EFESO 4

1Na laga adrodrora ku kulia ti Matalo kinelo, na ma’yu mugu ku ta, koneta a na’bu beti naga ma zukini ku luŋu nasu naga ma Ŋun lungini tana, 2’ba pura na ’beri, ku teiliko mada, ku teiliko ti rile, gbo’dita ku pele na’bu kasu dridriŋini ku nyadru. 3Morita ku teili giri i gbo’da ku teili gele lo tiyi Yuka Nakiyena, ti ta atomora kugele ku teili lo trotro. 4Muguna ina gele, Yuka Nakiyena ina gele‚ be naga kazu ma Ŋun lungini ta i gbo’da ku yendru gele ina. 5Matalo ilo gele‚ rugona ina gele‚ baputizilo ilo gele‚ 6Ŋun ilo gele laga a Monye lika giri‚ laga i kuliata giri i koŋo yu‚ lo kita ku kiko lo kuliata girilo‚ laga i kuliata giri katanilo. 7’Bo ’busa na’buna atiki kayani giri gele gele‚ be na more lo ’doke laga ma Kristo tikindrilona ina. 8Kuwade akulia adi, “Kugbo lepe laga akiyadru ki yu, lepe azonga ŋutulu laga amomoka kilo, lepe atikindra ŋutulu kilo ’doketa.” 9‘Lepe akiyadru ki yu’ trugo adinyo ya? Trugo adi a kayona lepe akiyundra ka, ’bo ayeŋadru tozo i pirito ti ka naga a nagululo kunu. 10Ŋutu laga akiyundra kanilo a ŋutu laga akiyadru ki i ’diko kide yulo, ma lepe ku tozodru kapa kilo giri. 11Lepe atikindra ku’de kilo ŋutulu ti gbo’dini a lososonyo‚ ku’de kilo a bodoki ti kulia ti Ŋun kine‚ ku’de kilo a katruko ti kuu na’buna, ku’de kilo a kayuku ti ŋutulu‚ ku katogolo, 12i kukundra na ŋutu ti Ŋun kilo soso i kondra na kita na Ŋun‚ i to’durodru na mugu na Kristona. 13Kuwade yi giri igbogbo’da ku teili gele ku kulia ti rugo ku ti dena na Ŋiro lo Ŋun kine‚ a ŋutulu laga aguguli, laga amoro ku ’durodru na tolozo na Kristona kilo. 14Kuwade ka’bi yi ku gbogbo’da a ŋazina, laga lo yeyeka nide ku yude, laga lo lolopuko lolopuko ku togoleto kine giri, beti naga ma kobuŋena yegini ina, ku kulia ti totore na ŋutulu kilona, ku toŋulupa nasiko naga na galani kiko lo ’bo’boliani ŋutuluna. 15’Bo ti yi tane kulia ti to’diri kine ku nyadru, ma yi ku ’durodru ki i kuliata giri kine ku lepe laga a kuwelo katani, ŋolo a Kristo. 16Ku lepe katani dridriŋita ti mugu kine giri atomoraki kugele, druga totokuwa i piri nagele ku kulia ti tomoresi giri naga na gbo’da i mugu katani kine. Kuwade kugbo dridriŋita giri gele gele kine naga kita soso, muguna giri i’du’dudyo druga itoto’durodru mugu ku nyadru. 17Nyenaga ku Matalo i koŋoni‚ na lo tepizo ta adi ka’bi ta ku kokonu ’do be naga ma Monyazi kilo kondrinina. Ramesi kasiko kine a ’busa, 18’bo yoyolozu nasikona ina i mude katani, ti ko atokora i ru na Ŋun ina pazo, ku naga ma ko gbo’dini ’ba dendra na kulia ku teiliko kase laga logo kilona. 19Ko ayeŋundra gbo’di ’ba yukuwe‚ ko atikindra ’beri i kuliata ti yukuwe na nyara kine, ko kilo kondra kuliata giri naga a naro naro kine ku puso. 20’Bo laga ta kazu aku toguluki kulia ti Kristo kine de! 21A ’diri ta ayinga kulia ti lepe kine, ta laga ku lepe katani kilo‚ ta atoguluki kulia ti to’diri naga ku Yesu katani kine. 22Kolokita gbiyeri lasu lo ’berolo kaŋo, laga kazu ma ta sakani katani a kayo lu‚ lo kokorozu mugu ku ki’beŋa naga ti toŋulupa kinelo. 23Yuka na yoyolozu nasuna ti lopuke mugu a naludu‚ 24’bo ’depeta gbiyeri laga a loludu, laga lo gbiya beti Ŋun ku logbiye lo’bu laga mŋgba, laga ku kekelilo. 25Ku kine kulia de‚ kolokita kulia ti to’bure kine kaŋo‚ ta giri gele gele takita ŋutulu lo saka kasu gurubeni kilo kulia naga mŋgba kine‚ igbonaga yi a dridriŋita ti mugu na Kristona. 26Ku ta aŋoma‚ ku kokonuta toro‚ ka’bi kolona ku ’do’doro kasu kini ti inga ŋomana aku likaki. 27Ku titikita kasosoyini lo kulialo kiko tro. 28Kolanilo ka’bi ku ko­ko’ya koko’ya ’do‚ ’bo a na’bu ti lepe kondri kita ku kenisi kanye kilo‚ ma lepe ku ’dogi ŋutulu laga ’ba kapa kilo. 29Kuliesi naga a naro kine ka’bi ku lulupundro kaŋo kasu kutuzini‚ ’bo kulia naga a na’bu naga na romoki to’durodru ŋutulu kilo i baŋe naga soso‚ naga na tikindra kayiŋa kilo ’busa na’buna kine. 30Ku titikita Yuka Nakiye na Ŋun ina luŋuli. Lepe atiki ta a rape i riritani na ta‚ yeŋadru tozo i luŋa lo dakeni ta lu. 31Kolokita teiliko lo potroru, ku troru na pele‚ ku ŋoma‚ ku ŋalapa‚ ku momorozu‚ ku teiliko loro giri. 32Gbo’dita ku teiliko lo’bu kasu dridriŋini ku teili lo trotro‚ ’bo ’dineta torozi kasu dridriŋini kine be naga ma Ŋun ’dizini torozi kasu kine ku Kristo katanina.

will be added

X\