GALATIA 5

1Kristo alakundra yi ma yi ku gbo’dini a ŋutulu laga alake. Kuwade liranita tritri. Ku totoruta ’beri ’do ku kiliŋgboroki ti to’upiye kilo. 2Yiŋeta ki’do‚ na laga Paulo takindra ta adi ku ta laga ataaro‚ Kristo aka gbo’da a rezema kasunini. 3Iye‚ na ’dutukindro ŋutu gele gele laga ataarolo bo na kulia ’do adi nyara adi ti lepe kone kukuzuna giri. 4Ta laga kodro lo kena mŋgba ku kulia ti kukuzuna kine kilo‚ ta atokodya driŋi nasu naga kasi Kristona kaŋo‚ ’bo ta agira kaŋo i ’busa na’buna katani. 5’Bo laga yi mondru ku teriŋi na Yuka Nakiyena kena nika naga mŋgba naga ma yi yendrini ku rugona. 6Kugbo yi laga ku Kristo Yesu katani, taarona ani gbo’da a kulia‚ ’bo ku yi aku taaro ani gbo’da a kulia itro, ’bo rugo naga na kita ku nyadruna, nye naga a kulia. 7Ta kazu kokondra a na’bu. Ŋa lo goza ta i sobu nasu na kulia ti to’diri kine ya? 8Ina luluka de agbo’da ŋiyu ku Ŋun laga lo lungu talo yuni. 9Kape laga ’baziŋa kilo toyukundro mugati kine giri. 10Laga na lidra mugu ku ta ku Matalo katani adi ta aka gbo’da ku yoyolozu naga ka’deni, adi ŋutu lo yoyongu talo iŋeŋeraki kulia ’dia gbo a ŋa kpe. 11Laga na, luŋaseri‚ kugbo na lo trugo kulia ti taarona kine‚ na wowonye wowonye gbandra ya? Kugbo gbo de kulia ti kedini laga a larelo kine ani gbo’da a ŋo lo pupugo ŋutulu. 12Na kodro nyadru adi ŋutulu lo tikindra ta i yoyongu na ’beri kilo ti ko trose tro ’beri kaŋo! 13’Bo laga ta‚ luŋaseri, ta aluŋu i lake‚ ’bo ka’bi laka nasuna ku yeyeŋundra a kiko lo konani kulia ti mugu kine‚ ’bo konakindrita ’beri kita kasu dridriŋini ku nyadruna, 14igbonaga kukuzuki kine giri atomora kugele ku ilo kulie logele de adi‚ “Nyare ŋutulu lo saka konu gurubeni kilo be na nyadrini do muguna‚” ina. 15’Bo ku ta laga kilo ŋaŋalapa ŋaŋalapa ku kokoza na ’beri be gboroŋa, gbo’dita ku konye ka’bi ta ku tukarakindra ’beri. 16’Bo na adi‚ woronita ku Yuka Nakiyena‚ ’bo ku kokonuta be ki’beŋa ti ina mugu de kine nyadrinina. 17’Ki’beŋa ti ina mugu de kine se na moro ku Yuka Nakiyena, ’bo Yuka Nakiyena nyena moro ku ki’beŋa ti mugu kine. Ko mure katru a mero, kine kulia de trugo adi ta ani romoki kondra be naga ma ta nyadrinina. 18’Bo ku ta laga kilo ’dolaki kuweto ku Yuka Nakiyena‚ ta agbo’da i bo na kukuzunani. 19’Bo konesi ti ina mugu de kine akpeza ’beri gboŋa‚ se kine de‚ konye lopi‚ kulia naga ’ba kekeli kine‚ kulia ti yukuwe na nyara kine‚ 20teminizo na muloko laga a ’busa ’busa kilo‚ ’demba‚ ŋmoza‚ ŋalapa, yino, trotrori na teiliko, yikile na ’beri, rerenya‚ kora na ’beri‚ 21yuma, mera, gindra, ku ku’de kulia naga be kine de kine. Na lo tepizo ta be naga ma na tepizi ta ’berona adi ŋutulu lo kondra de kilo aka rumbi tumata na Ŋun inani. 22’Bo konye lo troru Yuka Nakiyena kilo se kilo de‚ nyadru‚ nyola‚ teili lo trotro‚ teili lo mada‚ teili lo’bu, kulia na’bu‚ teili lo to’diri‚ 23’ba pura na mugu‚ ku teili lo payini kulia ti mugu kine. Kukuzu ne’de ’bayi i kulia naga be kine de kine kini. 24’Bo ŋutulu laga a ti Kristo Yesu kilo a’begu gbiyeri lase lo ina mugu delo i kedini laga a larelo ki‚ ku ki’beŋa kase ku puso naro kase kine itro. 25Kugbo yi laga kilo saka ku Yuka Nakiyena, ti yi gbo’dini ku gbiyeri lo Yuka Nakiyenalo itro. 26Ti yi gbo’dini ’ba pura na ’beri‚ ’ba gala na kulia kaya dridriŋini‚ ’ba yuma kaya dridriŋini itro.

will be added

X\