EFESO 3

1Ku kine kulia de‚ na Paulo laga a ŋutu lo drodrora ku Kristo Yesu ku kulia kasu kinelo‚ ta laga a Monyazi kilo‚ na lo magu Ŋun. 2A ’diri ta ayinga kulia ti kita naga ma Ŋun tikindri na ku ’busa na’bu na lepena ku kulia kasu kinena‚ 3kulia naga ma lepe todinikindri na kulia naga na mumuyi mumuyi kine ku kiko lo ŋo lo kpikpiya be naga ma na wudyini a kayo ku kuliesi naga ’baziŋa kinena. 4Ku ta lo kendra kine kulia de, ta roromoki medra dendra nio na kulia naga na mumuyi mumuyi ti Kristo kine. 5I baŋesi ku’de kine ŋutulu kilo aku todiniki kine kulia naga na mumuyi mumuyi kine de, ’bo Ŋun akpeza ko kaŋo tinade ku lososonyo lokiye kanye kilo ku kakeyo kanye kiloni ku Yuka Nakiyena, 6adi Monyazi kilo irurumbi koŋo na’bu kasi Yahudi kilo kugele. Ko a dridriŋita ti mugu gele, ko a kaŋara ti ŋo lo sari Ŋun ku Kristo Yesu katani ilo ku kulia ti kuu na’buna kine. 7Na a’delaki a kalokoni lo ina kuu na’buna de be naga ma Ŋun ’dogini na ku ’busa na’bu nanye naga na tiki na ku teriŋi nanye na konani kitanana. 8’Dibani kodro ku na laga iloŋadroo koru ku ŋutu ti Ŋun kilo i dridriŋini kpe‚ ina ’busa na’bu de atiki na ma na ku trukokindri Monyazi kilo kulia ti tokorine na Kristo naga ani romoki tutuwena‚ 9ma na ku topurundri lopete laga ma Ŋun pedrini lo kulia naga na mu­muyi mumuyi naga a’dandru ’beri kunu. Ŋun lo gbeza kapazi kilo girilo a’dandru kine kulia de ŋiyu ’bero‚ 10adi ma tobodo nanye naga ku dridriŋita rodri ina ti todinikini tinade tumataki ku teriŋito naga ki yu kine ku kiko lo tomore na karukonalo. 11Ŋun lo kondra de‚ be naga ma lepe pedrini ’bero i kondra ku Kristo Mata likalo katanina. 12Ku lepe katani yi gbo ku teiliko logo‚ yi gbo ku koŋo gboŋa i lubo naga ku Ŋun i koŋo yuna‚ ku naga ma yi rugini lepena. 13Ku kine kulia de na magu ta‚ ka’bi ta ku gbogbo’da ku ’doko na teili ku kulia ti sasanya nio naga ma na rumbi ku kulia kasu kinena. kine de se na ilogu ta. 14Ku kine kulia de‚ se na ruguŋoni na ku kuŋusi ka ku Ŋun Monyelo i koŋoni. 15Ku kulia ti lepe kine ketimito giri naga i ’diko yu‚ ku i kani kine agbiyo ku kari‚ 16ma lepe ku tikindri ta i rumbi na teriŋi ku Yuka nanyena kasu ’berini, be naga ma todruma na lepena gbo’dini a druma koru ina‚ 17ma Kristo ku saka kasu teiliko katani ku naga ma ta ruginina, kukuri kasu kine ku mukoto kasu kine ma tolirani tritri i nyadruna katani‚ 18ma ta ku romoki dendra ku ŋutu ti Ŋun kilo giri kugele‚ tuwalana ku tolozona, ku tolozo naga kina‚ ku togulu na nyadru na Kristona, 19ma ta ku dendri a ’diri nyadru na lepena‚ ’dibani kodro ku lepe naga ani romoki dena kpe‚ ma ta ku tozore ku tozodru na Ŋun naga koruna. 20Ti Ŋun laga lo romoki kondra kulia alangu naga ma yi magini kugbo rambini kine, ku kulia ti teriŋi naga na kita kayaninalo, 21purani pura i tomore na karukona katani‚ ku Kristo Yesu katani itro, i baŋesi giri katani paratra paratra. Amena.

will be added

X\