EFESO 5

1Kuwade gbo’dita a kamira ti Ŋun be ŋazi laga lo nyanyara. 2Koneta ku nyadru naga ku pusona‚ be naga ma Kristo nyadrini yi ’bo atikindra mugu ku kulia kaya kine‚ a ’doke laga lo ŋmwa sisisi‚ laga a ’i’ile lo Ŋun ilona. 3’Bo konye lopi‚ ku kuliata naga a naro naro kine kuwa roŋgbo ka’bi ku ’di’dinya ’di’dinya kasu dridriŋini, be naga ma zukini i ŋutu ti Ŋun kilona. 4Kuliesi ti yukuwe ka’bi ku tatayi‚ ku kuliesi ti mali ku ti wayata naga ani zuki kine‚ ’bo alanguna iyetelo ti tikini Ŋun ayu. 5’Bo deneta de adi le’de ŋutu laga ku konye lopi‚ kuwa laga lo kondra kuliata naga a naro naro kine‚ kuwa laga lo roŋgbo‚ ilo de a ŋutu laga lo teminizo muloko laga a ’busa ’busa kilolo‚ aka ŋarundra dridriŋi na tumata na Kristo ku na Ŋun inani. 6Le’de ŋutu ka’bi ku ’bo’boli ’bo’boli ta ku kuliesi naga a ’busa ’busa kine‚ igbonaga ŋoma na Ŋun ina ina ipondra ku ŋutulu laga aku sobu lepe kilo kini ku kine kuliata de. 7Kuwade ka’bi ta ku momora kasi ko‚ 8igbonaga ta kazu a mude‚ ’bo tinade ta gbo’di a parara ku Matalo katani. Koneta be ŋazi ti parara ŋanina. 9’Bo pararana nyena tikindra trora na konye ti kulia naga a na’bu ku naga mŋgba ku naga ti to’diri kine. 10Morita i dendra na ŋo laga lo tikindra Matalo nyolalo. 11Ku momorata ku konesi ti mude naga ani troruni konye kine‚ ’bo alanguna tikita ti ko kpene ’beri i parara katani ayu. 12’Bo kulia naga ma ŋutulu kondrini tali kunu a yukuwe i tayi nasiko. 13’Bo kugbo le’de ŋo laga akpeza mugu i parara katani‚ ŋo ŋanilo atemetakindra mugu‚ ’bo ŋo laga lo temetakindra mugulo nye laga a parara. 14Kuwade akulia adi‚ “Do lo tototolo, pureni pure ŋine i ŋutulu laga atatuwa kilo i dridriŋini, ’bo Kristo lo ititikindra do pararana i ŋurundro konu kini.” 15Kuwade gbo’dita go ku gbiyeri lasulo. Ku gbogbo’data be ŋutulu laga ’ba tobodo‚ ’bo be ŋutu ti tobodo. 16Ku kokorota kokoro luŋalo‚ igbonaga ina baŋe de ina a narona. 17Kuwade ku gbogbo’data ’ba dendra‚ ’bo deneta ŋo laga ma Matalo nyadrini ilo. 18Ku memerata‚ kine kulia de a kulia ti gbiyeri loro‚ ’bo tikita Yuka Nakiyena ti zoreni kasuni ayu. 19Taneta sauma kasu dridriŋini ku wirito‚ ku wirito laga a ti yuka kilo‚ welonita ku rababa, wilikita Matalo kasu teilikoni ku teili giri. 20Tikita iyete mu luŋa ku kulia ti kapazi giri‚ ku Ŋun Monyeloni‚ ku kari ti Mata Yesu Kristo kine. 21Gbo’dita ku sobu kasu dridriŋini ku naga ma ta kugini Kristo ina. 22Wate kine ta‚ gbo’dita ku sobu ku lalia kasu kilo be naga ku Mata ilonina. 23Lalelo a kuwe na nokana‚ be naga ma Kristo gbo’dini a kuwe na tomore na karuko kilona, ’bo lepe a Kariteni lo tomore naga a mugu nanyena. 24Kuwade be naga ma tomorena gbo’dini ku sobu na Kristona, wate kine ti gbo’dini ku sobu na lalia kase kilo i kuliata kine giri katani. 25Ta laga a lalia kilo‚ nyareta nya wate kasu kine be naga ma Kristo nyadrini tomore na karuko kilona. ’Bo lepe atikindra mugu ku tomore ŋanina, 26ma lepe ku toke’ya lepe, ma lepe ku lalazu lepe a nakiye ku pio, ku kulia ti Ŋun kine itro, 27ma lepe ku kpekindra tomore na karuko kilona a na’bu koru‚ ’ba mundrita ’ba ŋo lo kokorozu lepe‚ ’dia kodro a inyo kpe‚ ma tomore ŋanina ku gbo’da a nakiye‚ ’ba meriko. 28Ku gbo de ’do lalia kilo ti nyare nya wate kase kine be naga ma kara nyadri ’beri kase kinena. Ŋutu laga lo nyadru noka nanyena anyari mugu. 29’Bo le’de ŋutu ’bayi lo ŋmoza mugu nanyena a naro‚ ’bo lepe wowoza lepe‚ riridra lepe‚ be naga ma Kristo konakindrini tomore na karuko kilona. 30’Bo yi a dridriŋita ti mugu na lepena. 31Be naga ma wuronina adi‚ “Ku kine kulia de ŋutulo ikokolokindro monye lonyelo ku ŋote nanyena‚ ko imomora seku noka nanyena, nyenaga ko mure katru igbo’da a mugu nagele.” 32kine kulia naga na mumuyi mumuyi kine de a drumala koru‚ ’bo laga na‚ na tazu kulia kasi Kristo seku tomore na karuko ti lepe kilo. 33’Bo ta giri gele gele‚ nyareta nya wate kasu kine lepe‚ be naga ma ta nyadrini ’berina, ’bo nokana ti sope so lale lonyelo itro.

will be added

X\