GALATIA 4

1’Bo na adi‚ ti inga kalumelo a ŋiroŋana, lepe ani langu upiyelo, ’dia kodro ku lepe laga a monye kapazi giri kpe, 2’bo lepe gbo ku katiyu kanye ku karita ti kapazi kanye kilo yeŋadru tozo i luŋa lo nyumu monye lo lepelo lu. 3Gbode ’do kayani. Kugbo yi laga a ŋazina, yi a upi ti dreria ti kapazi ti ina ka de kilo. 4’Bo kugbo luŋalo laga aromoki, Ŋun druga sunyundro Ŋiro lonye laga ma nokana yuŋundri laga lo yuŋe i bo na kukuzunalo, 5ma lepe ku dakundri ŋutulu laga lo saka i bo na kukuzu ŋanina kilo, adi ma Ŋun ku toyeŋundri yi a ŋazi kanye kilo ’busa. 6’Bo igbonaga ta gbo a ŋazina, Ŋun asunyundro Yuka na Ŋiro lonyelo kaya teilikoni naga na ma’yu mugu adi, “Aba! Amonye!” 7Kuwade do ani gbo’da a upiye ’do, ’bo a ŋiro. Kugbo do laga a ŋiro, do a kalume itro ku kulia ti Ŋun kine. 8Kazu ’bero, ku ta laga aku deni Ŋun ina, ta a upi ti ŋo laga ani gbo’da a muloko laga mŋgba kase gbiyerini kilo. 9’Bo tinade ta gbo’di adeni Ŋun, alanguna Ŋun adeni ta, ma ta yitozi bo i dreria laga ’ba teriŋi‚ a lemerika ti kapazi ti ina ka de laga ma ta nyadrini i gbo’da a upi ’do kasiko i mukuzini kilo adidinyo ya? 10Ta kilo sobu luŋazi ku’de kilo, ku yapazi, ku baŋesi ku kiŋazi! 11Ŋo laga de na atrereka kasu dridriŋini a ’busa. 12Luŋaseri, na ma’yu mugu ku ta, yeŋundrita be na, igbonaga na lepe ayeŋundra be ta itro ina. Ta kazu aku kondra na a loro. 13Ta adeni adi na kazu trukokindro ta kuu na’buna a kayona igbonaga i nu baŋe de mugu niona a narona. 14’Dia kodro ku tomunye nio na muguna atikindra ta akanya kpe‚ ta aku ’dadru na‚ ta aku redra na itro‚ ’bo ta arukundro na be malaikata lo Ŋun‚ be Kristo Yesu ku mugu. 15Nyola nasu naga ma yi gbo’dini kazu kasi ta kugelena ina yaya? Na lo ’dodru bo nasu na kuliana adi kedri kodro ku roromoki‚ ta kazu kodro ’dutukindro na konye kasu kilo i tikindra na na. 16Na ayeŋundra a miriku lasu ku naga ma na takindri ta kulia ti to’diri kinena ya? 17Kulu ŋutulu de ga’yu ta ku puso‚ ’bo agbo’da ku kulia na’buni. Ko nyadru kodro tokodya driŋi nika kasi ta, ma ta ku ga’ini se ku puso. 18’Bo kugbo ŋutulu kilo ga’yu ta ku puso ku kulia na’bu, a na’bu mu luŋa, agbo’da i baŋe naga ma na sakani kasi ta ka’delonani. 19Ŋazi kuwe lo’di’diki kilo, ta’duna awakundra na ’do ti inga Kristo aku gbeki kasu katani. 20Na kodro nyadru saka kasi ta kugele tinade ma teili liolo ku gbigbi’diki ku ta, igbonaga na yoyongu mugu ku tana. 21Trukokita na, ta laga lo nyadru saka i bo na kukuzuna kilo, ta ani yinga kulia na ta kukuzu ina ya? 22Awuro adi Abarahama gbo ku ŋazi mure, le’delo a lo noka naga a upiyena, le’delo a lo noka naga a ŋote’bana. 23’Bo ŋiro lo noka naga a upiyena ayuŋe be naga ma ŋutulu giri yuŋozina, ’bo ŋiro lo noka naga a ŋote’bana ayuŋe ku kulia na sarani Ŋun kine. 24kine kulia de a kulia na guguma. kine wate de a tomoresi mure. Gelena ŋiyu i mere laga Sinai yu, naga na yuŋozu ŋazi a upi kilo. Nye naga Hagari. 25Hagari nye naga a mere lo Sinai laga Arabia lu. Lepe gbo’di be na Yerusalema na tinadena, igbonaga lepe a upiye ku ŋazi kanye kilo kugele ina. 26’Bo Yerusalema naga ki yuna a ŋote ka. Lepe a ŋote nikana. 27’Bo awuro adi, “Nyolani nyola‚ do naga a undona‚ naga ani yuŋundrona. Laine ku riŋi, resani, do naga ani gbo’da ku miye na ŋiro i ta’dunina, igbonaga ŋazi ti noka laga ’ba lalena kilo rodri alangu ti noka naga na saka ku lalena.” 28Kuwade luŋaseri, laga yi be Isaka‚ laga a ŋazi ti kulia na sarani Ŋun kine. 29I lu luŋa de ŋiro laga lo yuŋe be naga ma ŋutulu giri yuŋozina ilo nyelo wowondru ŋiro laga lo yuŋe ku kulia ti Yuka Nakiyenalo. Tinade kulia kine gbo de ’do. 30Kulia na wuwuro kine akulia adinyo ya? “Rikoro noka naga a upiyena seku ŋiro lo lepelo kaŋo‚ igbonaga ŋiro lo noka naga a upiyena aka rumbi luma kilo kugele seku ŋiro lo noka naga a ŋote’banani ina.” 31Ku kine kulia de‚ luŋaseri, yi agbo’da a ŋazi ti noka naga a upiyenani, ’bo ti noka naga a ŋote’bana.

will be added

X\