itro. 2Yeketa ŋo lo tomoni kilo kasu dridriŋini, ma ta ku kondrini kukuzu na Kristona soso. 3Kugbo le’de ŋutu lo rambu adi nye a kukaki‚ ti derengi ’bayi, lepe lo ’bo’boliza mugu. 4Ti ŋutu gele gele modyi konesi kanye lepe kine, kuwade pudya na lepe na muguna igbo’da ku kuliata na konu lepe lepe kine, agbo’da ku kulia ti le’de ŋutuni. 5’Bo ŋutu gele gele i’dogu kapatio lonye lepe ilo. 6Kugbo le’de ŋutu laga a lotodinikita i kulia ti Kristo kine, ti lepe ŋarakindri katodinonilo ku kapazi lo’bu kanye kilo giri. 7Ku ’bo’bolia ’bo’bolia, Ŋun ani konani wole. Ŋo laga ma ŋutulo wezilo lepe i’didra ŋo ŋanilo. 8Kugbo lepe laga lo weza konye ti gbiyeri lonye lo ina mugu de, lepe i’didra ’didra naga na ’bu’burena. Kugbo lepe laga lo weza konye ti Yuka Nakiyena‚ Yuka ŋanina itikindra lepe i ’didra ’didra na ru naga ani lengana. 9Ka’bi yi ku kakanya i kondra naga na’buna, igbonaga kolele‚ yi ku ’didra kapazi kugbo teiliko kaya kilo laga ani ’do’do. 10Kuwade be naga ma yi gbo’dini ku koŋo gboŋana, ti yi kondri ŋutulu kilo giri a lo’bu‚ alanguna ŋutulu laga a karuko kilo. 11Meteta‚ na awurokindro ta ku wu­resi laga a drumala kilo de ku keni lio lepe ilo. 12Ŋutulu giri laga kodro lo nyadru meta a lo’bu kaŋo kilo‚ se lo ri’dikindra ta i taaro‚ adi ka’bi se ku rumbi wowonye ku kulia ti kedini lo ’bekoni Kristo ilo ka’delo. 13’Bo ’dibani ŋutulu laga ataaro kilo‚ ko lepe agbo’da sobu kukuzunani, ’bo ko nyadru ki ta taaroni‚ ma se ku pudya ’beri ku kulia ti taaro nasuna. 14’Bo laga na‚ ka’bi na ku pupuru mugu ku le’de ŋo ŋolo a kedini lo ’bekoni Mata lika Yesu Kristolo, igbonaga ku kulia ti kedini ŋanilo kine kulia ti ka kine gbo kuweni be ŋo laga atuwa kaŋo ina. ’Bo na atuwa kaŋo i kulia ti ka kineni ’do. 15’Bo taarona a ’busa‚ ku gbo’da naga ’ba taarona a ’busa ’do‚ ’bo gbeki naga a naludu ina nyena gbo ka’delo. 16Teili lo trotrolo ku ediyolo ti gbo’dini ku ŋutulu laga lo woro ku ina kukuzu de kilo‚ ku ŋutulu laga a Isiraeli ti Ŋun kilo. 17Kulia naga a tutuweto kine‚ le’de ŋutu ka’bi ku sasanyi sasanyi na ’do‚ igbonaga na woro ku merikozi kuwe muguni naga na rio na ku kulia ti Yesu kine kinena. 18’Busa na’bu na Mata lika Yesu Kristona ti gbo’dini ku ta luŋaseri. Amena.

will be added

X\