GALATIA 1

1Paulo laga a lososonyo agbo’da ŋutu lo lungu lepeni‚ agbo’da ŋutu lo tikindra lepe kitanani ’bo Yesu Kristo seku Ŋun Monye laga lo toŋizu lepe i dridriŋi na ŋutulu laga atatuwa kilo ilo lo tikindra. 2Yi ku luŋaseri giri laga lo saka kasi na kilo aroma ku tomoresi ti karuko ti Galatia kilo. 3’Busa na’buna ku teili lo trotro lo ŋiyu ku Ŋun Monyelo yu ku Mata lika Yesu Kristo yu itrolo ti gbo’dini ku ta. 4Lepe kazu atikindra mugu ku torozi kaya kine ma lepe ku ninundri yi i baŋe na tinade naga a narona katani‚ be naga ma Ŋun Monye likalo nyadrini ina. 5Ti Ŋun purani pura paratra paratra. Amena. 6Na arambu mugu koru igbonaga ta kilo lolopugo ’beri wule wule i kolokindro na Ŋun laga lo lungu ta ku ’busa na’bu na Kristona ilo‚ ’bo ta kulu ku rugo kuu na’bu naga ka’de ina. 7A ’diri kuu na’bu ne’de ’bayi‚ ’bo ku’de kilo ŋutulu kilo tikindra ta i bayi igbonaga ko nyadru lopugo kuu na’bu na Kristona ka’de ina. 8’Bo ku yi‚ kugbo le’de malaikata lo ’diko laga lo trukokindro ta kuu na’bu naga ka’de kpe‚ agbo’da be kuu na’bu naga ma yi trukokindri tanani‚ ti lepe lomoni lomo. 9Be naga ma yi kuliani a kayona‚ ’bo na lo kulia tinade ’do‚ adi kugbo le’de ŋutu lo trukokindro ta kuu na’bu naga ka’de kpe‚ agbo’da be naga ma ta ruginani, ti lepe lomoni lomo. 10Tinade na ga’yu nyadru na ŋutulu kilo‚ kuwa na Ŋun ina ya? Kugbo ŋona na ilo ga’yu tikindra ŋutulu kilo nyola ya? Kugbo na laga ’diza lo tikindra ŋutulu kilo nyola, kedri kodro na ani gbo’da a upiye lo Kristo. 11’Bo luŋaseri na nyadru deneta, adi kuu na’bu naga ma na trugi ina ani gbo’da a kuu na’bu na ŋutulu. 12Na agbo’da rugo lepe ku ŋutuluni‚ na agbo’da totogoloni, ’bo Yesu Kristo lo kpekindra na. 13’Bo ta ayinga kulia ti gbiyeri lio lo ’bero laga ma na teminizi Ŋun be na Yahudi kilonalo, kulia naga ma na wowondri tomore na karuko ti Ŋun kilona ku teriŋi‚ ma na kodro ku tukarakindri lepe kaŋo. 14Ku kulia ti teminizio nika naga na Yahudina, na arodru worisi kuwe laga rodri ma yi gbo’dini a berini kasi ko kaya zuruni kilo‚ igbonaga na kazu gbo ku puso koru ku togoleto ti merenyezi kuwe kilona. 15’Bo Ŋun laga kazu lo gelundra na ka’de ti na lu ku ŋote niona i pele yu, laga lo lungu na ku ’busa na’bu nanyena ilo, 16kugbo a na’bu ku lepe i konyeni i kpekindra na na Ŋiro lonyelo ma na ku trugini kulia ti lepe kine i dridriŋi na Monyazi kilo, na aku pipiza ŋutulu ti ina mugu na rima de kilo. 17Na aku tu Yerusalema yu i ŋutulu laga a lososonyo kuwe koŋo yu kilo‚ ’bo na druga tu Arabia yu‚ na buloni ku yito bo Dameseke yu. 18I bo na kiŋazi musala na druga tu Yerusalema yu i dendra na Kefa‚ na druga saka seku lepe luŋa mere gele konye mukana. 19’Bo na aku meri le’de ŋutu ku lososonyo ku’de kilo i dridriŋi yu ŋolo a Yakobo laga a luŋase lo Matalo ’du. 20Kulia naga ma na wurokindri ta kine de a ti to’diri‚ ’bo ku Ŋun i koŋoni na ani lengu ’bure. 21I bo ŋanina na autu i ka na Suriana ku na Kilikiana kata yu. 22’Bo tomoresi ti karuko ti Kristo laga Yudaya yu kilo aku deni koŋo niona. 23’Bo ko ayinga ku suwo ka’delo adi‚ “Ŋutu laga kazu lo wowondru yilo‚ nyelo trugo tinade kulia ti rugo naga ma lepe kazu kodro tukarakindrina.” 24Ko druga pupudya Ŋun ku kulia kuwe kine.

will be added

X\