GALATIA 2

1I bo na kiŋazi mere gele konye iŋmani yi druga tu ’do Yerusalema yu seku Baranaba, ’bo Tito autu kasi yi kugele. 2Na tu ku kulia naga ma Ŋun kpekindri na kine‚ ’bo na druga kpekindra ŋutulu laga akukaki kilo tali kuu na’bu naga na tru na i dridriŋi na Monyazi kilo yuna‚ kita nio naga tinadena ku na ’berona itro ka’bi ku yeŋundra a ’busa. 3’Bo ’dia kodro ku Tito laga seku nalo‚ laga a Girikitio kpe‚ lepe aku ri’diki i taaroni tro. 4’Bo luŋaseri laga a ’bureniko laga lo tolupe tali kilo kazu nyadru de. Ko alupundro tali i domba na yi ku kulia ti laka nika naga ku Kristo Yesu katani ina‚ ma ko kodro lopugi yi a upi. 5’Bo yi aku ru sobu na kulia kasiko kine‚ ’dia kodro ku baŋe a naŋutru kpe‚ kulia naga mŋgba i kuu na’buna katani kine ka’bi ku liki kasuni. 6’Bo ŋutulu laga lo puru a kukaki kilo — ’dia kodro ku ko laga a kuŋa kpe, na aku yo’yu kulia kasiko kine. Ŋun agbo’da medra ŋutulu kilo i muguni. Kuwade kulu ŋutulu laga a kukaki kilo aku togulukindro na le’de ŋo, 7’bo ko ameri adi na akoloki kita na trukokini na Monyazi laga aku taaro kilo kuu na’buna‚ be naga Petero ma kolokini kita na trukokini na Yahudi laga ataaro kilo kuu na’bunana. 8A ’diri Ŋun laga lo kita ku Petero katani ma lepe ku gbo’dini a lososonyo lo Yahudi kilo ilo‚ nyelo kita kuwe katani itro ma na ku gbo’dini a lo Monyazi kilo. 9Kugbo ko laga ameri ’busa na’bu na tiki na ina‚ Yakobo seku Kefa ku Yoane laga akukaki a ziki’dia lo ’biluni tomore na karukona kilo‚ ko druga rukundro yi seku Baranaba a kakita kasi se kugele adi laga yi‚ ti yi uti ku Monyazi kilo yu‚ ’bo laga se‚ ti se uti ku Yahudi laga ataaro kilo yu. 10Ko anyadru ’du adi ti yi yole kulia ti lemerika kilo‚ kine de naga a kulia naga ma na tikindra mugu koru i kondra kine. 11’Bo kugbo Kefa laga ayeŋundra Antiokiani, yi druga rerenya seku lepe i konye konye igbonaga kulia na ŋeŋera kine se na tiga lepe ina. 12’Bo ti inga ku’de ŋutulu lo ŋiyu ku Yakobo yu kilo aku yeŋundrana, lepe bita nyonyosu ku Monyazi kilo kugele‚ ’bo kugbo ko laga ayeŋundra lepe druga ’dotodru mugu kaŋo druga geladru mugu‚ igbonaga lepe kuze ŋutulu laga lo nyadru taarona kilona. 13Yahudi ku’de kilo giri akondra ku toŋulupa kasi lepe kugele‚ kuwade Baranaba lepe druga lulukazi itro ku toŋulupa nasikona. 14’Bo kugbo na laga amedra adi gbiyeri lasikolo aku mora soso ku kulia naga mŋgba naga i kuu na’buna katani kine‚ na druga takindra Kefa kasiko i koŋo yu giri adi‚ “Ku do laga a Yahuditiolo asaka be na Monyationa‚ agbo’da be Yahuditioni, do ri’dikindra Monyazi kilo i saka be na Yahudi kilona gbandra ya?” 15Yi lepe laga ayuŋele a Yahudi kilo‚ agbo’da a Monyazi laga lo kondra toro kiloni‚ 16yi adeni adi ŋutulo agbo’da kena mŋgba ku kondra na lepe na kukuzunani, ’bo ku rugo na lepe na Yesu Kristona. Yi lepe arugo Kristo Yesu ma yi ku kenani mŋgba ku rugo nika na Kristona, agbo’da ku kondra nika na kukuzanani, igbonaga le’de ŋutu ’bayi lo kena mŋgba ku kondra na kukuzuna. 17’Bo i naga ma yi modyini i kena mŋgba ku Kristo katani ina kugbo yi laga arie a ŋutulu lo kondra toro kilo‚ trugo adi Kristo a kalokoni lo toro ya? ’Bayi‚ ani gbo’da de. 18’Bo kugbo na lo ’dugo kapa laga ma na ŋandri kilo‚ na kpekmdra mugu a kakokoreyini lo kukuzuna. 19’Bo na atuwa i kukuzunani ku kulia ti kukuzu ŋanina kine‚ ma na ku gbo’dini zoru ku Ŋun yu. Yi a’beko seku Kristo i kedini mugu‚ 20kuwade tinade ŋutu laga zorulo agbo’da a nani‚ ’bo a Kristo lo saka kuwe katani ilo. Ina ru de naga na gbo’da tinade kuwe mugunina, gbo ku rugo nio na Ŋiro lo Ŋun laga lo nyadru na ku puso‚ laga lo tikindra mugu ku kulia kuwe kine ilo. 21Na ani toyeŋundra ’busa na’bu na Ŋun ina a’busa. ’Bo kugbo kulia na kenani ŋutulu kilo mŋgba kine a ti kukuzuna‚ kpeza adi Kristo atuwa a ’busa.

will be added

X\