GALATIA 3

1Ta Galatia laga a lo mamali kilo‚ ta laga ma Kristo kazu kpekini kasu koŋoni i ’beko i kedini mugu kilo‚ ŋa lo droba ta? 2Ti na pine ta ku kine kulia de gele ’du. Ta kazu rumbi Yuka Nakiyena ku kondra nasu na kukuzuna, kugbo ku yinga nasu naga ku rugona ya? 3Ta gbo a ti pori pori de gbandra? Ta kazu asuluza ku Yuka Nakiyena, ’bo ta nyadru tinade tutuzo ku teriŋi na ina ka de ya? 4Ta arumbi luŋulio rodri a ’busa ya? Ŋona ko a ’busa a ’diri ya? 5Kugbo Ŋun laga lo tikindra ta Yuka Nakiyena, lo kita ku konesi naga ku teriŋi kasu dridriŋinilo, lepe bita kondra de ku kondra nasu na kukuzuna kugbo ku yinga nasu naga ku rugona ya? 6Be naga ma wuronina adi‚ “Abarahama arugo Ŋun‚ ku kulia ŋani kine Ŋun akendra lepe mŋgba.” 7Kuwade deneta adi ŋutulu laga a ti rugo kilo se laga a ŋazi ti Abarahama. 8Kulia na wuwuro kine adeni ’bero adi Ŋun ikekendra Monyazi kilo mŋgba ku rugo nasikona, kuwade kulia na wuwuro ŋani kine atrukokindro Abarahama kuu na’buna a kayo adi‚ “Zuro kilo giri iriondru koŋo na’bu konu yu.” 9Kuwade ŋutulu laga a ti rugo kilo se lo riondru koŋo na’bu kasi Abarahama laga a karukonilo kugele. 10’Bo ŋutulu giri laga lo togu ’beri ku kondra na kukuzuna kilo alomo‚ igbonaga awuro adi‚ “Ŋutu gele gele laga ani kondra ’duu kulia giri na wuro i buku na kukuzuna katani ilo nye lo lomo.” 11’Bo kulia kine gbo’di gboŋa adi‚ le’de ŋutu ’bayi lo kena mŋgba ku Ŋun i koŋoni ku kondra na kukuzuna, igbonaga “Ŋutu laga akena mŋgba ku rugonalo, nye lo igbo’da zoru.” 12Kukuzuna agbo’da lira ku rugoni‚ ’bo ŋutu lo kondra kukuzuki ilo‚ nyelo igbo’da zoru ku kukuzuki ŋani kine. 13Kristo adakundra yi i lomo na kukuzuna katani i naga ma lepe yeŋundri a lomo ku kulia kaya kinena, igbonaga awuro adi, “Ŋutu gele gele lo leleki i kedini mugulo nyelo lomo.” 14Kuwade koŋo na’bu na tiki Abarahamana ti yeŋundri ku Monyazi kilo kini ku kulia ti Kristo Yesu kine, ma yi ku riondri Yuka Nakiye na saraki Ŋun ina ku rugo. 15Luŋaseri, na tazu kulia ti ina ka de kine adi kugbo ku’de kulia kine naga aruko, kugbo asaraki i waraga katani azo, le’de ŋutu ’bayi lo romoki toyeŋundra waraga ŋanina a ’busa kuwa lo ’yalakindra le’de ŋo kini. 16’Bo kulia kine asaraki kazu ku Abarahama ku nyumuti lo lepelo. Agbo’da kulia adi nyomo laga rodri kiloni‚ ’bo nyumuti gele ’du‚ adi “ku nyumuti lolulo” nye laga a Kristo. 17Trugo adi kukuzu naga na yeŋundra i bo na kiŋazi kamazi iŋmani ku meria musalana ani romoki i ’delakindra na kulia na sarani Ŋun kine a ’busa. 18Luma kilo kugbo a kulia ti kukuzuna‚ trugo adi ko ani gbo’da ’do a kulia na sarani Ŋun. ’Bo Ŋun atikindra Abarahama luma ŋani kilo ku naga ma lepe sarakindri lepe luma ŋani kilona. 19Kuwade kukuzuna tiki gbandra ya? Tiki ku kulia ti torozi kine yeŋundra tozo i pondra na nyumuti laga ma Ŋun sarakindri Abarahama kulia ti lepe kinelo. Kukuzuna sunye ku malaika kilo i keni lo katomoranilo. 20’Bo katomorani lo tomodyalo ani gbo’da a lo ŋutu gele‚ ’bo Ŋun ilo gele. 21Kuwade kukuzuna nyena moro ku kulia na sarani Ŋun kine ya? ’Bayi, ani gbo’da de. Kugbo kukuzu na tikina naga romoki i toruzo na ŋutulu kilo, kedri kodro a ’diri ŋutulu kilo ikekena mŋgba ku kulia ti kukuzuna kine. 22’Bo kulia na wuwuro kine atodya ŋutulu giri laga i kani kilo i gbo’da a upi ti toro‚ ma kulia na sara kine tiki karuko kilo igbonaga ko arugo Yesu Kristona. 23Nyenaga ti inga rugona aku yeŋu­ndrana yi atiyu i drodroreni‚ atora i bo na kukuzuna i mondru na rugo naga ikpekpeza muguna. 24Kuwade kukuzu ŋanina atizu yi a katiyuni likalo yeŋadru tozo i pondra na Kristo ma yi ku kenani mŋgba ku rugona. 25’Bo tinade rugona ayeŋundra azo‚ yi ani saka ’do ku katiyuni ŋanilo i moko‚ 26igbonaga ta giri a ŋazi ti Ŋun ku Yesu Kristo katani ku kulia ti rugo kinena. 27Ta giri laga lo ’deba baputizi lo tolubo ta ku Kristo katani kilo ta asozu Kristo be bongo. 28Agbo’da Yahudini, kuwa Monyazini, agbo’da upini kuwa kumose kani‚ agbo’da laliani kuwa wateni‚ ’bo ta giri a ŋutu gele ku Kristo Yesu katani. 29Kugbo ta laga a ti Kristo‚ ta gbo’di a nyomo ti Abarahama a kaluma be naga ma Ŋun sarakindrina.

will be added

X\